തെക്കന്‍ ദില്ലിയിലാണ് സംഭവം. തലവേദന മാറ്റാനുള്ള പൂജയെന്ന വ്യാജേന 71 കാരനായ മന്ത്രവാദി പത്ത് വയസ്സുകാരിയെ ബലാത്സംഗം ചെയ്തു. അമ്മയെ മുറിക്ക് പുറത്തുനിര്‍ത്തിയാണ് മന്ത്രിവാദി കുഞ്ഞിനെയും കൊണ്ട് അകത്തുകയറി വാതിലടച്ചത്. കുട്ടിയുടെ നിലവിളി കേട്ടിട്ടും അമ്മ വാതില്‍ തുറക്കാനോ എന്താണ് മുറിക്കകത്ത് നടക്കുന്നതെന്ന് അറിയാനോ ശ്രമിച്ചില്ല എന്നും പറയുന്നു. അയല്‍ക്കാരുടെ നിര്‍ദ്ദേശ പ്രകാരം മന്ത്രവാദം ചെയ്ത് തലവേദന മാറ്റാന്‍ വേണ്ടി മന്ത്രിവാദിക്ക് അരികിലെത്തിയതാണ് ഇവര്‍.

ഗോവിന്ദപുരിയിലെ മന്ത്രവാദിയായ കനു ലാലാണ് പത്ത് വയസ്സുകാരി പെണ്‍കുട്ടിയെ ബലാത്സംഗം ചെയ്തത്. കര്‍മങ്ങള്‍ ചെയ്യാനുണ്ടെന്നും നിങ്ങള്‍ പുറത്ത് കാത്തുനില്‍ക്കൂ എന്നും പറഞ്ഞ് മന്ത്രവാദി കുട്ടിയെയും കൊണ്ട് അകത്തുപോകുകയായിരുന്നു. കുട്ടിയെ പീഡിപ്പിച്ച ശേഷം ഇയാള്‍ സംഭവസ്ഥലത്ത് നിന്നും മുങ്ങി. പുറത്തുവന്ന കുട്ടി വേദനയോടെ അമ്മയോട് വിവരങ്ങള്‍ പറയുകയായിരുന്നു. തുടര്‍ന്ന് ഇരുവരും പോലീസ് സ്‌റ്റേഷനിലെത്തി പരാതി നല്‍കി. കുട്ടിയെ വൈദ്യപരിശോധനയ്ക്ക് വിധേയയാക്കി. വൈദ്യ പരിശോധനനയില്‍ കുട്ടി പീഡനത്തിന് ഇരയായി തെളിഞ്ഞു. തുടര്‍ന്ന് നടത്തിയ അന്വേഷണത്തില്‍ മന്ത്രവാദിയായ കനു ലാലിനെ പോലീസ് പിടികൂടി.