സെല്ഫ് ഗോള് അടിച്ച് ഇടതുപക്ഷ ഐക്യം തകര്ക്കരുതെന്ന് കാനം; നിശബ്ദനായി മാണി ; സിപിഎം സംസ്ഥാന സമ്മേളനം സാക്ഷ്യം വഹിച്ചത് ഇടത് വലത് നേതാക്കളുടെ ശീതസമരത്തിന്
സെല്ഫ് ഗോള് അടിച്ച് ഇടതുപക്ഷ ഐക്യം തകര്ക്കരുതെന്ന് സിപിഐ സംസ്ഥാന സെക്രട്ടറി കാനം രാജേന്ദ്രന്. സിപിഎം സംസ്ഥാന സമ്മേളനത്തിന്റെ ഭാഗമായി നടന്ന കേരളം ഇന്നലെ ഇന്ന് നാളെ സെമിനാറില് കേരള കോണ്ഗ്രസ് നേതാവ് കെ.എം മാണിയെ വേദിയിലിരുത്തിയായിരുന്നു കാനത്തിന്റെ വിമര്ശനം. മതന്യൂനപക്ഷങ്ങളുടെ പേരില് ഇത്തരമൊരു കാര്യം ചെയ്യരുതെന്നും കാനം പറഞ്ഞു.
വോട്ട് ബാങ്ക് രാഷ്ട്രീയത്തിനു പിന്നാലെ പോയതോടെ അടിസ്ഥാന വര്ഗം കമ്യൂണിസ്റ്റ് പാര്ട്ടിയില്നിന്നും വിട്ടുപോയി. ഇത്തരം രാഷ്ട്രീയമാണോ ഇടതുപക്ഷത്തിനു വേണ്ടതെന്ന് ആലോചിക്കണമെന്നും കാനം ചോദിച്ചു. മുഖ്യമന്ത്രി ഉമ്മന് ചാണ്ടിയുടെ നേതൃത്വത്തിലുള്ള സര്ക്കാരിനു രണ്ടാം ഊഴം ലഭിക്കുമെന്നായിരുന്നു വ്യാപകമായ പ്രചരണം. എന്നാല് അവരെ ജനങ്ങള് ഭരണത്തില്നിന്നും പുറത്താക്കി. ഇടതുപക്ഷത്തിന്റെ അഴിമതിക്കെതിരായ നിലപാടുകള് ജനങ്ങള് അംഗീകരിക്കുകയായിരുന്നു. നമ്മുടെ നിലപാടുകള് ജനങ്ങള് ശ്രദ്ധിക്കുന്നുണ്ടെന്ന് തിരിച്ചറിയണം. ഇടതുപക്ഷത്തിനു ദൗര്ബല്യം ഉണ്ടെന്ന് ജനങ്ങളോട് പറയാന് പാടില്ല. ദയവായി "സേം സൈഡ് ഗോള്' അടിക്കാന് ശ്രമിക്കരുത്. ചില രാഷ്ട്രീയ ലക്ഷ്യങ്ങള് നേടുന്നതിനുവേണ്ടി ഇടതുപക്ഷഐക്യം തകര്ക്കാന് പാടില്ലെന്നും കാനം പറഞ്ഞു.
ഇക്കാലത്ത് ഇടതുപക്ഷബദലാണ് ആവശ്യം. ഇതിനായി മുഖ്യധാര രാഷ്ട്രീയ പാര്ട്ടികളാണ് മുന്കൈ എടുക്കേണ്ടത്. എസ്യുസിഐ, സിപിഐ എംഎല് ലിബറേഷന്, ഫോര്വേഡ് ബ്ലോക്ക് അടക്കം ഇടതു സഖ്യത്തിലുണ്ടായിരുന്നു. ഇവരൊക്കെ വിട്ടുപോയിരിക്കുന്നു. ഇടതുപക്ഷ സഖ്യം വിപുലീകരിക്കുകയാണ് വേണ്ടത്. ഇടത് ഐക്യം കുറുക്കുവഴികളോടെ ശക്തിപ്പെടില്ലെന്നും അദ്ദേഹം പറഞ്ഞു.
എന്നാല് കാനത്തിനു ശേഷം മാണി നടത്തിയ പ്രസംഗത്തില് ഇക്കാര്യമൊന്നും സൂചിപ്പിച്ചെന്നതും ശ്രദ്ധേയമായി. കാര്ഷിക മേഖലയുടെ തകര്ച്ചയ്ക്കു കാരണം ഗ്ലോബലൈസേഷന്റെ ഭാഗമായ കരാറുകളാണെന്ന് അദ്ദേഹം പറഞ്ഞു. ഇത്തരം കരാറുകളില്നിന്നും ഇന്ത്യ പുറത്തുകടക്കണമെന്ന് മാണി ആവശ്യപ്പെട്ടു.
https://www.facebook.com/Malayalivartha