വെടിമരുന്ന് ചേർത്ത പൈനാപ്പിൾ കഴിച്ച് ആന ചരിഞ്ഞ സംഭവം ഏറെ വേദനയോടെയാണ് കേരളം കേട്ടത്. മനുഷ്യ മനസാക്ഷിയെ ഞെട്ടിച്ച ഈ സംഭവത്തിൽ കൂടെ നിന്ന ആനകളുടെ കണ്ണുകൾ പോലും ഈറനണിഞ്ഞു. ഒരു മിണ്ടാപ്രാണിയോട് ചിലർ കാണിച്ച കണ്ണില്ലാത്ത ക്രൂരതയിൽ വിറങ്ങലിച്ചിരിക്കുകയാണ് മനസാക്ഷിയുള്ള മനുഷ്യർ ആകെയും. സ്ഫോടക വസ്തുക്കൾ നിറച്ച പെെനാപ്പിൾ നൽകി ആനയെ കൊന്ന സംഭവത്തിൽ വ്യാപകമായ പ്രതിഷേധമാണ് പല ഇടങ്ങളിൽ നിന്നും ഉയർന്നുകൊണ്ടിരിക്കുന്നത്. സംഭവത്തിൽ പ്രതികരിച്ചുകൊണ്ട് രംഗത്തേക്ക് എത്തിയിരിക്കുകയാണ് നടൻ ഉണ്ണി മുകുന്ദൻ. മനുഷ്യൻ എന്ന് വിളിക്കുന്നതിൽ അപമാനം തോന്നുന്നുവെന്നും മനുഷ്യനായതിൽ താൻ ഖേദിക്കുന്നുവെന്നുമാണ് നടൻ ഉണ്ണി മുകുന്ദൻ തന്റെ ഫേസ്ബുക്കിൽ കുറിച്ചത്.

ഉണ്ണിയുടെ കുറിപ്പ് വായിക്കാം;

മനുഷ്യൻ എന്ന് വിളിക്കപ്പെടുന്നതിൽ നാണം തോന്നുന്നു. ഇങ്ങനെ ഒരു വാർത്ത ഇന്ന് വായിച്ചപ്പോൾ തൊട്ട്.. ഈ അടുത്തായി ഇത്രയും വേദനിപ്പിക്കുന്ന വാർത്ത കേട്ടിട്ടില്ല എന്നുതന്നെ പറയാം.. മനുഷ്യൻ ഇത്രെയും ക്രൂരൻ ആണോ? എങ്ങനെ ആ പാവത്തിനോട് നമുക്കു ഇത്രെയും ക്രൂരത കാണിക്കാൻ തോന്നിയത്.. ഒരു മനുഷ്യൻ ആയതിൽ ഇന്ന് ഞാൻ ഖേദിക്കുന്നു. അത്രയും വിഷമത്തോടെ പറയുന്നു. ആ പാവത്തിനോട് ഇത്രെയും മനുഷ്യത്വരഹിത പ്രവർത്തി കാണിച്ച എല്ലാ തെണ്ടികളും നരകത്തിൽ പോകും. വെറുതെ അല്ല ദൈവം കൊറോണ തന്നതു..