കഴിഞ്ഞ 30 വര്‍ഷമായി മലയാള സിനിമയിലെ രാജാക്കന്മാരായി വാഴുന്നവരാണ് മമ്മൂട്ടിയും മോഹന്‍ലാലും. മറ്റു പല താരങ്ങളും വന്നെങ്കിലും മലയാളസിനിമയുടെ മുഖവും ബ്രാന്‍ഡുമാണ് മോഹന്‍ലാലും മമ്മൂട്ടിയും. ഏറ്റവും വലിയ ഫാന്‍സ് അസോസിയേഷനും ഈ താരങ്ങള്‍ക്കാണ്. ഇവരുടെ ആരാധകര്‍ തമ്മില്‍ ആരാണ് വലുത് മികച്ചത് എന്ന തരത്തില്‍ ഏറ്റമുട്ടുമെങ്കിലും യഥാര്‍ത്ഥ ജീവിതത്തില്‍ ഇവര്‍ രണ്ടും ഏറ്റവും അടുത്ത സുഹൃത്തുക്കളാണ്. അടുത്തിടെ ഒരു അഭിമുഖത്തില്‍ മമ്മൂക്കയുമായുള്ള സൗഹൃദത്തെക്കുറിച്ച് മോഹന്‍ലാല്‍ മറുപടി പറഞ്ഞു.

'നാലുപതിറ്റാണ്ടിലേറെയായി മത്സരബുദ്ധിയോടെ അഭിനയിക്കുന്ന രണ്ട് പേര്‍. ഇത്ര സൗഹൃദം എങ്ങനെ വരുന്നു?' എന്ന ചോദ്യത്തിന് ആരുപറഞ്ഞു ഞങ്ങള്‍ക്കിടയില്‍ മത്സരബുദ്ധിയുണ്ടെന്ന് അങ്ങനെയൊന്നും ഇല്ല എന്നായിരുന്നു മോഹന്‍ലാലിന്റെ മറുപടി. 'കുറച്ചു പേരല്ലേ മലയാള സിനിമയിലുള്ളൂ. എല്ലാവരും തമ്മില്‍ നല്ല സൗഹൃദത്തിലാണ്. നോക്കൂ, ഒടിയനില്‍ മമ്മൂട്ടിക്കയുടെ ശബ്ദം ഇല്ലേ ? ലൂസിഫറിന്റെ ടീസര്‍ അദ്ദേഹത്തിന്റെ ഒഫീഷ്യല്‍ പേജിലൂടെയല്ലേ പുറത്തിറങ്ങിയത്. അപ്പുവിന്റെ സിനിമയുടെ ടീസര്‍ ദുല്‍ഖറിന്റെ പേജില്‍ അല്ലേ ആദ്യം വന്നത് ?' മോഹന്‍ലാല്‍ പറഞ്ഞു.

'മമ്മൂട്ടിക്കയ്ക്ക് ചെയ്യാന്‍ പറ്റുന്ന സിനിമകള്‍ അദ്ദേഹം ചെയ്യുന്നു. എനിക്ക് ചെയ്യാവുന്നത് ഞാനും. റോളുകള്‍ തട്ടിയെടുക്കാനൊക്കെ പറ്റുമോ? അല്ലാതെ സോഷ്യല്‍ മീഡിയയില്‍ പറയുന്ന പോലൊന്നും സംഭവിക്കുകയേയില്ല. കുഞ്ഞാലി മരയ്ക്കാര്‍ പോലും അങ്ങനെയാണ്. അവര്‍ പ്ലാന്‍ ചെയ്ത സിനിമ നടക്കില്ല എന്നുറപ്പായപ്പോഴാണ് നമ്മള്‍ തുടങ്ങിയത് ' മോഹന്‍ലാല്‍ പറഞ്ഞു.

മലയാള സിനിമയിലെ ശ്രീകൃഷ്ണനാണ് മോഹന്‍ലാലെന്നും മമ്മൂട്ടി ശ്രീരാമനാണെന്നും ചിലര്‍ പറയുന്നതിനെക്കുറിച്ച് ചോദിച്ചപ്പോള്‍ അങ്ങനെയൊന്നും വിലയിരുത്തേണ്ട കാര്യമില്ലെന്നും ഈ ചോദ്യം നിങ്ങള്‍ മമ്മൂട്ടിക്കയോട് ചോദിച്ചാല്‍ അദ്ദേഹം 'അഡല്‍റ്റ് പേരന്റ്' എന്ന നിലയില്‍ ഗൗരവത്തിലുള്ള ഉത്തരം പറയുമെന്നും മോഹന്‍ലാല്‍ പറഞ്ഞു. 'അദ്ദേഹത്തിന്റെ ഉള്ളിലും പ്രണയവും സ്‌നേഹവും എല്ലാം ഉണ്ട്. പക്ഷേ ഒരു മുഴുനീള രക്ഷിതാവെന്ന നിലയിലാകും അദ്ദേഹം ഉത്തരം പറയുക. പെരുമാറുക. ഒരു സാധനം എടുക്കേണ്ട എന്നദ്ദേഹം പറഞ്ഞാല്‍ പിന്നെ അതിനു ശ്രമിച്ചിട്ടു കാര്യമില്ല. അതു കേള്‍ക്കാന്‍ അദ്ദേഹത്തിനൊപ്പം ആള്‍ക്കാരുമുണ്ട്. പക്ഷേ എനിക്കങ്ങനെ പറയാനാകില്ല. എനിക്കൊപ്പമുള്ളവര്‍ അതെന്താ അതെടുത്താല്‍ എന്നു തിരിച്ചു ചോദിച്ചേക്കാം ? ഈ വ്യത്യാസമൊക്കെ കൊണ്ടാകാം അങ്ങനെ വിലയിരുത്തുന്നുത്. അറിയില്ല.' മോഹന്‍ലാല്‍ പറഞ്ഞു.