വാതുവെപ്പ്‌ ഹര്‍ഭജനിലേക്കും, ഇന്ന് ചോദ്യം ചെയ്‌തേക്കും; റെയ്‌നയുള്‍പ്പെടെ 10 താരങ്ങള്‍ നിരീക്ഷണത്തില്‍; ശ്രീനിവാസന്റെ രാജി ആവശ്യപ്പെട്ട്‌ സിന്ധ്യ രംഗത്ത്‌
വാതുവെപ്പുമായി ബന്ധപ്പെട്ട്‌ ഹര്‍ഭജന്‍ സിംഗിനേയും മറ്റു മൂന്നുപേരേയും മുംബൈ ക്രൈംബ്രാഞ്ച്‌ ചോദ്യം ചെയ്‌തേക്കും. ഐ.പി.എല്ലില്‍ മുബൈയുടെ താരമാണ്‌ ഹര്‍ഭജന്‍ സിംഗ്‌. മറ്റു മൂന്നു പേര്‍ ചെന്നൈ താരങ്ങളാണ്‌. അറസ്റ്റിലായ ഗുരുനാഥ്‌ മെയ്യപ്പനുമായി അടുത്ത ബന്ധമാണ്‌ ഇവര്‍ക്കുള്ളത്‌. ഇവരെ കൂടാതെ ചെന്നൈയിലെ ഒരു ഹോട്ടല്‍വ്യവസായിയോട്‌ ചോദ്യം ചെയ്യലിനായി ഹാജരാകാനും ക്രൈംബ്രാഞ്ച്‌ ആവശ്യപ്പെട്ടിട്ടുണ്ട്‌. അതിനിടെ യു.പിയില്‍ നിന്നുള്ള പത്ത്‌ താരങ്ങള്‍ പോലീസ്‌ നിരീക്ഷണത്തിലാണ്‌. സുരേഷ്‌ റൈന, പിയൂഷ്‌ ചൗള, ആര്‍.പി സിംഗ്‌,പ്രവീണ്‍ കുമാര്‍, ഭുവനേശ്വര്‍ കുമാര്‍ എന്നീ ദേശീയ താരങ്ങളും ഇതില്‍ ഉള്‍പ്പെടുന്നു.
അതേസമയം ചാമ്പ്യന്‍സ്‌ ട്രോഫിക്കായി ടീം ഇന്ത്യ ഇംഗ്ലണ്ടിലേക്ക്‌ തിരിക്കുന്നതിന്‌ മുന്‍പ്‌ നടത്തിയ വാര്‍ത്താസമ്മേളനത്തില്‍ ക്യാപ്‌റ്റന്‍ മഹേന്ദ്രസിംഗ്‌ ധോണി ഒന്നും മിണ്ടിയില്ല. വാതുവെപ്പുമായി ബന്ധപ്പെട്ട്‌ മാധ്യമപ്രവര്‍ത്തകര്‍ ആവര്‍ത്തിച്ചു ചോദ്യങ്ങള്‍ ചോദിച്ചിട്ടും ധോണി ഒരക്ഷരം പറഞ്ഞില്ല. വിവാദ വിഷയങ്ങളില്‍ അഭിപ്രായം പറയരുതെന്ന്‌ ബി.സി.സി.ഐ ധോണിയോട്‌ നിര്‍ദേശിച്ചതായാണ്‌ സൂചന. ധോണി ക്യാപ്‌റ്റനായ ഐപിഎല്‍ ടീമായ ചെന്നൈ സൂപ്പര്‍ കിംഗ്‌സിന്റെ ഉടമകള്‍ക്കെതിരെ വാതുവെയ്‌പ്‌ ആരോപണമുയര്‍ന്നിരുന്നു. അറസ്റ്റിലായ ഗുരുനാഥ്‌ മെയ്യപ്പന്‍ ചെന്നൈ ടീമിന്റെ സി.ഇ.ഒ ആണ്‌. ധോണിയുടെ ഭാര്യ സാക്ഷിയുടെ പേരിലും ആരോപണങ്ങള്‍ ഉണ്ട്‌. പോലീസ്‌ അറസ്റ്റ്‌ ചെയ്‌ത വാതുവെയ്‌പുകാരന്‍ വിന്ദൂ ധാരാ സിംഗിനൊപ്പം ഗാലറിയില്‍ കളി കാണാനിരിക്കുന്ന സാക്ഷിയുടെ ചിത്രങ്ങളാണ്‌ അവരെയും വിവാദത്തിലേക്ക്‌ വലിച്ചിട്ടത്‌.
അതിനിടെ ബി.സി.സി.ഐ പ്രസിഡന്റ്‌ എന്‍. ശ്രീനിവാസന്റെ രാജി ആവശ്യപ്പെട്ട്‌ കേന്ദ്ര ഊര്‍ജ മന്ത്രിയും ബോര്‍ഡ്‌ അംഗവുമായ ജ്യോതിരാദിത്യ സിന്ധ്യ രംഗത്തെത്തി. ബന്ധുക്കള്‍ക്കള്‍ അന്വേഷണം നേരിടുന്ന പശ്ചാത്തലത്തില്‍ ശ്രീനിവാസന്‍ ബോര്‍ഡിന്റെ തലപ്പത്ത്‌ തുടരുന്നത്‌ ശരിയല്ലെന്നാണ്‌ സിന്ധ്യ ചുണ്ടിക്കാട്ടുന്നത്‌. അറസ്റ്റിലായ ഗുരുനാഥ്‌ മെയ്യപ്പന്‍ ശ്രീനിവാസന്റെ മരുമകനാണ്‌. അതിനാല്‍ തന്നെ രാജിവെക്കാന്‍ ശ്രീനിവാസനുമേല്‍ ശക്തമായ സമ്മര്‍ദ്ദമാണുള്ളത്‌. എന്നാല്‍ മരുമകന്‍ അറസ്‌റ്റിലായതിന്‌ താന്‍ രാജിവയ്‌ക്കേണ്ടതില്ലെന്നാണ്‌ ശ്രീനിവാസന്റെ വാദം.
https://www.facebook.com/Malayalivartha
