രേഖകള്‍ തീയിട്ടു നശിപ്പിക്കുന്നതും ഇടിവെട്ടി പോകുന്നതും പിണറായി സര്‍ക്കാരിന്റെ കാര്യത്തില്‍ പുതുമയില്ല. മുമ്പ് എന്‍.എ.ഐ സംഘം സി.സി.ടി.വി ദൃശ്യങ്ങള്‍ ചോദിച്ചപ്പോളാണ് ഇടിവെട്ടി ദൃശ്യങ്ങള്‍ അപ്രതിക്ഷമായത്. ഇതിനും വര്‍ഷങ്ങള്‍ മുമ്പ് ലാവ്‌ലിന്‍ കേസില്‍ സി.ബി.ഐ സെക്രട്ടറിയേറ്റില്‍ പരിശോധനക്ക് എത്തുന്നതിന് മുമ്പും ഇതുപോലൊരു തീപിടിത്തമുണ്ടായ്. ഇതെല്ലാം യാദൃച്ഛികമെന്ന് ഇപ്പോഴും വിശ്വാസിക്കുന്നത് പിണറായി ഭക്തര്‍ മാത്രമായിരിക്കും. ഇതെല്ലാം വേറെ കാര്യം. ഇനി പറയാന്‍ പോകുന്നത് ഇന്നലത്തെ തീ പിടിച്ച ഫയലുകളെ കുറിച്ചാണ്. യു.എ.ഇ കോണ്‍സുലേറ്റിന് ഡിപ്ലോമാറ്റിക് ബാഗേജുകള്‍ക്ക് അനുമതി നല്‍കിയ സെക്രട്ടറിയേറ്റിലെ രേഖകളൊന്നും ഇതുവരെ ഇ ഫയലായിട്ടില്ല. നിരവധി തവണ നല്‍കിയ അനുമതികളെല്ലാം സൂക്ഷിച്ചിരിക്കുന്നത് പേപ്പര്‍ ഫയലുകളിലാണ്. ഇത് സൂക്ഷിച്ചിരുന്നത് ഇന്നലെ തീപിടുത്തം നടന്ന ഓഫീസിലാണ്. നിര്‍ണായക രേഖകള്‍ കത്തിനശിച്ചോ ഇല്ലയോ എന്നതു സംബന്ധിച്ച് അന്വേഷണം നടക്കുകയാണ്. ഈ ഫയലുകള്‍ കത്തിനശിച്ചില്ല എന്നാണ് ഉദ്യോഗസ്ഥര്‍ ഇപ്പോള്‍ പറയുന്നത്.

നയതന്ത്ര ചാനല്‍ വഴിയുള്ള സ്വര്‍ണ്ണക്കടത്തിന്റെ അന്വേഷണവുമായി ബന്ധപ്പെട്ട് വേണ്ടിവരുന്ന ഫയലുകളെല്ലാം സുരക്ഷിതമായി ഒരിടത്ത് സൂക്ഷിച്ചിട്ടുണ്ടെന്നാണ് ഏറ്റവും ഒടുവില്‍ ലഭിക്കുന്ന വിവരം. ആ ഫയലുകള്‍ സൂക്ഷിച്ചിരുന്ന റാക്ക് ഇരുന്നിടത്തു തന്നെയാണ് തീപിടുത്തമുണ്ടായത്. തീ കുറച്ചുകൂടി ആളിപ്പടര്‍ന്ന് മുഴുവന്‍ സ്ഥലത്തേക്ക് വ്യാപിച്ചിരുന്നെങ്കില്‍ ആ ഫയലുകളും നഷ്ടമാകുമായിരുന്നു. ഫയലുകള്‍ ഇപ്പോള്‍ സുരക്ഷിതമാണെന്ന വിവരം പ്രോട്ടോക്കോള്‍ വിഭാഗത്തിലെ ഉദ്യോഗസ്ഥര്‍ റിപ്പോര്‍ട്ടായി മുഖ്യമന്ത്രി അടക്കമുള്ളവര്‍ക്ക് നല്‍കിയിട്ടുണ്ട്. അത് മന്ത്രിസഭാ യോഗത്തില്‍ ചര്‍ച്ചയാകും. സെക്രട്ടേറിയറ്റില്‍ തീപിടുത്തമുണ്ടായാലും പ്രശ്‌നമില്ല, ഇ ഫയലിംഗ് സംവിധാനമാണ് നിലവിലുള്ളത് എന്നതായിരുന്നു ഇന്നലെ മുതല്‍ ഉയര്‍ന്നു വന്ന ഒരു പ്രധാന വാദം. തീ പിടുത്തം സംബന്ധിച്ച പ്രതിപക്ഷത്തിന്റെ ആരോപണങ്ങളെയടക്കം ഖണ്ഡിക്കാന്‍ ഈ വാദമാണ് പലരും ഉപയോഗിച്ചത്. എന്നാല്‍, ഡിപ്ലോമാറ്റിക് ബാഗേജുകള്‍ക്ക് അനുമതി നല്‍കിയ ഫയലുകളുടെ കാര്യത്തില്‍ ഇത് പൂര്‍ണ്ണമായും തെറ്റാണ്. സ്വര്‍ണ്ണക്കടത്തുമായി ബന്ധപ്പെട്ട് എന്‍ഐഎ അടക്കം ഊര്‍ജിതമായി അന്വേഷണം നടത്തുമ്പോഴും ഈ രേഖകളൊന്നും ഇ ഫയലായിട്ടില്ല. ഈ രേഖകള്‍ ഹാജരാക്കണമെന്ന് എന്‍ഐഎ നേരത്തെ ആവശ്യപ്പെട്ടിരുന്നതാണ്. ഒരു സെറ്റ് രേഖകള്‍ പ്രോട്ടോക്കോള്‍ ഓഫീസര്‍ എന്‍ഐഎയ്ക്ക് കൈമാറുകയും അവര്‍ അത് കൈപ്പറ്റിയതിന്റെ രസീത് തിരികെ നല്‍കുകയും ചെയ്തിട്ടുണ്ട്.

ഒരു സുപ്രധാന രേഖയും കത്തിനശിച്ചിട്ടില്ല എന്ന് തന്നെയാണ് സര്‍ക്കാര്‍ നല്‍കുന്ന വിവരം. ഉടന്‍ തന്നെ ഇതു സംബന്ധിച്ച് കൂടുതല്‍ വ്യക്തതത കൈവരും. എന്നാല്‍, ഡിപ്ലോമാറ്റിക് ബാദോജുകളുമായി ബന്ധപ്പെട്ട രേഖകളൊന്നും ഇതുവരെ ഇ ഫയലാക്കിയിട്ടില്ല എന്നതും ശ്രദ്ധേയമായ വസ്തുതയാണ്. സെക്രട്ടറിയേറ്റിലെ തീപിടിത്തത്തെ കുറിച്ച് പ്രത്യേക സംഘം തെളിവെടുപ്പ് തുടങ്ങി. എസ് പി അജിത്തിന്റെ നേതൃത്വത്തിലാണ് പരിശോധന. ഫൊറന്‍സിക് സംഘവും സെക്രട്ടറിയേറ്റിലെ പരിശോധനയില്‍ പങ്കെടുക്കുന്നുണ്ട്. ചീഫ് സെക്രട്ടറി നിയോഗിച്ച പ്രത്യേക സംഘവും സ്ഥലത്ത് പരിശോധന നടത്തുന്നു. ഉദ്യോഗസ്ഥ സംഘവും പോലീസും ഉടന്‍ അന്വേഷണ റിപ്പോര്‍ട്ട് നല്‍കും. എഡിജിപി മനോജ് എബ്രഹാം സെക്രട്ടറിയേറ്റില്‍ എത്തി. തീപിടിത്തം വന്‍ വിവാദമായതോടെയാണ് സര്‍ക്കാര്‍ അന്വേഷണം പ്രഖ്യാപിച്ചത്. ലോക്കല്‍ പോലീസില്‍ നിന്നും രാത്രി തന്നെ അന്വേഷണം എഡിജിപി മനോജ് എബ്രഹാമിന്റെ നേതൃത്വത്തിലുള്ള പ്രത്യേക സംഘത്തെ ഏല്പിച്ചു. ഒപ്പം ദുരന്ത നിവാരണവിഭാഗം കമ്മീഷണര്‍ എ കൗശികന്റെ നേതൃത്വത്തിലെ ഉദ്യോഗസ്ഥ സംഘത്തെയും നിയോഗിച്ചിട്ടുണ്ട്. പോലീസ് സംഘം സെക്രട്ടറിയേറ്റില്‍ ഇന്നലെയെത്തി പരിശോധന നടത്തിയിരുന്നു. എഡിജിപി മനോജ് എബ്രഹാമും ഐജി പി വിജയനും ഇന്ന് സെക്രട്ടറിയേറ്റിലെത്തി പരിശോധന നടത്തി.