മരിച്ചുപോയ മകളുടെ ആഗ്രഹം സാധിക്കാനായി അമ്മ ഗര്ഭം ധരിക്കുന്നു
കാന്സര് ബാധിച്ച് മരിച്ചുപോയ മകളുടെ ആഗ്രഹം സാധിക്കാനായി 59കാരിയായ അമ്മ ഗര്ഭം ധരിക്കുന്നു. മകളുടെ മകളെ ജനിപ്പിച്ചേ അടങ്ങുവെന്ന തീരുമാനത്തിലാണ് ഈ ബ്രിട്ടീഷ് വനിത.
ദാതാവിന്റെ ബീജവുമായി തന്റെ അണ്ഡം സംയോജിപ്പിച്ച് ഒരു കുഞ്ഞിന് തന്റെ അമ്മ ജന്മമേകണമെന്നത് മരിച്ച് പോയ മകളുടെ അന്ത്യാഭിലാഷമായിരുന്നും അത് നിറവേറ്റാനാണ് താന് തയ്യാറാകുന്നതെന്നും ഇവര് പറഞ്ഞു. മകളുടെ ആഗ്രഹം മാത്രമല്ല ഗ്രാന്റ് പാരന്റ്സ് ആയി മാറാനുള്ള തങ്ങളുടെ ആഗ്രഹം കൂടിയാണിതിലൂടെ സഫലമാകുന്നതെന്ന് ഈ സ്ത്രീയും ഭര്ത്താവും പറയുന്നു. ഇവരുടെ ഏകമകള് നാല് വര്ഷം മുമ്പ് കുടലില് അര്ബുദം ബാധിച്ച് തന്റെ 20 വയസ്സില് മരിക്കുകയായിരുന്നു.
കുട്ടിയുണ്ടാകണമെന്ന ആഗ്രഹത്താല് രോഗം ബാധിച്ചയുടന് മകള് തന്റെ അണ്ഡം ഫ്രീസ് ചെയ്ത് സൂക്ഷിച്ചിരുന്നു. രോഗം കടുത്തപ്പോള് ഈ ദൗത്യം മകള് അമ്മയെ ഏല്പിക്കുകയായിരുന്നു.
എന്നാല് അമ്മയുടെ ആഗ്രഹത്തിന് യുകെയിലെ ഒരു ക്ലിനിക്കും കൂട്ട് നില്ക്കാത്തതിനാല് അമേരിക്കയിലേക്ക് പോകാനാണ് ഇവരുടെ പരിപാടി. 60,000 പൗണ്ട് ചെലവില് ഈ ട്രീറ്റ്മെന്റ് നടത്തിക്കൊടുക്കാമെന്ന് ഇവിടുത്തെ ഒരു ക്ലിനിക്ക് വാഗ്ദാനം ചെയ്തിട്ടുണ്ട്. ഈ പ്രായത്തില് ഈ സ്ത്രീ ഗര്ഭിണിയാകാനുള്ള സാധ്യത വളരെക്കുറവാണെന്നും ഇതോടനുബന്ധിച്ച് നിരവധി അപകടങ്ങള് ഉണ്ടാകാന് സാധ്യതയുണ്ടെന്നുമാണ് ഡോക്ടര്മാര് ഭയപ്പെടുന്നത്. എന്നാല് എന്ത് തന്നെ സംഭവിച്ചാലും മകളുടെ അന്ത്യാഭിലാഷം സഫലമാക്കാനാണീ ദമ്പതികള് തുനിഞ്ഞിറങ്ങിയിരിക്കുന്നത്.
എന്നാല് ദി ഹ്യൂമന് ഫെര്ട്ടിലിറ്റി ആന്ഡ് എംബ്രയോളജി അഥോറിറ്റി( എച്ച്എഫ്ഇഎ) ഇവര്ക്ക് ഇതിനുള്ള അനുമതി ഇനിയും നല്കിയിട്ടില്ല. അതായത് മകളുടെ അണ്ഡം അമേരിക്കയിലേക്കയക്കുന്നതിനെ എച്ച്എഫ്ഇഎ എതിര്ക്കുകയാണ്. അതായത് മകള് ഇതിനുള്ള ലിഖിതാനുമതി മരണസമയത്ത് എഴുതി വച്ചില്ലെന്ന് പറഞ്ഞാണ് ഇതിന് തടസ്സം നില്ക്കുന്നത്. എന്നാല് ഇതിനെ ചോദ്യം ചെയ്തു കൊണ്ട് മാതാപിതാക്കള് കോടതിയെ സമീപിച്ചിട്ടുണ്ട്. മകള് മരിക്കുമ്പോള് തന്റെ ആഗ്രഹം വ്യക്തമായി തങ്ങളെ അറിയിച്ചിരുന്നുവെന്നാണ് അവര് വാദിക്കുന്നത്.
എന്നാല് മകളുടെ കുഞ്ഞിന് ജന്മമേകിയ ബ്രിട്ടനിലെ 62കാരിയായ ആനി കാസെര്ലേ ഈ സ്ത്രീക്ക് പൂര്ണപിന്തുണയുമായി രംഗത്തെത്തിയിട്ടുണ്ട്. മകളുടെ മകള്ക്ക് ജന്മമേകിയ ലോകത്തിലെ ആദ്യത്തെ വനിതകളിലൊരാളാണീ സ്ത്രീ. തന്റെ മകള് എമ്മയ്ക്ക് ശ്വാസകോശത്തിന് രോഗം ബാധിച്ചതിനാല് ആനി ഇതിന് തയ്യാറാവുകയായിരുന്നു. എമ്മ ഇപ്പോഴും ജീവിച്ചിരിക്കുന്നുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha