ചൊവ്വയില്‍ ജലസാന്നിധ്യത്തിനു പുതിയ തെളിവുകളുമായി നാസയിലെ ഇന്ത്യന്‍ വംശജരായ ശാസ്ത്രജ്ഞര്‍. ചൊവ്വയില്‍നിന്നു നാസയുടെ ക്യൂരിയോസിറ്റി പേടകം അയച്ച ചിത്രങ്ങളുടെ സഹായത്തോടെയാണു നിഗമനത്തിലെത്തിയത്. ചൊവ്വയില്‍ ചെറുജീവികള്‍ക്ക് അനുകൂലമായ കാലാവസ്ഥ ഉണ്ടായിരുന്നതായും ഗവേഷകര്‍ വ്യക്തമാക്കി. എക്കല്‍ നിക്ഷേപവും ക്യൂരിയോസിറ്റി ഡെപ്യൂട്ടി പ്രജക്റ്റ് സയന്റിസ്റ്റ്കൂടിയായ അശ്വിന്‍ വാസവാദ കണ്ടെത്തിയിട്ടുണ്ട്.
ചൊവ്വയുടെ പ്രതലത്തിലെ ഉല്‍ക്കാഗര്‍ത്തമായ ഗേല്‍ ക്രേറ്ററിലിറങ്ങിയ ക്യൂരിയോസിറ്റി, അവിടേക്ക് വര്‍ഷങ്ങള്‍ക്കു മുന്‍പു നദികള്‍ ഒഴുകി എത്തിയതിന്റെയും തടാകങ്ങള്‍ രൂപപ്പെട്ടതിന്റെയും തെളിവുകളാണു കണ്ടെത്തിയത്. ശക്തിയേറിയ ജലപ്രവാഹം ഉണ്ടായിരുന്നതിന്റെ തെളിവായി ചരലുകളും ചെറിയ ഉരുളന്‍ കല്ലുകളും നീര്‍ത്തടത്തിന്റെ ശേഷിപ്പുകളും മുന്‍പു കണ്ടെത്തിയിരുന്നു.
തടാകങ്ങളെയും നദികളെയും നിലനിര്‍ത്തുന്ന തരത്തിലുള്ള കാലാവസ്ഥയായിരുന്നു ചൊവ്വയില്‍ ഒരിക്കലുണ്ടായിരുന്നത്. ഇത്തരം തടാകങ്ങളുടെ അടിത്തട്ടില്‍ അനേകം ദശലക്ഷം വര്‍ഷങ്ങള്‍കൊണ്ട് അടിഞ്ഞ മണ്ണാണ് ചൊവ്വയിലെ ഷാര്‍പ് പര്‍വതത്തെ രൂപപ്പെടുത്തിയത്. ഈ മലയിലെ പാറകളുടെയും മണ്ണിന്റെയും നൂറുകണക്കിനു പാളികള്‍ ഇതിനു തെളിവാണ്. ഭൂമിയുടേതിനു സമാനമായി നദികളിലെ മണ്ണടിഞ്ഞ് ഉയര്‍ന്നുവന്ന ചെറു തുരുത്തുകള്‍ പിന്നീട് മലകളും പര്‍വതങ്ങളുമായി രൂപമെടുത്തു. ഗേല്‍ ക്രേറ്ററിലെ തടാകം ഒട്ടേറെ തവണ നിറഞ്ഞുകവിയുകയും വറ്റുകയും ചെയ്തു. അഞ്ചു കിലോമീറ്ററോളം ഉയരമുള്ള ഷാര്‍പ് പര്‍വതത്തിന്റ അടിഭാഗത്താണ് ഈ പ്രക്രിയയുടെ തെളിവുകള്‍ കണ്ടെത്തിയത്.
154 കിലോമീറ്ററോളം വ്യാസമുള്ള തടാകത്തിന്റെ ചിത്രവും നാസയ്ക്കു ലഭിച്ചിട്ടുണ്ട്. 2012 മുതല്‍ ക്യൂരിയോസിറ്റി അയച്ച ചിത്രങ്ങള്‍ പരിശോധിച്ചശേഷമാണു ശാസ്ത്രജ്ഞര്‍ ചൊവ്വയെക്കുറിച്ചുള്ള നിഗമനങ്ങളിലെത്തിയത്. ഷാര്‍പ് കൊടുമുടി സംബന്ധിച്ച സമസ്യയും ജലസാന്നിധ്യത്തിന്റെ അടിസ്ഥാനത്തില്‍ ശാസ്ത്രജ്ഞര്‍ വിശദികരിക്കുന്നുണ്ട്. അഞ്ച് കിലോമീറ്ററാണ് ഇതിന്റെ ഉയരം. പല അടുക്കുകളായുള്ള പാറ എക്കല്‍ നിക്ഷേപത്തെ തുടര്‍ന്നാണു രൂപപ്പെട്ടതെന്നാണു വിശദീകരണം. 350 കോടി വര്‍ഷം മുമ്പാണ് ഇതു രൂപപ്പെട്ടതത്രേ.ക്യൂരിയോസിറ്റി മൗണ്ട് ഷാര്‍പില്‍ കൂടുതല്‍ ദൂരം പിന്നിടുമ്പോള്‍ നിര്‍ണായക വിവരങ്ങള്‍ ലഭിച്ചുമെന്നും അശ്വിന്‍ പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha