സി.പി.എമ്മിന്റെ ബോംബ് നിര്മാണം തദ്ദേശ തെരഞ്ഞെടുപ്പ് ലക്ഷ്യമാക്കിയുള്ളത്; കതിരൂരിലെ ബോംബ് സ്ഫോടനം യാദൃച്ഛികമല്ല; സി.പി.എമ്മിനെതിരെ ഗുരുതര ആരോപണവുമായി ആര്.എം.പി നേതാവ് കെ.കെ രമ; പൊട്ടിത്തെറിയില് പരുക്കേറ്റ ടി.പി വധക്കേസ് പ്രതി രമീഷിന് കൊടി സുനിയുമായി അടുത്ത ബന്ധം
തലശ്ശേരിയിലെ കതിരൂര് പൊന്ന്യംചൂള റോഡിലുണ്ടായ ബോംബ് സ്ഫോടനം യാദൃച്ഛികമല്ലെന്ന വാദവുമായി ആര്.എം.പി നേതാവും ടി.പി ചന്ദ്രശേഖരന്റെ വിധവയുമായ കെ.കെ രമ രംഗത്ത്. സി.പി.എം ബോംബുണ്ടാക്കുന്നത് തദ്ദേശ സ്വയം ഭരണസ്ഥാപനങ്ങളിലെ തെരഞ്ഞെടുപ്പ് അടുത്ത സാഹചര്യത്തിലാണെന്ന ഗുരുതര ആരോപണമാണ് കെ.കെ രമ തന്റെ ഫെയ്സ്ബുക്ക് പോസ്റ്റിലൂടെ ഉന്നയിക്കുന്നത്. ബോംബ് നിര്മാണത്തിടെയുണ്ടായ അപകടത്തില് പരുക്കേറ്റ ടി.പി വധക്കേസിലെ പ്രതിയായിരുന്ന രമീഷാണ്. ഇയാള്ക്ക് കൊടി സുനിയുമായി അടുത്ത ബന്ധമാണുള്ളതെന്ന് എല്ലാവര്ക്കും അറിയാവുന്ന വസ്തുതയാണെന്നും രമ പറഞ്ഞു.
ബോംബ് നിര്മാണത്തില് സി.പി.എമ്മിന്റെ പങ്ക് നേരത്തെ തന്നെ ബി.ജ.പിയും കോണ്ഗ്രസും ഉന്നയിച്ചിരുന്നു. അപകടത്തില് രണ്ട് സി.പി.എം പ്രവര്ത്തകര്ക്കാണ് പരുക്കേറ്റത്. കണ്ണൂര് കലക്ടര് ടി വി സുഭാഷ് വിളിച്ചു ചേര്ത്ത സര്വകക്ഷി സമാധാന യോഗത്തിന്റെ മഷിയുണങ്ങും മുന്പെ സിപിഎം കേന്ദ്രത്തില് ബോംബ് നിര്മാണത്തിനിടെ പൊട്ടിത്തെറിച്ച് സംഭവം രാഷ്ട്രീയ ആയുധമാക്കുകയാണ് ബിജെപിയും കോണ്ഗ്രസും. പരിക്കേറ്റവര് ഡി.വൈ.എഫ്.ഐ പ്രവര്ത്തകരാണെന്ന് പോലീസും കണ്ടെത്തിട്ടുണ്ട്. ഈ സാഹചര്യത്തിലാണ് സി.പി.എമ്മിനെതിരെ ഗുരുതമായ ആരോപണവുമായി കെ.കെ രമയും രംഗത്ത് വരുന്നത്.
കെ.കെ രമയുടെ ഫെയ്സ്ബുക്ക് പോസ്റ്റ് ഇങ്ങനെ
കേരള രാഷ്ട്രീയം രക്തപങ്കിലമാവുന്നതിന്റെ വാര്ത്തകള് വീണ്ടും വീണ്ടും വരുന്നു. കണ്ണൂര് ജില്ലയിലെ പൊന്ന്യത്ത് ബോംബ് നിര്മ്മാണത്തിനിടയില് സ്ഫോടനം നടക്കുകയും ഗുരുതരമായി പരിക്കേറ്റ് മൂന്ന് യുവാക്കളെ ആശുപത്രിയില് പ്രവേശിപ്പിക്കുകയും ചെയ്തിരിക്കുന്നു. അതിലൊരാള് ടി.പി.വധക്കേസ് പ്രതിയായിരുന്ന അഴിയൂര് സ്വദേശി രമീഷാണ്. ടിപി വധക്കേസിലെ ഇരുപത്തിനാലാം പ്രതിയായിരുന്ന രമീഷിനെ കോടതി വെറുതെ വിട്ടിരുന്നു. പക്ഷേ കൊടി സുനിയുമായി വളരെ അടുത്ത ബന്ധം പുലര്ത്തിയിരുന്നു രമീഷ് എന്ന് നാട്ടുകാര്ക്കറിയാവുന്ന വസ്തുതയാണ്. സംശയത്തിന്റെ ആനുകൂല്യം കൊണ്ടും തെളിവുകളുടെ അഭാവത്തിലും ശിക്ഷയില് നിന്ന് ഒഴിവായിപ്പോയവര് സമാധാനത്തിന്റെ വെള്ളരിപ്രാവുകളായിരുന്നില്ലെന്ന വസ്തുതയാണ് ഈ സംഭവത്തിലൂടെ തെളിയുന്നത്. അത് പോലെ തലശ്ശേരി യിലെ പൊതുപ്രവര്ത്തകനായ സി ഒ ടി നസീറിനെ വധിക്കാന് ശ്രമിച്ച കേസിലെ പ്രതിയും ബോബു സ്ഫോടനത്തില് ഉള്പെട്ടിരുക്കുന്നു എന്ന വാര്ത്തകളും പുറത്തു വരുന്നു.
തലശ്ശേരി മേഖലയിലെ പാര്ട്ടി ഗ്രാമത്തിലെ ബോംബ് നിര്മ്മാണ കേന്ദ്രത്തില് വച്ച് ഒഞ്ചിയം ഏരിയയിലെ അഴിയൂര് പഞ്ചായത്തിലെ സി.പി.എം പ്രവര്ത്തകന് അപകടത്തില് പെട്ടത് നല്കുന്ന യാദൃച്ഛികമാവാനിടയില്ല. തദ്ദേശ ഭരണ തെരഞ്ഞെടുപ്പ് അടുത്തിരിക്കുന്ന സാഹചര്യത്തില് പരാജയ ഭീതി പൂണ്ട ഒഞ്ചിയം മേഖലയോടുള്ള പ്രതികാര ബുദ്ധിയില് ചിലത് ആസൂത്രണം ചെയ്യപ്പെടുന്നു എന്ന് വേണം സംശയിക്കാന്. സംസ്ഥാന ഭരണമേറ്റെടുത്ത് കാലാവധി തീരാറായിട്ടും ഒഞ്ചിയം മേഖലയിലെ നഷ്ടപ്പെട്ട ജനസ്വാധീനം തിരിച്ചു പിടിക്കാന് സിപിഎമ്മിനായിട്ടില്ല. സംഘര്ഷങ്ങളും ഭീഷണികളും കലാപങ്ങളും പ്രലോഭനങ്ങളും കൊണ്ട് ഇക്കാലമത്രയും കിണഞ്ഞു ശ്രമിച്ചിട്ടും ഒഞ്ചിയത്ത് ഒന്നുമാവാന് കഴിയാത്തതിന്റെ ജാള്യത സി.പിഎമ്മിനെ നെ ബാധിക്കുന്നുണ്ട്. അതുകൊണ്ടാണ് കേരളത്തിലേതെങ്കിലും വാര്ഡിലെ ഉപതെരഞ്ഞെടുപ്പ് വിജയം പോലും ഒഞ്ചിയം മേഖലയിലെ ആര്.എം.പി സഖാക്കള്ക്ക് നേരെ ആക്രമണമഴിച്ചു വിടാന് സി.പി,എമ്മുകാരെ പ്രേരിപ്പിക്കുന്നത്. കൂടാതെ സംസ്ഥാനം മുഴുവന് കലാപം ഉണ്ടാക്കാനുള്ള ആസൂത്രിത നീക്കമാണോ എന്നും സംശയിക്കേണ്ടിയിരിക്കുന്നു. 30-35 വയസ്സു പ്രായമുള്ള ചെറുപ്പക്കാരെക്കൊണ്ട് ബോംബുണ്ടാക്കിച്ചും എതിരാളികളുടെ മുഖത്തു വെട്ടിക്കൊല്ലിച്ചും ഇവര് ഈ നാടിനെ നയിക്കുന്നതെങ്ങോട്ടാണ് ?അമ്മമാരുടെയും അനാഥരായ കുഞ്ഞുങ്ങളുടെയും കണ്ണീരെന്നാണ് തോരുക. ? എന്നാണ് രമ ഫെയ്സ്ബുക്ക് പോസ്റ്റില് ചോദിക്കുന്നത്.
https://www.facebook.com/Malayalivartha