കാസര്‍കോഡ് നീലേശ്വരത്തിനടുത്ത് പടന്നക്കാട്ടും ചുറ്റുവട്ടങ്ങളിലും തിരഞ്ഞെടുപ്പുകാലമാകുമ്പോള്‍ തമാശയും ചര്‍ച്ചാ വിഷയവുമായി പടന്നക്കാട് ഒഴിഞ്ഞവളപ്പിലെ കെ.പി.അബ്ദുല്‍ ഖാദര്‍ ഹാജിയുടെ സ്ഥാനാര്‍ഥിത്വത്തിന്റെ കഥ പരക്കും. ഹാജി. മരിച്ചിട്ട് വര്‍ഷം 24 കഴിഞ്ഞെങ്കിലും ഇന്നും സജീവമാണ് ഹാജിയുടെ സ്ഥാനാര്‍ഥിത്വത്തിന്റെ കഥ.

പഞ്ചായത്ത് തിരഞ്ഞെടുപ്പില്‍ സ്ഥാനാര്‍ഥിയാക്കാന്‍ ആളുകള്‍ തേടി വരുന്നുവെന്ന വിവരം കിട്ടിയ പാടെ ഇദ്ദേഹം ഓടിട്ട വീടിന്റെ മച്ചില്‍ കയറി ഒളിക്കുകയായിരുന്നു. ഒളിച്ചും ഒഴിഞ്ഞു മാറിയും ഏറെക്കാലം തുടരാന്‍ ഇദ്ദേഹത്തിനായില്ല. നാട്ടുപ്രമാണിയായിരുന്ന ഒ.വി.ചിണ്ടന്‍, ഒ.വി.ഉത്തമന്‍, ചെറിയകണ്ടം കുഞ്ഞിരാമന്‍, പുതിയകണ്ടം കോമന്‍, പി.കുഞ്ഞഹമ്മദ് എന്നിവരുടെയും നാട്ടുകാരുടെയും നിര്‍ബന്ധത്തിനു വഴങ്ങി പിന്നീടു മത്സരിക്കേണ്ടി വന്നു.

കാഞ്ഞങ്ങാട് പഞ്ചായത്ത് ആയിരുന്നു അക്കാലത്ത്. കരുവളം, പടന്നക്കാട്, ഒഴിഞ്ഞവളപ്പ് പ്രദേശങ്ങളെല്ലാം ഒരൊറ്റ വാര്‍ഡില്‍ ആയിരുന്നു. ഈ വാര്‍ഡില്‍ സ്ഥാനാര്‍ഥിയാക്കാനാണ് ഇദ്ദേഹത്തെ അന്വേഷിച്ചെത്തിയത്. നിര്‍ബന്ധത്തിനു വഴങ്ങിയാണെങ്കിലും മല്‍സരിച്ച് വിജയിക്കുകയും ചെയ്തു. പഞ്ചായത്ത് അംഗമായിരിക്കെ കരുവളം തോടിനു മരപ്പാലം നിര്‍മിച്ചതാണ് പ്രദേശത്തെ ആദ്യത്തെ വികസന പ്രവര്‍ത്തനം. നടപ്പാലം പണിയാന്‍ ഇദ്ദേഹം നടത്തിയ ഇടപെടലുകള്‍ അന്ന് ഏറെ പ്രശംസിക്കപ്പെട്ടിരുന്നു.

കാഞ്ഞങ്ങാട് പഞ്ചായത്ത് പിന്നീട് നഗരസഭയായപ്പോള്‍ നികുതി വര്‍ധന പാവങ്ങള്‍ക്കു താങ്ങാനാകില്ലെന്നു പറഞ്ഞ് പടന്നക്കാട് കേന്ദ്രീകരിച്ചു പഞ്ചായത്ത് രൂപീകരിക്കാന്‍ കര്‍മസമിതി രൂപീകരിച്ച് ഹൈക്കോടതിയില്‍ റിട്ട് ഹര്‍ജി സമര്‍പ്പിച്ചെങ്കിലും തള്ളിപ്പോയതും ചരിത്രം. ഇതേ കാഞ്ഞങ്ങാട് നഗരസഭയില്‍ പടന്നക്കാട് വാര്‍ഡിനെ പ്രതിനിധീകരിച്ച് ഇദ്ദേഹത്തിന്റെ മകന്‍ ഇ.കെ.കെ.പടന്നക്കാട് പിന്നീട് കൗണ്‍സിലര്‍ ആയി.