ഇന്ത്യന്‍ പ്രീമിയര്‍ ലീഗില്‍ ടീമുകളുടെ എണ്ണം 10 ആക്കി ഉയര്‍ത്താന്‍ ഇന്ത്യന്‍ ക്രിക്കറ്റ്​ കണ്‍ട്രോള്‍ ബോര്‍ഡ്​ (ബി.സി.സി.ഐ) തീരുമാനം. വ്യാഴാഴ്ച നടക്കുന്ന വാര്‍ഷിക ജനറല്‍ ബോഡി യോഗത്തില്‍ ഇതിന്​ അംഗീകാരം ലഭിക്കും. എന്നാല്‍ അടുത്ത സീസണില്‍ എട്ട്​ ടീമുകളെ വെച്ച്‌​ തന്നെയാകും ടൂര്‍ണമെന്‍റ്​ നടക്കുക. 2022 സീസണിലായിരിക്കും രണ്ട്​ പുതിയ ​ഫ്രാ​ഞ്ചൈസികള്‍ കൂടി ഐ.പി.എല്ലിലെത്തുക. ടീമുകളുടെ എണ്ണം 10 ആക്കി ഉയര്‍ത്തുന്നതോടെ കേരളത്തിലെ ആരാധകരും പ്രതീക്ഷയിലാണ്​.

ഐ.പി.എല്ലില്‍ പുതിയ ടീമുകളെ ഉള്‍പെടുത്തുന്ന വിഷയമാണ്​ അഹ്​മദാബാദില്‍ നടക്കാന്‍ പോകുന്ന യോഗത്തിന്‍റെ പ്രധാന അജണ്ടകളില്‍ ഒന്ന്​. അടുത്ത സീസണില്‍ ഒരു പുതിയ ഫ്രാഞ്ചൈസിക്ക്​ ഒരു മികച്ച ടീം ചുരുങ്ങിയ സമയത്തിനുള്ളില്‍ കെട്ടിപ്പടുക്കുകയെന്നത്​ ശ്രമകരമാകുമെന്ന തിരിച്ചറിവിലാണ്​ ഐ.പി.എല്ലിന്‍റെ വിപുലീകരണം നീട്ടിയതെന്ന്​ ബി.സി.സി​.ഐ ഉദ്യോഗസ്​ഥന്‍ പ്രതികരിച്ചു​.

ടീമുകളുടെ എണ്ണം കൂട്ടു​േമ്ബാള്‍ ഹോം-എവേ അടിസ്​ഥാനത്തില്‍ 94 മത്സരങ്ങള്‍ കളിക്കേണ്ടി വരും. ടൂര്‍ണമെന്‍റ്​ പുര്‍ത്തീകരിക്കാന്‍ രണ്ടര മാസമെടുക്കുമെന്നതിനാല്‍ അന്താരാഷ്​ട്ര കലണ്ടറിനെ ബാധിക്കാത്ത രീതിയിലും മികച്ച വിദേശ താരങ്ങളുടെ സാന്നിധ്യം ഉറപ്പാക്കാനും ശ്രദ്ധിക്കേണ്ടതായി വരും.

മുന്‍ വര്‍ഷങ്ങളില്‍ 60 മത്സരങ്ങളായിരുന്നു ഓരോ സീസണുകളിലുമുണ്ടായിരുന്നത്​. ഇതിനനുസരിച്ച ബ്രോഡ്​കാസ്​റ്റിങ്​ ചാര്‍ജായിരുന്നു ബി.സി.സി.ഐക്ക്​ ലഭിച്ചുകൊണ്ടിരുന്നത്​. മത്സരം കൂടുന്നതോടെ ഇതും പുനര്‍നിര്‍ണയിക്കേണ്ടതായി വരും.

2018-2022 കാലയളവില്‍ 16,347.50 കോടി രൂപയാണ്​ സ്റ്റാര്‍ ഇന്ത്യ ബി.സി.സി.ഐക്ക്​ നല്‍കുന്നത്​. ഇന്ത്യയിലെ പ്രമുഖ വ്യവസായികളായ ഗൗതം അദാനിയും സഞ്​ജീവ്​ ഗോയ​ങ്കേയും പുതിയ ടീമുകളില്‍ കണ്ണുവെച്ചതായാണ്​ റിപ്പോര്‍ട്ട്​.