വീടുകളില്‍ ടെറേറിയം പുതിയ ട്രെന്‍ഡാകുന്നു!
ചില്ലുഭരണിക്കുള്ളിലെ കുഞ്ഞന്‍ ഉദ്യാനം എന്ന ടെറേറിയം കണ്ടാല്‍ ആരും പറഞ്ഞുപോകും, 'ചെറുതു തന്നെ മനോഹരം'. പ്രത്യേക കരവിരുതില്‍ വളരെ ക്ഷമയോടെ ഒരുക്കിയെടുക്കുന്ന ഈ ഉദ്യാനത്തില്‍ കലയും ശാസ്ത്രവും ഒരുമിക്കുന്നു. ചെടി നട്ടുവളര്‍ത്താന്‍ സ്ഥലസൗകര്യമില്ലാത്തവര്‍ക്ക് വീടിനുള്ളില്‍ ടെറേറിയം ഒരുക്കാം. യൂറോപ്യന്‍ രാജ്യങ്ങളില്‍ കൊടുംശൈത്യകാലത്ത് ചെടികളും മരങ്ങളും മഞ്ഞുമൂടി കിടക്കുന്ന സമയത്ത് ആകെ കാണാവുന്ന പച്ചത്തുരുത്തുകളാണ് ചില്ലുകൂട്ടിലെ ഉദ്യാനങ്ങള്‍.
രണ്ടുതരം ടെറേറിയമാണുള്ളത്. മൂടിയുള്ള ചില്ലുഭരണിയില്‍ മുഴുവനായി അടച്ചുവച്ചു സംരക്ഷിക്കുന്നതും പാതി തുറന്ന പാത്രത്തില്‍ ഒരുക്കുന്നതും. പൂര്‍ണമായും അടച്ചുവയ്ക്കുന്ന ടെറേറിയത്തിനുള്ളില്‍ ചൂടും ഈര്‍പ്പവും ഏറുമെന്നതുകൊണ്ട് ഇവയുടെ പരിപാലനം എളുപ്പമല്ല. പാതിതുറന്നവയില്‍ അധികമായി ഈര്‍പ്പം തങ്ങി നില്‍ക്കില്ല. പുറത്തെ അന്തരീക്ഷത്തിലേക്കു വായുസഞ്ചാരം സുഗമമായതുകൊണ്ട് ഉള്ളില്‍ ചൂടും അധികമാകില്ല. പൂര്‍ണമായി അടച്ച ടെറേറിയത്തില്‍ കള്ളിച്ചെടികള്‍ വളര്‍ത്താനാവില്ലെന്ന പരിമിതിയുമുണ്ട്.
ഒതുങ്ങിയ സസ്യപ്രകൃതിയുള്ളതും ഉയരത്തില്‍ വളരാത്തതും അത്ര കണ്ട് നനയും ശുശ്രൂഷയും വേണ്ടാത്തതുമായ അലങ്കാരച്ചെടികളാണ് അനുയോജ്യം. ഫിറ്റോണിയ, സിങ്കോണിയം, പന്നല്‍ ചെടികളായ വാങ്കിങ് ഫേണ്‍, ടേബിള്‍ ഫേണ്‍, ബോസ്റ്റണ്‍ ഫേണ്‍, സക്കുലന്റ് ഇനങ്ങളായ അലോ, അഗേവ്, സാന്‍സിവീറിയ, ക്രിപ്റ്റാന്തസ്, ടില്ലാന്‍സിയ, പെപ്പറോമിയ, പൈലിയ, ലക്കിബാംബു, അക്വേറിയം ചെടികളായ ലിംനോഫില്ല, ലഡ്വീജിയ, റൊട്ടാല, അലങ്കാര കള്ളിയിനങ്ങളായ ഒപ്പന്‍ഷിയ, മാരിലേറിയ, ഫെറോകാക്റ്റസ്, റിപ്‌സാലിസ് എന്നിവ ടെറേറിയത്തില്‍ വളര്‍ത്താം.
ടെറേറിയം വയ്ക്കുന്നിടത്തെ സൂര്യപ്രകാശലഭ്യത അനുസരിച്ചുവേണം ചെടിയിനങ്ങള്‍ തിരഞ്ഞെടുക്കാന്‍. തീരെ വെളിച്ചം കുറഞ്ഞിടത്ത് പൂര്‍ണമായും പച്ചനിറത്തില്‍ ഇലകളോ തണ്ടുകളോ ഉള്ളവ ഉപയോഗിക്കാം. ഫിറ്റോണിയ, ക്രിപ്റ്റാന്തസ്, സാന്‍സിവീറിയ തുടങ്ങിയവയുടെ ഇലകള്‍ക്ക് ഒന്നില്‍ കൂടുതല്‍ നിറങ്ങള്‍ ഉണ്ട്. ഇവ കൂടുതല്‍ സൂര്യപ്രകാശം കിട്ടുന്നിടത്തേക്ക് യോജിക്കും.
മറ്റ് ഉദ്യാനങ്ങളിലെന്നപോലെ ടെറേറിയത്തിലെ ഉദ്യാനത്തിനും ലാന്‍ഡ്‌സ്‌കേപിങ് ആവശ്യമാണ്. ടെറേറിയത്തിന്റെ പ്രധാനപ്പെട്ട രണ്ടു ഘടകങ്ങളാണ് ചെടിയിനങ്ങളും ചില്ലുഭരണിയും. നന്നായി വെളിച്ചം കയറുന്നതും പ്രത്യേകിച്ച് നിറമൊന്നുമില്ലാത്തതും പുറം ഭാഗത്ത് ചിത്രങ്ങളോ മറ്റ് പ്രിന്റുകളോ ഇല്ലാത്തതുമായ ഭരണി തിരഞ്ഞെടുക്കാം. ടെറേറിയത്തിലെ ലാന്‍ഡ്‌സ്‌കേപിങ്ങിന് കാടിന്റെയോ മരുഭൂമിയുടെയോ പ്രതീതി നല്‍കാനാവും. ടെറേറിയത്തില്‍ നടുന്ന ചെടികള്‍ക്ക് എത്രമാത്രം വെള്ളം ആവശ്യമുണ്ടെന്നതു കണക്കാക്കിവേണം ഈ ഉദ്യാനത്തിലേക്കു നടീല്‍മിശ്രിതമൊരുക്കേണ്ടത്.
കൂടുതല്‍ ഈര്‍പ്പം ആവശ്യമുള്ള പന്നല്‍ ഇനങ്ങള്‍, പെപ്പറോമിയ, പൈലിയ, സിങ്കോണിയം തുടങ്ങിയവ, അക്വേറിയം ഇനങ്ങള്‍ എന്നിവയ്ക്ക് ഏറെ ചകിരിച്ചോറ് (കൊക്കോപീറ്റ്) ചേര്‍ത്തുണ്ടാക്കിയ മിശ്രിതമാണ് യോജിച്ചത്. രണ്ടുഭാഗം ചകിരിച്ചോറ്, ഒരുഭാഗം വീതം ആറ്റുമണല്‍ അല്ലെങ്കില്‍ പെര്‍ലൈറ്റ്, മണ്ണിരവളം ഇവ കലര്‍ത്തി ഇത്തരം മിശ്രിതം തയാറാക്കാം.
കുറച്ചു മാത്രം ഈര്‍പ്പം ആവശ്യമുള്ള സക്കുലന്റ്, കള്ളിയിനങ്ങള്‍ക്ക് നന്നായി വെള്ളം വാര്‍ന്നുപോകുന്ന തരം മിശ്രിതമാണു വേണ്ടത്. ഇതില്‍ ആറ്റുമണല്‍ അല്ലെങ്കില്‍ പെര്‍ലൈറ്റ് ഏറെ ഉപയോഗിക്കാം. രണ്ടുഭാഗം ആറ്റുമണല്‍ അല്ലെങ്കില്‍ പെര്‍ലൈറ്റ്, ഒരു ഭാഗം വീതം ചകിരിച്ചോറ്, മണ്ണിരവളം ഇവ ചേര്‍ത്ത് ഈ മിശ്രിതം കൂട്ടിയെടുക്കാം. ചെടിയുടെ വേരിന്റെ നീളമനുസരിച്ചാണ് മിശ്രിതത്തിന്റെ ആഴം തീരുമാനിക്കേണ്ടത്. ചുവട്ടില്‍ കിഴങ്ങുള്ള സ്‌പൈഡര്‍ പ്ലാന്റ്, അലങ്കാര ശതാവരി, സിങ്കോണിയം ഇവയ്‌ക്കെല്ലാം നല്ല ആഴത്തിലുള്ള മിശ്രിതം ചില്ലുഭരണിയില്‍ നിറയ്ക്കുകയും വേണം.
https://www.facebook.com/Malayalivartha
