തിങ്കളാഴ്ച ആരംഭിക്കുന്ന എസ്എസ്എല്‍സി പരീക്ഷ 2861 കേന്ദ്രങ്ങളിലായി എഴുതുന്നതു 4,68,495 വിദ്യാര്‍ഥികള്‍. കഴിഞ്ഞ വര്‍ഷത്തെക്കാള്‍ 4185 കുട്ടികള്‍ കൂടുതലുണ്ട്. ഗള്‍ഫില്‍ ഒന്‍പതു സ്‌കൂളിലായി 465 കുട്ടികളും ലക്ഷദ്വീപില്‍ ഒന്‍പതു സ്‌കൂളിലായി 1128 കുട്ടികളും പരീക്ഷയെഴുതുന്നുണ്ട്. മൂല്യനിര്‍ണയ ക്യാമ്പുകള്‍ 31നു തുടങ്ങാനും ഫലം ഏപ്രില്‍ 16നു പ്രഖ്യാപിക്കാനും വിദ്യാഭ്യാസ മന്ത്രി പി.കെ. അബ്ദുറബ്ബിന്റെ അധ്യക്ഷതയില്‍ കൂടിയ അധ്യാപക സംഘടനാ നേതാക്കളുടെ യോഗം തീരുമാനിച്ചു. എന്നാല്‍ 31നു വിരമിക്കുന്ന അധ്യാപകര്‍ക്കു യാത്രയയപ്പു നല്‍കേണ്ടതിനാല്‍ അന്നത്തെ മൂല്യനിര്‍ണയവുമായി സഹകരിക്കില്ലെന്നു പ്രതിപക്ഷ അധ്യാപക സംഘടനകളായ കെഎസ്ടിഎയും എകെഎസ്ടിയുവും അറിയിച്ചു. 31ന് അധ്യാപകര്‍ക്കു സറണ്ടര്‍ ആനുകൂല്യം ലഭിക്കില്ലെന്നതും സംഘടനകളുടെ പ്രതിഷേധത്തിനു കാരണമാണ്.
നേരത്തേ 28നു തുടങ്ങാനിരുന്ന മൂല്യനിര്‍ണയമാണു 31ലേക്കു മാറ്റിയത്. നിലവിലുള്ള മൂല്യനിര്‍ണയ ക്യാംപുകളുടെ എണ്ണം 54ല്‍ നിന്ന് 70 ആക്കും. ഫലപ്രഖ്യാപനം ഏപ്രില്‍ 16ന് ഉണ്ടാകുന്ന സാഹചര്യത്തില്‍ മേയില്‍ സര്‍ട്ടിഫിക്കറ്റ് വിതരണം ചെയ്യും. ജൂണ്‍ ആദ്യവാരം പ്‌ളസ് വണ്‍ പ്രവേശനം നടത്തി ക്‌ളാസ് തുടങ്ങുമെന്നും മന്ത്രി അറിയിച്ചു.
ഈ മാസം 23 വരെയാണു പരീക്ഷ. കണക്ക്, സാമൂഹിക ശാസ്ത്രം പേപ്പറുകള്‍ അടുത്തു വരുന്നതിനാല്‍ ടൈംടേബിള്‍ മാറ്റണമെന്ന് ആവശ്യം ഉയര്‍ന്നെങ്കിലും വേണ്ടെന്നാണു തീരുമാനം. ഏറ്റവുമധികം വിദ്യാര്‍ഥികള്‍ പരീക്ഷയെഴുതുന്നതു മലപ്പുറം എടരിക്കോട് ടികെഎം എച്ച്എസ്എസിലാണ് - 2118 പേര്‍. രണ്ടു പേര്‍ വീതം പരീക്ഷയ്ക്കിരിക്കുന്ന പെരിങ്ങര ഗവ. ഗേള്‍സ് എച്ച്എസ്എസ്, ബേപ്പൂര്‍ ജിആര്‍എസ് ടിഎച്ച്എസ് എന്നിവയാണ് എണ്ണത്തില്‍ ഏറ്റവും പിന്നില്‍. ഏറ്റവും കൂടുതല്‍ വിദ്യാര്‍ഥികള്‍ പരീക്ഷയെഴുതുന്നതു മലപ്പുറം വിദ്യാഭ്യാസ ജില്ലയിലും (26,446) കുറവു കുട്ടനാട് വിദ്യാഭ്യാസ ജില്ലയിലുമാണ്(2455). പരീക്ഷാ മേല്‍നോട്ടത്തിന് 25,000 അധ്യാപകരെയും മൂല്യനിര്‍ണയത്തിനു 12,500 അധ്യാപകരെയുമാണു നിയോഗിക്കുക. ഇവരുടെ പ്രതിഫലം വര്‍ധിപ്പിക്കുന്നതു പരിഗണിക്കാമെന്നു മന്ത്രി അറിയിച്ചു. ഐടി, സംസ്‌കൃതം, അറബിക് പരീക്ഷകളുടെ ചോദ്യക്കടലാസ് വന്‍തോതില്‍ അച്ചടിക്കുന്നുവെന്ന പ്രതിപക്ഷ അധ്യാപക സംഘടനകളുടെ ആരോപണം പരിശോധിച്ചു നടപടി സ്വീകരിക്കാന്‍ പൊതുവിദ്യാഭ്യാസ ഡയറക്ടര്‍ ഗോപാലകൃഷ്ണ ഭട്ടിനെ മന്ത്രി ചുമതലപ്പെടുത്തി.