മന്ത്രിസഭയില് മുഖ്യമന്ത്രിയും 21 മന്ത്രിമാരും? വകുപ്പുകള് വിട്ടു നല്കില്ലെന്ന് സി.പി.ഐ; ഒറ്റയംഗങ്ങളുള്ള കക്ഷികളെക്കൂടി ഉള്പ്പെടുത്താന് ടേം വ്യവസ്ഥയില് മന്ത്രിസ്ഥാനം; കേരള കോണ്ഗ്രസിന് ഒരു മന്ത്രിസ്ഥാനും ചീഫ് വിപ്പു സ്ഥാനവും
രണ്ടാം പിണറായി സര്ക്കാരില് ആരൊക്കെ മന്ത്രിമാര് ആകുമെന്നും എത്ര മന്ത്രിമാര് ഉണ്ടാകുമെന്ന സസ്പെന്സ് തുടരുകയാണ്. എല്.ഡി.എഫിനുള്ളില് മന്ത്രിസ്ഥാനം സംബന്ധിച്ച് ഉഭയകക്ഷി ചര്ച്ചകള് അന്തിമഘട്ടത്തില് എത്തിട്ടും ഇതില് ഒരു തീരുമാനവും ആയിട്ടില്ല. 20ന് മന്ത്രിസഭയുടെ സത്യപ്രതിജ്ഞ ചടങ്ങളുകള് പ്രഖ്യാപിച്ചിട്ടുണ്ട്. ഇതിന്റെ ഒരിക്കവും തിരുവനന്തപുരം സെന്ട്രല് സ്റ്റേഡിയത്തില് പുരോഗമിക്കുകയാണ്. ഈ സാഹചര്യത്തില് 18 ന് എങ്കിലും മന്ത്രിമാര് ആരൊക്കെ എന്ന പ്രഖ്യാപിക്കാനുള്ള ചര്ച്ചകളാണ് പുരോഗമിക്കുന്നത്.
മന്ത്രിമാരുടെ എണ്ണം പരമാവധി 21 ആക്കി ഒറ്റയംഗങ്ങളുള്ള കക്ഷികളെക്കൂടി ഉള്പ്പെടുത്താമെന്ന നിലപാടില് സി.പി.ഐ.ക്കും സി.പി.എമ്മിനും എതിര്പ്പില്ലെന്നാണ് അറിയുന്നത്. അങ്ങനെ എങ്കില് മുഖ്യമന്ത്രി ഉള്പ്പെടെ 22 മന്ത്രിസ്ഥാനങ്ങള് ഉണ്ടാകും. അങ്ങനെയായാലും രണ്ടുകക്ഷികള്ക്കുമാത്രമേ മന്ത്രിസ്ഥാനം നല്കാനാകൂ. ഒറ്റയംഗങ്ങളുള്ള അഞ്ചുകക്ഷികള് എല്.ഡി.എഫിലുണ്ട്.
ഒന്നുകില്, ഇവര്ക്ക് ടേം അടിസ്ഥാനമാക്കി മന്ത്രിസ്ഥാനം പങ്കുവെക്കണം. അല്ലെങ്കില് ഏതെങ്കിലും മൂന്നുകക്ഷികളെ മാറ്റിനിര്ത്തണം. ഇക്കാര്യത്തില് എന്തു നിലപാട് സ്വീകരിക്കണമെന്ന് സി.പി.എം. ധാരണയാക്കിയശേഷം ഞായറാഴ്ച വീണ്ടും സി.പി.ഐ.യുമായി ചര്ച്ചനടത്തും. ജനാധിപത്യ കേരളാ കോണ്ഗ്രസിന്റെ ആന്റണി രാജുവിനും ഐഎന്എല്ലിന്റെ അഹമ്മദ് ദേവര്കോവില് എന്നിവരെ ടേം വ്യവസ്ഥയില് മന്ത്രി സ്ഥാനം നല്കുന്നത് എല്.ഡി.എഫിന്റെ പരിഗണനയില് ഉണ്ട്. പക്ഷേ ഇതിനോട് ഈ കക്ഷികള് എങ്ങനെ പ്രതികരിക്കുമെന്ന് ഉറപ്പില്ല.
അതേസമയം നാലുമന്ത്രിമാരും ഡെപ്യൂട്ടി സ്പീക്കര് സ്ഥാനവും എന്ന നിര്ദേശം സി.പി.ഐ. അംഗീകരിച്ചു. ചീഫ് വിപ്പ് സ്ഥാനം വിട്ടുനല്കും. എന്നാല്, പ്രധാന വകുപ്പുകള് വിട്ടുനല്കാനാകില്ലെന്ന നിലപാടിലാണ് അവരുള്ളത്. മുഖ്യമന്ത്രി പിണറായി വിജയനും സി.പി.എം. പൊളിറ്റ് ബ്യൂറോ അംഗം കോടിയേരി ബാലകൃഷ്ണനും സി.പി.ഐ. സംസ്ഥാന സെക്രട്ടറി കാനം രാജേന്ദ്രനുമായി നടത്തിയ രണ്ടാംഘട്ട ചര്ച്ചയിലാണ് തീരുമാനം.
പുതിയ കക്ഷികള് ഉള്ളതിനാല് ചില വകുപ്പുകളിലെ മാറ്റം സി.പി.ഐ.യും അംഗീകരിക്കുന്നുണ്ട്. എന്നാല്, നേരത്തേ കൈയിലുണ്ടായിരുന്ന റവന്യൂ, കൃഷി, സിവില് സപ്ലൈസ് വകുപ്പുകളൊന്നും വിട്ടുനല്കാനാകില്ലെന്ന നിലപാടിലാണവര്. മന്ത്രിമാരെ നിശ്ചയിക്കുന്നതടക്കമുള്ള കാര്യങ്ങള്ക്ക് സി.പി.ഐ. നേതൃയോഗങ്ങള് 18-നു ചേരും. രാവിലെ 10.30-ന് സംസ്ഥാന എക്സിക്യൂട്ടീവ് യോഗവും ഉച്ചയ്ക്ക് സംസ്ഥാന കൗണ്സിലുമാണ് ചേരുക.
17-നു ചേരുന്ന മുന്നണിയോഗത്തിനുമുമ്പായി ഒരുതവണകൂടി കേരള കോണ്ഗ്രസുമായി ചര്ച്ചയുണ്ടാകും. ഒരു മന്ത്രിസ്ഥാനവും ചീഫ് വിപ്പ് സ്ഥാനവും അവര്ക്ക് നല്കും. രണ്ടാംവട്ട ചര്ച്ചയിലാകും ധാരണയാകുക. കൃഷിവകുപ്പ് ലഭിക്കണമെന്ന ആഗ്രഹം കേരള കോണ്ഗ്രസിനുണ്ട്. അതിനാണ് സി.പി.ഐ.യുമായുള്ള ചര്ച്ചയില് വകുപ്പുകൈമാറ്റം സംബന്ധിച്ച നിര്ദേശം സി.പി.എം. മുന്നോട്ടുവെച്ചത്. സി.പി.എമ്മിന്റെ കൈവശമുള്ള പൊതുമരാമത്തുവകുപ്പ് ഇവര്ക്ക് നല്കിയേക്കുമെന്നു സൂചനയുണ്ട്.
കേരള കോണ്ഗ്രസ് (ബി), ജനാധിപത്യ കേരള കോണ്ഗ്രസ് എന്നിവര്ക്ക് മന്ത്രിസ്ഥാനം നല്കാനുള്ള ആലോചനയുണ്ട്. ഐ.എന്.എലിനും പരിഗണന നല്കണമെന്ന് സി.പി.എം. നേതാക്കള്ക്കുണ്ട്. ലോക് താന്ത്രിക് ജനതാദള്, കോണ്ഗ്രസ് (എസ്) എന്നിവയാണ് മറ്റുരണ്ട് ഒറ്റയംഗ കക്ഷികള്. ഇവര്ക്ക് നല്കുന്ന സ്ഥാനങ്ങളെന്തായിരിക്കണമെന്നതിലും സി.പി.എമ്മില് ഉടന് ധാരണയുണ്ടാക്കും.
https://www.facebook.com/Malayalivartha