പ്രിവിലേജസ് ആന്ഡ് എത്തിക്സ് സമിതി ഒരു മന്ത്രിയേയും ശിക്ഷിച്ച ചരിത്രമില്ല, നിയമസഭ ശിക്ഷിച്ചിട്ടുള്ളത് പി.സി. ജോര്ജിനെയും രണ്ട് പത്രാധിപന്മാരെയും
കേരള നിയമസഭയുടെ ചരിത്രത്തില് പ്രിവിലേജസ് ആന്ഡ് എത്തിക്സ് സമിതി ഒരു മന്ത്രിയേയും ശിക്ഷിച്ചിട്ടില്ല. ഒരു മന്ത്രിക്കുമെതിരേ ഇതിനു മുമ്പ് സമിതിക്കു മുന്നില് പരാതി എത്തിയിട്ടുമില്ല. അവകാശലംഘനത്തിന് ശിക്ഷിക്കപ്പെട്ടിട്ടുള്ള അംഗം പി.സി. ജോര്ജ് മാത്രം. കഴിഞ്ഞ നിയമസഭയില് ജോര്ജ് ശാസിക്കപ്പെട്ടത് കെ.ആര്. ഗൗരിയമ്മയ്ക്കെതിരേ മോശം പരാമര്ശം നടത്തിയതിനാണ്.
ഉദ്യോഗസ്ഥര്ക്കെതിരേ പലവട്ടം അവകാശലംഘനം തെളിയിക്കപ്പെട്ടിട്ടുണ്ടെങ്കിലും മാപ്പുപറഞ്ഞ് രക്ഷപ്പെട്ടിട്ടുണ്ട്. അതിനു പുറമേ സഭയുടെ ശാസന ഏറ്റുവാങ്ങിയിട്ടുള്ളത് രണ്ടു പത്രാധിപന്മാരാണ്.
എന്നാല്, ലോക്സഭയിലെ പ്രിവിലജസ് കമ്മിറ്റിയുടെ നടപടികള് ഇന്ത്യയുടെ ചരിത്രത്തില് ഇന്നും പ്രസക്തമാണ്. ഇന്ദിരാ ഗാന്ധിയെ പുറത്താക്കാനും ശിക്ഷിക്കാനും തീരുമാനിച്ചത് പ്രിവിലജസ് കമ്മിറ്റിയായിരുന്നു.
നിയമസഭയുടെ പ്രിവിലജസ് കമ്മിറ്റി കേരളത്തില് ആദ്യമായി അവകാശലംഘനത്തിന് ശിക്ഷിച്ചത് 'തനിനിറം' പത്രാധിപരായിരുന്ന കലാനിലയം കൃഷ്ണന്നായരെയാണ്. ഇന്ത്യ-പാക് യുദ്ധം നടന്ന 1974-75 കാലഘട്ടത്തില് നിയമസഭയില് അടിയന്തരപ്രമേയത്തിന് അനുമതി നിഷേധിച്ചതുമായി ബന്ധപ്പെട്ട് എഴുതിയ മുഖപ്രസംഗമായിരുന്നു ശിക്ഷയ്ക്ക് ആധാരം. അന്ന് സ്പീക്കറായിരുന്ന മൊയ്തീന്കുട്ടി ഹാജിയെ മോശമായി പരാമര്ശിച്ച്, 'സ്പീക്കറുടെ കൂറ് എവിടെ?' എന്ന പേരിലായിരുന്നു മുഖപ്രസംഗം. തുടര്ന്ന്, കൃഷ്ണന്നായരെ നിയമസഭയില് വിളിച്ചുവരുത്തി പരസ്യമായി ശാസിച്ചു. അടുത്തദിവസം 'തനിനിറം പത്രാധിപര് നിയമസഭയില്' എന്നു വാര്ത്ത കൊടുത്തായിരുന്നു കൃഷ്ണന്നായരുടെ മറുപടി.
പാലക്കാട് സ്വദേശി പത്രാധിപരായിരുന്ന എം.വി. ചെറുവത്തിനെയും പാലക്കാട് എം.എല്.എയായിരുന്ന സി.എം. സുന്ദരത്തെ കൈയേറ്റം ചെയ്തെന്ന പേരില് സഭ ശാസിച്ചിട്ടുണ്ട്. ചെറുവത്തിനെതിരേ സാക്ഷിമൊഴിയില്ലായിരുന്നെങ്കിലും എം.എല്.എയുടെ വാദം പരിഗണിച്ച് ശിക്ഷിക്കുകയായിരുന്നു. നിയമസഭാ ചട്ടപ്രകാരം കടുത്ത ശിക്ഷാനടപടികള്ക്ക് എത്തിക്സ് കമ്മിറ്റിക്ക് അധികാരമില്ല. താക്കീത് നല്കാനേ സാധിക്കൂ.
https://www.facebook.com/Malayalivartha
