മലയാളികളുടെ പ്രിയപ്പെട്ട നടനും തിരക്കഥാകൃത്തുമായ ശ്രീനിവാസൻ വിടവാങ്ങുമ്പോൾ, അദ്ദേഹത്തിന്റെ ആരോഗ്യത്തെ തളർത്തിയ ആ പഴയ ശീലവും ചർച്ചയാകുന്നു. ഭക്ഷണത്തിലും ജീവിതത്തിലും കടുത്ത ആദർശങ്ങൾ പുലർത്തിയിരുന്ന ശ്രീനിവാസന്, പുകവലി എന്ന ശീലത്തിന് മുന്നിൽ മാത്രം നിയന്ത്രണം നഷ്ടമായിരുന്നു.

ജൈവകൃഷിയെ പ്രോത്സാഹിപ്പിക്കുകയും വിഷരഹിത ഭക്ഷണത്തിനായി വാദിക്കുകയും ചെയ്ത വ്യക്തിയായിരുന്നു ശ്രീനിവാസൻ. എന്നാൽ, സ്വന്തം ശരീരത്തെ ബാധിക്കുന്ന പുകവലി ഉപേക്ഷിക്കാൻ അദ്ദേഹത്തിന് സാധിച്ചില്ല. ഹൃദയസംബന്ധമായ അസുഖങ്ങളും ശ്വാസകോശ പ്രശ്നങ്ങളും അദ്ദേഹത്തെ അലട്ടിയിരുന്നപ്പോഴും ഈ ശീലം വലിയ വില്ലനായി തുടർന്നു.

തന്റെ രോഗാവസ്ഥയ്ക്ക് പ്രധാന കാരണം പുകവലിയാണെന്ന് വൈകിയാണെങ്കിലും അദ്ദേഹം തുറന്നു സമ്മതിച്ചിരുന്നു. ഒരിക്കൽ അദ്ദേഹം പറഞ്ഞത് ഇങ്ങനെയാണ്: “ഇത്രയും സിഗരറ്റ് വലിക്കേണ്ടതില്ലായിരുന്നു എന്ന് ഇപ്പോൾ തോന്നുന്നുണ്ട്. കാരണം പുകവലിയാണ് എന്റെ ആരോഗ്യം തകർത്തത്. ഈ അവസ്ഥയിൽ നിൽക്കുമ്പോഴും ഒരു സിഗരറ്റ് കിട്ടിയാൽ ഞാൻ വലിച്ചുപോകും, അത്രയ്ക്ക് അഡിക്ഷനാണ് എനിക്ക്. മറ്റുള്ളവരോട് എനിക്ക് ഒരു ഉപദേശമേയുള്ളൂ, കഴിയുമെങ്കിൽ പുകവലിക്കാതിരിക്കുക.”

വാശി തീർക്കും പോലെ സിഗരറ്റ് വലിച്ചു കൂട്ടുന്ന ശീലം അദ്ദേഹത്തിന്റെ ഹൃദയത്തിന്റെ പ്രവർത്തനത്തെയും ശ്വാസകോശത്തെയും ഗുരുതരമായി ബാധിച്ചിരുന്നു. ദീർഘകാലമായി ചികിത്സയിലായിരുന്ന അദ്ദേഹം ഇന്ന് രാവിലെ ഡയാലിസിസിന് പോകുന്ന വഴിയാണ് അന്തരിച്ചത്. ആദർശങ്ങൾ മുറുകെ പിടിക്കുമ്പോഴും പുകവലി എന്ന മാരകമായ ലഹരിക്ക് അടിപ്പെട്ടത് തന്റെ ആരോഗ്യത്തിന് വരുത്തിയ വിനയെക്കുറിച്ച് അദ്ദേഹം എന്നും ഖേദിച്ചിരുന്നു.