തിരിച്ചടിക്കാന് ഇന്ത്യ സജ്ജം; ഇന്ത്യക്കെതിരെ പ്രവര്ത്തിക്കാന് ഭീകരരെ അനുവദിക്കില്ല... ഡിജിഎംഒ രണ്ബീര് സിങ്ങിന്റെ പ്രസ്താവനയുടെ പൂര്ണ്ണരൂപം
കശ്മീരിലെ നിയന്ത്രണരേഖയില് വര്ധിച്ചു വരുന്ന ഭീകരരുടെ നുഴഞ്ഞുകയറ്റം ആശങ്കാജനകമാണെന്ന് ഡിജിഎംഒ രണ്ബീര് സിംഗ്. പൂഞ്ചിലും ഉറിയിലും സെപ്റ്റംബര് 11, 18 തീയതികളില് നടന്ന ഭീകരാക്രമണങ്ങളില് ഇതുകാണാം. നിയന്ത്രണരേഖയ്ക്കു സമീപം നടന്ന 20 ഓളം നുഴഞ്ഞുകയറ്റ ശ്രമങ്ങളാണ് ഈ വര്ഷം ഇന്ത്യന് സേന തകര്ത്തത്.
ഭീകരര് എത്തുന്നത് പാക്കിസ്ഥാനില് നിന്നാണെന്ന് വെളിപ്പെടുത്തുന്ന തെളിവുകള് ഉണ്ട്. പാക്കിസ്ഥാനില് നിന്നും പാക്ക് അധീന കശ്മീരില്നിന്നും ഇന്ത്യയിലേക്കു നുഴഞ്ഞുകയറിയ ഭീകരര്, പരിശീലനവും ആയുധപരിശീലനവും ലഭിച്ചത് പാക്കിസ്ഥാനില് വച്ചാണെന്ന് മൊഴി നല്കിയിട്ടുണ്ട്. ഇത് നയതന്ത്രതലത്തിലും സൈനിക തലത്തിലും ഇന്ത്യ ചൂണ്ടിക്കാണിച്ചിരുന്നു. ഈ തെളിവുകള് പരിശോധിക്കാന് പാക്കിസ്ഥാനെ ഇന്ത്യ ക്ഷണിച്ചിട്ടുണ്ട്. പൂഞ്ചിലും ഉറിയിലും കൊല്ലപ്പെട്ട ഭീകരരുടെ ഡിഎന്എ സാംപിളുകളും വിരലടയാളങ്ങളും പരിശോധനയ്ക്കായി പാക്കിസ്ഥാനു നല്കും.
2004ലെ തീരുമാനങ്ങള്ക്കു വിരുദ്ധമായി പാക്കിസ്ഥാന് അവരുടെ മണ്ണ് ഇന്ത്യയ്ക്കെതിരെ ഭീകരപ്രവര്ത്തനങ്ങള് നടത്താന് ഉപയോഗിക്കുകയാണ്. നിയന്ത്രണരേഖയ്ക്കു സമീപത്തുനിന്നുള്ള നുഴഞ്ഞുകയറ്റത്തിന് കുറവുകളൊന്നും വന്നിട്ടില്ല. നുഴഞ്ഞുകയറ്റം തടയുന്നതിനുള്ള ഇന്ത്യന് സേനയുടെ ശ്രമം ഫലവത്തായതിനാലാണ് നിങ്ങള്ക്കുള്ള നാശനഷ്ടങ്ങള് കുറഞ്ഞിരിക്കുന്നത്. ഭീഷണി തുടര്ന്നുവരുന്ന സാഹചര്യത്തില് തിരിച്ചടിക്ക് ഇന്ത്യ സേന സുസജ്ജമാണ്.
നിയന്ത്രണരേഖയ്ക്കു സമീപമുള്ള താവളങ്ങളില് കശ്മീരിലും മെട്രോകളിലും ഭീകരാക്രമണം നടത്താന് തയാറെടുത്ത് ഭീകരര് നില്ക്കുന്നതായി വിശ്വസനീയമായ വിവരം ലഭിച്ചിരുന്നു. അതേത്തുടര്ന്നാണ് ഭീകര ക്യാംപുകള് ലക്ഷ്യമാക്കി കരസേന മിന്നലാക്രമണം നടത്തിയത്. ഇന്ത്യന് പൗരന്മാരുടെ ജീവനെടുക്കുന്നതിന് ഈ ഭീകരരെ അനുവദിക്കാതിരിക്കുക മാത്രമാണ് ഞങ്ങള് ലക്ഷ്യം വച്ചിരുന്നത്.
ഇന്ത്യ തിരിച്ചടിക്കുക വഴി ഭീകരര്ക്കും അവര്ക്ക് സഹായം നല്കിയവര്ക്കും നാശം സംഭവിച്ചിട്ടുണ്ട്. നുഴഞ്ഞുകയറ്റം തകര്ക്കുക മാത്രമാണ് ആക്രമണത്തിലൂടെ ലക്ഷ്യം വച്ചിരുന്നത്. ഇതു തുടരുന്നതിനു തീരുമാനിച്ചിട്ടില്ല. ഏതു സാഹചര്യത്തിലും തിരിച്ചടിക്കാന് ഇന്ത്യന് സേന സജ്ജമാണ്.
ആക്രമണം നടത്തിയ വിവരം പാക്ക് ഡിജിഎംഒയെ അറിയിച്ചിട്ടുണ്ട്. മേഖലയിലെ സമാധാനവും പ്രശാന്തതയും നിലനിര്ത്താനാണ് ഇന്ത്യ ലക്ഷ്യം വയ്ക്കുന്നത്. ഇന്ത്യക്കെതിരെ പ്രവര്ത്തിക്കാന് ഭീകരരെ അനുവദിക്കില്ല. പാക്ക് മണ്ണ് ഇന്ത്യയ്ക്കെതിരായ ഭീകരപ്രവര്ത്തനങ്ങള്ക്കായി ഉപയോഗിക്കില്ലെന്ന് 2004ല് പാക്കിസ്ഥാന് ഉറപ്പുനല്കിയിരുന്നു. മേഖലയില്നിന്ന് ഭീകരവാദത്തെ തുടച്ചുനീക്കുന്നതിന് പാക്കിസ്ഥാന്റെ സഹകരണം ഞങ്ങള് പ്രതീക്ഷിക്കുന്നു.
https://www.facebook.com/Malayalivartha