ഹയര് സെക്കന്ഡറി പരീക്ഷാ മൂല്യ നിര്ണയത്തില് ഇനി ഉത്തരക്കടലാസുകളില് മാര്ക്കിടില്ല
ഹയര് സെക്കന്ഡറി പരീക്ഷാ മൂല്യനിര്ണയത്തില് ഈ വര്ഷം മുതല് ഉത്തരക്കടലാസുകളില് മാര്ക്കിടില്ല. മൂല്യനിര്ണയം നടത്തുന്ന അധ്യാപകര് മാര്ക്ക് ഉത്തരക്കടലാസുകളില് എഴുതുന്നതിനു പകരം സ്കോര്ഷീറ്റില് രേഖപ്പെടുത്തിയാല് മതിയെന്നാണ് നിര്ദേശം.
ഉത്തരക്കടലാസുകളുടെ പുനര്മൂല്യ നിര്ണയത്തിനുള്ള (റീവാല്യുവേഷന്) സമയവും ചെലവും ലാഭിക്കുക എന്ന ലക്ഷ്യത്തോടെയാണ് പുതിയ തീരുമാനം. ഇതു സംബന്ധിച്ച പരിശീലനവും നിര്ദേശവും മൂല്യനിര്ണയ ക്യാംപിന്റെ ആദ്യ ദിനം തന്നെ അധ്യാപകര്ക്കു നല്കാന് ഹയര്സെക്കന്ഡറി പരീക്ഷാ വിഭാഗം തീരുമാനിച്ചു.
നിലവില് ഓരോ ഉത്തരത്തിനു സമീപവും അര്ഹതപ്പെട്ട മാര്ക്ക് പേന ഉപയോഗിച്ച് രേഖപ്പെടുത്തുകയായിരുന്നു പതിവ്. എന്നാല് ഉത്തരക്കടലാസുകള് പുനര്മൂല്യനിര്ണയത്തിനെത്തുമ്പോള് മാസ്കിങ് എന്ന സംവിധാനത്തിലൂടെ മുന്പു രേഖപ്പെടുത്തിയ മാര്ക്ക് മായ്ച്ചു കളയേണ്ടിവരും. ഇതിനായി ധാരാളം സമയവും പ്രയത്നവും ചെലവും വേണ്ടിവന്നിരുന്നു.
പ്ലസ് ടു പരീക്ഷാഫലം പുറത്തുവന്നതിനു ശേഷം ഏറ്റവും കുറഞ്ഞത് നാലര ലക്ഷം ഉത്തരക്കടലാസുകള് എങ്കിലും ഇത്തരത്തില് പുനര്മൂല്യനിര്ണയത്തിനായി എത്തുന്നുണ്ട്. ഇവയെല്ലാം മാസ്കിങ് നടത്തുന്നത് എപ്പോഴും പ്രായോഗികമല്ലെന്ന വിലയിരുത്തലും തീരുമാനത്തിനു പിന്നിലുണ്ട്.
ഇത്തവണ ഉത്തരക്കടലാസ് പുനര്മൂല്യനിര്ണയത്തിനെത്തിയാല് ഉത്തരക്കടലാസിനൊപ്പമുള്ള സ്കോര്ഷീറ്റ് മാത്രം മാറ്റി പുതിയവ ചേര്ത്തു നല്കും. പൂര്ണമായും ഓണ്ലൈന് ടാബുലേഷന് സംവിധാനത്തിലൂടെയുള്ള ഇത്തവണത്തെ മൂല്യനിര്ണയത്തിനു ശേഷം ഏപ്രില് അവസാനം പ്ലസ് ടു പരീക്ഷാഫലം പ്രസിദ്ധീകരിക്കും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha