ചൊവ്വയില്‍ മനുഷ്യന്‍ എന്നു പോകുമെന്ന് വേണമെങ്കില്‍ പ്രവചിക്കാന്‍ കഴിഞ്ഞേക്കുമെങ്കിലും റോഡില്‍ ഓട്ടോറിക്ഷകള്‍ എവിടെ, എങ്ങനെ തിരിയുന്നുവെന്ന് ചിന്തിക്കാന്‍ പോലും കഴിയില്ലെന്നാണ് പൊതുവേയുള്ള ഭാഷ്യം.

മിക്ക ഓട്ടോക്കാരും ഇന്‍ഡിക്കേറ്ററൊന്നും ഇടാറേയില്ല. ഇത്തരത്തിലുള്ള അപ്രതീക്ഷിതവും മര്യാദയില്ലാത്തതുമായ വാഹനമോടിക്കല്‍ വന്‍ദുരന്തങ്ങളിലാണ് ചെന്നെത്തുന്നത്. അങ്ങനെയുണ്ടായ ഒരു ദുരന്തത്തിന്റെ വിഡിയോയാണ് സോഷ്യല്‍ മീഡിയയില്‍ ഇപ്പോള്‍ വൈറലായി പ്രചരിക്കുന്നത്.

റോഡിലൂടെ പാഞ്ഞുവന്ന കെഎസ്ആര്‍ടിസി ബസിനെ ഗൗനിക്കാതെ ഓട്ടോ വട്ടമിടുന്നതാണ് ദൃശ്യങ്ങളിലുള്ളത്. സമീപത്തെ സിസിടിവി ക്യാമറയിലാണ് അപകടത്തിന്റെ ദൃശ്യങ്ങള്‍ പതിഞ്ഞത്.

ഓട്ടോ റോഡില്‍ വട്ടം ഇട്ടതിനെത്തുടര്‍ന്ന് ബസ് റോഡിനരികില്‍ നിര്‍ത്തിയിട്ട വാഹനങ്ങളിലേക്ക് ഇടിച്ചുകയറി. കടക്കു മുന്നില്‍ നിര്‍ത്തിയിട്ടിരുന്ന ഗുഡ്‌സ് വണ്ടിയ്ക്കും മറ്റൊരു ഓട്ടോ റിക്ഷയ്ക്കും ഇരുചക്രവാഹനത്തിനും ഇടിയുടെ ആഘാതത്തില്‍ കാര്യമായ നാശനഷ്ടങ്ങളുണ്ടായി. ഇരുചക്രവാഹന യാത്രക്കാരന് ഗുരുതരമായി പരിക്കേറ്റിട്ടുണ്ടെന്നാണ് പ്രചരിക്കുന്ന കുറിപ്പില്‍ പറയുന്നത്.