ന്യൂഡല്‍ഹിയില്‍ ബി.എം.ഡബ്‌ള്യു കാറും യൂബര്‍ ടാക്‌സി കാറും കൂട്ടിയിടിച്ച് ടാക്‌സി ഡ്രൈവര്‍ മരിച്ചു. ഒരു മള്‍ട്ടി നാഷണല്‍ കമ്പനിയില്‍ ജോലി ചെയ്യുന്ന യുവാവ് തന്റെ ബി.എം.ഡബ്‌ള്യു കാറില്‍ 120 കിലോമീറ്റര്‍ വേഗതയില്‍ വന്ന് യൂബര്‍ ടാക്‌സിയില്‍ ഇടിക്കുകയായിരുന്നു. ഉടന്‍ തന്നെ ഡ്രൈവര്‍ മരിച്ചു.

നസ്‌റുല്‍ ഇസ്ലാം എന്ന വ്യക്തിയുടെ യൂബര്‍ ടാക്‌സിയിലെ ആദ്യദിന ഡ്യൂട്ടിയായിരുന്നു അന്ന്. ഭാര്യയും രണ്ടു കുട്ടികളും മുത്തശ്ശിയും അടങ്ങുന്ന കുടുംബത്തിലെ ഏക അത്താണിയായിരുന്നു 30-കാരനായ നസ്‌റുല്‍.

ഷൊയബ് കോഹ്‌ലി എന്ന 24-കാരനെ സംഭവത്തില്‍ പോലീസ് കസ്റ്റഡിയില്‍ എടുത്തിട്ടുണ്ട്. സംഭവസമയത്ത് ഇയാള്‍ മദ്യപിച്ചിരുന്നു എന്നാണ് പോലീസ് ഭാഷ്യം. ഇയാളെ ഇപ്പോള്‍ റിമാന്‍ഡില്‍ വച്ചിരിക്കുകയാണ്.