സംസ്ഥാനത്തെ സ്‌കൂളുകള്‍ 30ന് അടയ്ക്കും. നേരത്തെ 31ന് അടയ്ക്കാനാണു തീരുമാനിച്ചിരുന്നതെങ്കിലും പ്രതിപക്ഷ അധ്യാപക സംഘടനകള്‍ സമരം പ്രഖ്യാപിച്ച സാഹചര്യത്തിലാണു തീരുമാനം മാറ്റിയത്. എസ്എസ്എല്‍സി മൂല്യനിര്‍ണയം മുന്‍ തീരുമാനപ്രകാരം 31നു തന്നെ തുടങ്ങുമെന്നു പൊതുവിദ്യാഭ്യാസ ഡയറക്ടര്‍ ഗോപാലകൃഷ്ണ ഭട്ട് അറിയിച്ചു.
സ്‌കൂള്‍ അടയ്ക്കുന്ന ദിവസം മൂല്യനിര്‍ണയം തുടങ്ങിയാല്‍ അധ്യാപകര്‍ക്കു സറണ്ടര്‍ ആനുകൂല്യം നഷ്ടപ്പെടുമെന്നും വിരമിക്കുന്നവര്‍ക്കു യാത്രയയപ്പു നല്‍കാന്‍ സാധിക്കില്ലെന്നും ചൂണ്ടിക്കാട്ടിയാണു പ്രതിപക്ഷ സംഘടനകള്‍ ബഹിഷ്‌കരണം പ്രഖ്യാപിച്ചിരുന്നത്.
പുതിയ തീരുമാനം വന്നതോടെ മൂല്യനിര്‍ണയ ക്യാംപില്‍ പങ്കെടുക്കുന്ന അധ്യാപകര്‍ക്കു 31നു സറണ്ടര്‍ ആനുകൂല്യം ലഭിക്കും. എസ്എസ്എല്‍സി ഫലം 16നു പ്രസിദ്ധീകരിക്കുമെന്നു മന്ത്രി നേരത്തെ തന്നെ പ്രഖ്യാപിച്ച സാഹചര്യത്തില്‍ മൂല്യനിര്‍ണയം നടത്തുന്ന അധ്യാപകരുടെ എണ്ണം 15,000ല്‍ നിന്ന് 20,000 ആക്കി. 

മൂല്യനിര്‍ണയ ക്യാംപുകളുടെ എണ്ണം 54 ആയി തുടരുമെങ്കിലും കൂടുതല്‍ ക്ലാസ്‌റൂമുകളിലായി കൂടുതല്‍ അധ്യാപകരെ നിയോഗിക്കാനാണു തീരുമാനം. 31നു തുടങ്ങുന്ന മൂല്യനിര്‍ണയം ഏപ്രില്‍ 10ന് അവസാനിക്കും. സ്‌കൂള്‍ അടയ്ക്കുന്ന തീയതി 30ലേക്കു മാറ്റിയ സാഹചര്യത്തില്‍ മൂല്യനിര്‍ണയ ക്യാംപ് ബഹിഷ്‌കരിച്ചുള്ള സമരം പിന്‍വലിച്ചതായി എകെഎസ്ടിയു ജനറല്‍ സെക്രട്ടറി അറിയിച്ചു.