വിരാട്‌ കോഹ്‌ലിയും രോഹിത്‌ ശര്‍മ്മയും നേടിയ കൂറ്റന്‍ സെഞ്ച്വറിയില്‍ ഇന്ത്യ ചരിത്ര വിജയം നേടി. 52 പന്തില്‍ നിന്നാണ് കോഹ്‌ലി സെഞ്ച്വറി നേടിയത്. ഓസ്‌ട്രേലിയ ഉയര്‍ത്തിയ പടുകൂറ്റന്‍ സ്‌കോറായ 360 റണ്‍സ്‌ നിഷ്‌പ്രയാസം നേടിയാണ്‌ ഇന്ത്യ 9 വിക്കറ്റിന്‌ ജയിച്ചത്‌. രോഹിത്‌ ശര്‍മ്മ 141 റണ്‍സും വിരാട്‌ കേഹ്‌ ലി 100 റണ്‍സും ശിഖാര്‍ ധവാന്‍ 95 റണ്‍സും നേടി ഇന്ത്യയെ വിജയിപ്പിച്ചു. മികച്ച പ്രകടനത്തോടെ 43.3 ഓവറിലാണ്‌ ഇന്ത്യ ലക്ഷ്യം കണ്ടത്‌. സ്‌കോര്‍ പിന്തുടര്‍ന്ന്‌ ഇന്ത്യ നേടുന്ന മികച്ച വിജയമായിരുന്നു ജയ്‌പൂരിലേത്‌. ഏകദിന ക്രിക്കറ്റില്‍ ഒരു ടീം പിന്തുടര്‍ന്ന്‌ നേടുന്ന രണ്ടാമത്തെ സ്‌കോര്‍കൂടിയാണിത്‌.

ടോസ് നേടി ആദ്യം ബാറ്റു ചെയ്ത ഓസ്‌ട്രേലിയന്‍ ബാറ്റ്‌സ്മാന്മാരുടെ കൂട്ടായ ശ്രമത്തിലാണ് ടീം കൂറ്റന്‍സ്‌കോര്‍ നേടിയത്. അഞ്ച് ഓസ്‌ട്രേലിയന്‍ ബാറ്റ്‌സ്മാന്മാരാണ് അര്‍ദ്ധ സെഞ്ച്വറി നേടിയത്.

ഇന്ത്യന്‍ ബൗളര്‍മാര്‍ക്കെതിരെ കരുതലോടെയാണ് ഓസ്‌ട്രേലിയ തുടങ്ങിയത്. ആദ്യ പത്ത് ഓവറില്‍ വിക്കറ്റ് നഷ്ടമാകാതെ 46 റണ്‍സും 20 ഓവറില്‍ നൂറില്‍ താഴെ റണ്‍സുമായിരുന്നു ഓസ്‌ട്രേലിയ നേടിയത്. എന്നാല്‍ ഓപ്പണര്‍ ഫിഞ്ചിന്റെ വിക്കറ്റ് നഷ്ടമായതോടെ മൂന്നാമനായി ക്രീസിലെത്തിയ വാട്‌സനാണ് ഓസ്‌ട്രേലിയന്‍ സ്‌കോറിംഗിന്റെ വേഗം കൂട്ടിയത്. പിന്നീട് വന്നവരെല്ലാം ഇന്ത്യന്‍ ബൗളര്‍മാരെ സവായ് മാന്‍സിംഗ് സ്‌റ്റേഡിയത്തിന്റെ നാലതിരുകളിലേക്കും അടിച്ചകറ്റിയപ്പോള്‍ ഓസ്‌ട്രേലിയ നിശ്ചിത അമ്പത് ഓവറില്‍ 5 വിക്കറ്റ് നഷ്ടത്തില്‍ 359 റണ്‍സ് നേടുകയായിരുന്നു.

50 പന്തുകളില്‍ നിന്നും അഞ്ച് സിക്‌സറുകളുടേയും എട്ട് ഫോറുകളുടേയും അകമ്പടിയില്‍ 92 റണ്‍സ് നേടി പുറത്താകാതെ നിന്ന ബെയ്‌ലിയായിരുന്നു ഏറ്റവും അപകടകാരി. ആരോണ്‍ ഫിഞ്ച്(50), ഹ്യൂഗസ്(83), ഷൈന്‍ വാട്‌സണ്‍(59), ഗ്ലെന്‍ മാക്‌സ്‌വെല്‍(53) എന്നിവരും അര്‍ദ്ധ സെഞ്ച്വറി നേടി. ഭൂവനേശ്വര്‍ കുമാര്‍ ഒഴികെയുള്ള എല്ലാ ഇന്ത്യന്‍ ബൗളര്‍മാരും ഒരോവറില്‍ ശരാശരി ആറ് റണ്‍സിന് മീതെ വിട്ടുകൊടുത്തു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha