മോഹന്‍ലാലിന്റെ മകള്‍ വിസ്മയ മോഹന്‍ലാലിന്റെ അരങ്ങേറ്റ ചിത്രമായ തുടക്കത്തിന്റെ ക്ലൈമാക്‌സ് ഫൈറ്റ് ചിത്രീകരണത്തിന്റെ ആവേശകരമായ നിമിഷങ്ങള്‍ പങ്കുവച്ച് അണിയറ പ്രവര്‍ത്തകര്‍. ക്ലൈമാക്‌സ് ആക്ഷന്‍ രംഗങ്ങളുടെ ബിഹൈന്‍ഡ് ദി സീന്‍സ് വീഡിയോകളാണ് അണിയറപ്രവര്‍ത്തകര്‍ പുറത്തുവിട്ടിരിക്കുന്നത്.

ഷൂട്ട് ചെയ്ത രംഗങ്ങള്‍ മോണിറ്ററില്‍ കണ്ടശേഷം ആവേശത്തോടെ തുള്ളിച്ചാടിയും സഹപ്രവര്‍ത്തകരെ ആലിംഗനം ചെയ്തും അവര്‍ക്ക് കൈകൊടുത്തും സന്തോഷം പങ്കിടുന്ന വിസ്മയ മോഹന്‍ലാലിനെ ബിടിഎസ് വീഡിയോയില്‍ കാണാം. ചിത്രത്തില്‍ വില്ലനായെത്തുന്ന ആശിഷ് ആന്റണിയും തമ്മിലാണ് അവസാനത്തെ ഫൈറ്റ് സീന്‍ നടക്കുന്നത്. ഷൂട്ട് ചെയ്ത ദൃശ്യങ്ങളില്‍ സംതൃപ്തരായി ഇരുവരും കൈകൊടുത്ത് ചിരിക്കുന്നതും ദൃശ്യങ്ങളില്‍ കാണാം.

ഫ്രാന്‍സില്‍നിന്നുള്ള ആക്ഷന്‍ കൊറിയോഗ്രാഫര്‍ യാനിക് ബെന്‍ ആണ് അവസാനരംഗത്തിലെ ഫൈറ്റ് സംവിധാനം ചെയ്തിരിക്കുന്നത്. ഹോളിവുഡ്, ബോളിവുഡ് ചിത്രങ്ങളില്‍ സംഘട്ടനരംഗങ്ങള്‍ ഒരുക്കിയിട്ടുള്ള യാനിക് ബെന്നിനൊപ്പം സ്റ്റണ്ട് സില്‍വയും തുടക്കത്തിലെ ആക്ഷന്‍ രംഗങ്ങളുടെ ഭാഗമായി. തായ്‌ലന്‍ഡിന്റെ ആയോധനകലയായ മൊയ് തായ് ആണ് ചിത്രത്തിലെ ആക്ഷന്‍ രംഗങ്ങളില്‍ പ്രധാനമായും ഉപയോഗിച്ചിരിക്കുന്നത്. ഏറെ നാള്‍ മൊയ് തായ് പരിശീലനം നടത്തിയിട്ടുള്ള വിസ്മയയ്ക്ക് ചിത്രത്തിലെ ഫൈറ്റ് രംഗങ്ങള്‍ അനായാസം വഴങ്ങിയെന്നുതന്നെ പറയാം.

കൊവിഡ് കാലത്ത് തായ്‌ലന്‍ഡില്‍ കുടുങ്ങിപ്പോയ സമയത്താണ് വിസ്മയ മൊയ് തായ് പരിശീലിച്ചത്. തന്റെ ശരീരഭാരം കുറയ്ക്കുന്നതിന് മൊയ് തായ് ഏറെ ഫലപ്രദമായിട്ടുണ്ടെന്ന് വിസ്മയതന്നെ തുറന്നുപറഞ്ഞിട്ടുണ്ട്.