അവസരം മുതലെടുത്ത് ഇടനിലക്കാര്‍: മാരക വൈറസ് രോഗം ബാധിച്ച കോഴികളെ തമിഴ്‌നാട്ടില്‍ നിന്ന് കേരളത്തിലേയ്ക്ക് തള്ളുന്നു. പക്ഷിപ്പനിയെ വെല്ലുന്ന മാരക വൈറസ് രോഗം കോഴികളിലെന്ന് സ്ഥിരീകരിച്ചു. തമിഴ്‌നാട്ടിലാണ് ഇറച്ചി കോഴി കര്‍ഷകരെ വിറപ്പിച്ചുകൊണ്ട് വ്യാപകമായി വൈറസ് രോഗം കണ്ടെത്തിയത്. രോഗ കാരണം വൈറസാണെന്ന് സ്ഥിരീകരിച്ചെങ്കിലും ഏത് തരത്തിലുള്ള വൈറസാണെന്നോ, ഇതിനെ എങ്ങനെ പ്രതിരോധിക്കാമെന്നോ ഉള്ള കണ്ടെത്തല്‍ നടത്താന്‍ ശാസ്ത്ര ലോകത്തിന് ഇതേവരെ കഴിഞ്ഞിട്ടില്ല.

നേരത്തെ പക്ഷികളില്‍, പ്രത്യേകിച്ച് ഇറച്ചി കോഴികളില്‍ കണ്ടെത്തിയ രോഗങ്ങള്‍ മനുഷ്യന് വലിയ ഭീഷണി ഉയര്‍ത്തിയിരുന്നില്ല. എന്നാല്‍ ഇപ്പോള്‍ പ്രത്യക്ഷപ്പെട്ട രോഗം മനുഷ്യ ശരീരത്തില്‍ നേരിട്ട് ബാധിക്കുന്നവയാണെന്ന് സംശയിക്കുന്നു. രണ്ടുവര്‍ഷം മുമ്പ് കോഴികളില്‍ കാണപ്പെട്ട പക്ഷിപ്പനി കോഴി കര്‍ഷകരുടെ നട്ടെല്ലൊടിച്ചിരുന്നു. മാര്‍ക്കറ്റില്‍ കിലോയ്ക്ക് ഇരുപത് രൂപവരെ കോഴി ഇറച്ചിക്ക് വില കുറഞ്ഞിരുന്നു. പക്ഷിപ്പനി മനുഷ്യനിലേക്ക് പകരില്ലെന്നും, വെന്ത മാംസത്തില്‍ വൈറസ് ഇല്ലെന്നതും ശാസ്ത്രജ്ഞര്‍ തെളിയിച്ചതാണ്. എന്നാല്‍ ഇപ്പോള്‍ കാണപ്പെട്ട അപൂര്‍വ്വമായ രോഗത്തെ കുറിച്ചുള്ള പഠനംപോലും തുടങ്ങിയിട്ടില്ല.

തമിഴ് നാട്ടില്‍ കോഴികളില്‍ രോഗം വ്യാപകമായതോടെ ഈ അവസരം മുതലാക്കുകയാണ് കേരളത്തിലെയും തമിഴ് നാട്ടിലേയും ഇടനിലക്കാര്‍. തുച്ഛമായ വിലക്ക് തമിഴ്‌നാട്ടില്‍നിന്ന് വാങ്ങുന്ന ഇറച്ചി കോഴികളെ തീവിലക്ക് കേരളത്തിലേക്ക് തള്ളുകയാണ്. രോഗം ബാധിച്ച കോഴികളെ തൊട്ടാല്‍പോലും ചൊറിച്ചില്‍ അനുഭവപ്പെടുന്നുണ്ടത്രെ. ഭക്ഷണമായി കഴിച്ചാല്‍ ചൊറിച്ചിലും ശരീരത്തില്‍ കുമിളകള്‍ പോലെയുള്ള കുരുക്കള്‍ പ്രത്യക്ഷപ്പെടുമെന്നാണ് പറയുന്നത്. ഇതൊക്കെ മറച്ചുവച്ചാണ് കോഴി ലോബികളും കടത്തുകാരും കേരളത്തിലേക്ക് അതിര്‍ത്തി കടത്തി ടണ്‍ കണക്കിന് കോഴികളെ കൊണ്ടുവരാന്‍ ഒരുക്കങ്ങള്‍ നടത്തുന്നത്.

ഇത്തരം കോഴികളെ കുറിച്ച് ആരോഗ്യ പ്രവര്‍ത്തകര്‍ മുന്നറിയിപ്പ് നല്‍കിയിട്ടുണ്ട്. കോഴികളില്‍ പ്രത്യക്ഷപ്പെട്ട മാരക രോഗത്തെ കുറിച്ചുള്ള മുന്നറിയിപ്പ് തമിഴ്‌നാട് സര്‍ക്കാര്‍ ആരോഗ്യ വകുപ്പിന്റെ വെബ്‌സൈറ്റില്‍ നല്‍കിയിട്ടുണ്ട്. എന്നാല്‍ കേരള സര്‍ക്കാര്‍ ഇതേവരെ ഇത് ഗൗരവത്തിലെടുക്കാനോ, രോഗം ബാധിച്ച കോഴികളുടെ ഇറക്കുമതി തടയാനോ ഒരു നടപടിയും സ്വീകരിച്ചിട്ടില്ല.