മേഘയ്ക്ക് കണ്ണീരില്‍ കുതിര്‍ന്ന യാത്രാമൊഴി
പോലീസ് ഡോഗ് സ്‌ക്വാഡിന്റെ ഭാഗമായിരുന്ന നായ മേഘ ഇനിയില്ല. ബുധനാഴ്ച ഏരൂര്‍ ഫെലിക്കണ്‍ ഹോസ്പിറ്റലില്‍ ഹൃദയാഘാതം മൂലമാണ് മരണം സംഭവിച്ചത്. രണ്ടര വര്‍ഷമായി കൊച്ചി സിറ്റി പോലീസിന്റെ ഭാഗമായിരുന്നു. ലാബ്രഡോര്‍ഫ റിട്രീവര്‍ വിഭാഗത്തില്‍ പെട്ട പെണ്‍ നായയാണ് മേഘ. ട്രാക്കര്‍ വിഭാഗത്തില്‍ പ്രത്യേക ട്രെയിനിങ് ലഭിച്ചിരുന്ന മേഘ നിരവധി മോഷണക്കേസുകളുടെ അന്വേഷണത്തില്‍ കൊച്ചി സിറ്റി പോലീസിനെ സഹായിച്ചിട്ടുണ്ട്.
മേഘയുടെ യാത്രപറച്ചില്‍ കണ്ടു നില്‍ക്കുന്നവരുടെ കണ്ണു നനയ്ക്കുന്നതായിരുന്നു. അനക്കമില്ലാതെ മേഘ നിലവിളക്കു നാളത്തിനു മുന്നില്‍ നിത്യനിദ്രയിലേക്കു മടങ്ങിയപ്പോള്‍ എ ആര്‍ ക്യാമ്പിലെ ഡോഗ് സ്‌ക്വാഡിലെ രാജേഷിന് അത് താങ്ങാനാവാത്ത കാഴ്ചയായിരുന്നു. മനുഷ്യര്‍ക്കു മനുഷ്യരോടു മാത്രമല്ല മൃഗങ്ങളോടും ആത്മബന്ധം ഉണ്ടാകും എന്നതിനു തെളിവാണ് രാജേഷിന്റെയും ജ്യോതിഷിന്റെയും ജീവിതം. ഒരു കുഞ്ഞിനെയെന്ന പോലെയാണ് മേഘയെ രാജേഷും ജ്യോതിഷും പരിപാലിച്ചിരുന്നത്.
തൃപ്പുണിത്തുറ എ ആര്‍ ക്യാമ്പിലെ ഡോഗ് സ്‌ക്വാഡിലാണ് രാജേഷിനു ജോലി. ഗര്‍ഭിണിയായ ഭാര്യ ചിപ്പിയെ ആശുപത്രിയില്‍ പരിശോധനക്കായി കൊണ്ടുപോകാന്‍ നിശ്ചയിച്ച ദിവസമാണ് അപ്രതീക്ഷിതമായ ആ സംഭവമുണ്ടായത്. താന്‍ പരിശീലിപ്പിക്കുന്ന മേഘയ്ക്ക് ആരോഗ്യപരമായി എന്തോ അസ്വസ്ഥകള്‍. രണ്ടു വയസു മാത്രം പ്രായമുള്ള മേഘ പൊലീസ് ഡോഗ് സ്‌ക്വാഡിന്റെ ഭാഗമായിരുന്നു. വൈകിട്ട് ക്യാമ്പില്‍ നടന്ന പരിശീലനത്തിന് ശേഷം മേഘയ്ക്കുണ്ടായ ശാരീരിക ബുദ്ധിമുട്ടു കണ്ടു പരിഭ്രാന്തനായ രാജേഷ് എറണാകുളത്തെ വെറ്റിനറി ആശുപത്രിയില്‍ കൊണ്ടുപോകുകയായിരുന്നു. മരുന്ന് തന്നു തിരികെ ക്യാമ്പില്‍ എത്തിയെങ്കിലും അതു ഫലം കണ്ടില്ല, ഇന്നലെ രാവിലെ മേഘ അന്ത്യശ്വാസം വലിച്ചു.
ലാബ്രഡോര്‍ ഇനത്തില്‍ പെട്ട മേഘയെ ഒന്നരവര്‍ഷമായി പരിശീലിപ്പിക്കുന്ന രാജേഷും , ജ്യോതിഷും ആകെ തകര്‍ന്നു പോയി. തൃശൂരിലെ ഡോഗ് സ്‌ക്വാഡില്‍ ഒമ്പതു മാസം മേഘയോടൊപ്പം പരിശീലനം പൂര്‍ത്തിയാക്കിയ രാജേഷും ജ്യോതിഷും 2015 മെയ് മാസമാണ് തൃപ്പൂണിത്തുറയില്‍ എത്തിയത്. ഇതിനകം പല പോലീസ് ട്രാക്കിംഗ് ജോലികളില്‍ മേഘ മിടുക്കിയാണെന്നു തെളിയിച്ചിട്ടെണ്ടെന്നു രാജേഷ് അഭിമാനത്തോടെ ഓര്‍ക്കുന്നു.
നല്ല അനുസരണയും സ്‌നേഹവുമുള്ള പോലീസ് ഡോഗ് ആയിരുന്നു മേഘ എന്ന് ജ്യോതിഷും പറയുന്നു. ദുഃഖം താങ്ങാനാവാതെ ആശുപത്രിയില്‍ നില്‍ക്കാതെ രാജേഷും ,ജ്യോതിഷും തിരികെ ക്യാമ്പിലേക്ക് മടങ്ങി ഒരുക്കങ്ങള്‍ക്ക് നേതൃത്വം നല്‍കി. ഉച്ചയോടെ പോസ്റ്റുമോര്‍ട്ടും കഴിഞ്ഞാണ് ക്യാമ്പില്‍ മേഘയുടെ മുറിയുടെ മുന്നില്‍ തന്നെ പൊതു ദര്‍ശനത്തിനു വെച്ചത്.
എ ആര്‍ ക്യാമ്പിലെ കമാന്‍ഡന്റ് ഉണ്ണികൃഷ്ണന്‍ മേഘയെ സല്യൂട്ട് ചെയ്തപ്പോള്‍ താങ്ങാനാവാതെ രാജേഷ് അടുത്ത് നിന്ന് വിതുമ്പി. ക്യാമ്പിലെ സീനിയര്‍ പോലീസ് ഓഫീസര്‍മാര്‍ ഓരോന്നായി വന്നു സല്യൂട്ട് ചെയ്യുകയും റീത്ത് സമര്‍പ്പിക്കുകയും ചെയ്തു. ക്യാമ്പിലെ മറ്റു പോലീസുകാരും മറ്റു നായ്ക്കളുടെ പരിശീലകരും കൂടി മേഘയെ യാത്രയയപ്പിനായി എത്തിയിരുന്നു.
ക്യാമ്പില്‍ തന്നെയുള്ള പറമ്പില്‍ തന്നെ ഒരുക്കങ്ങള്‍ തയ്യാറായിരുന്നു. ആദ്യം മേഘയുടെ മുഖം വെള്ള തുണി കൊണ്ട് മൂടിയ ശേഷം ജ്യോതിഷ് മേഘയ്ക്ക് ഇഷ്ടമുള്ള പന്തും അടുത്തുവച്ചു, വന്നവര്‍ അവസാനമായി കുഴിമാടത്തിലേക്കു ഒരു പിടി മണ്ണിട്ടു മേഘയെ യാത്രയാക്കി.
https://www.facebook.com/Malayalivartha
