ഹോം ക്വാറന്റീനിൽ കഴിയുന്ന പൃഥ്വിരാജിന്റെ രണ്ടാം കോവിഡ് പരിശോധനാ ഫലവും നെഗറ്റീവ്. ഫലം നെഗറ്റീവ് ആയതോടെ പതിനഞ്ചാം ദിവസമായ ജൂൺ അഞ്ചിന് പൃഥ്വി സ്വന്തം ഫ്‌ളാറ്റിലേക്കു മടങ്ങും. ബ്ലെസി സംവിധാനം ചെയ്യുന്ന ആടുജീവിതത്തിന്റെ ജോർദ്ദാനിലെ ചിത്രീകരണത്തിനു ശേഷം കൊച്ചിയിലെത്തി ക്വാറന്റീനിൽ കഴിയുകയായിരുന്നു താരം.

കഴിഞ്ഞ ദിവസം നടത്തിയ കോവിഡ് ടെസ്റ്റിന്റെ ഫലം ഫെയ്സ്ബുക്ക് പേജിലൂടെ താരം പങ്കുവയ്ക്കുകയും ചെയ്തിരുന്നു. ടെസ്റ്റ് റിസൾട്ട് നെഗറ്റീവ് ആണെങ്കിലും ക്വാറന്റീൻ പൂർത്തിയാക്കിയതിനു ശേഷമേ വീട്ടിലേക്ക് മടങ്ങൂ എന്നും അദ്ദേഹം പറഞ്ഞിരുന്നു.ഇതിനിടെ ആടുജീവിതം അണിയറപ്രവർത്തകരിൽ ഒരാൾക്ക് കോവിഡ് സ്ഥിരീകരിച്ചത് വലിയ ആശങ്കകൾക്കു വഴി വച്ചിരുന്നു. പുതിയ ഫലം വന്നതോടെ പൃഥ്വിയുടെ ആരാധകർ സന്തോഷത്തിലാണ്.

ആടുജീവിതത്തിന്റെ ചിത്രീകരണത്തിനായി ജോർദ്ദാനിലേക്ക് പോയ പൃഥ്വിരാജും സംഘവും കോവിഡിനെത്തുടർന്ന് അവിടെ കുടുങ്ങുകയായിരുന്നു. ഏകദേശം രണ്ടര മാസത്തിനു ശേഷം മെയ് 22നാണ് സംഘം പ്രത്യേക വിമാനത്തിൽ കൊച്ചിയിലെത്തിയത്. അതിനിടെ സിനിമയുടെ പ്രധാന ഭാഗങ്ങൾ ജോർദ്ദാനിൽ ചിത്രീകരിച്ചിരുന്നു. ജോർദ്ദാനിലെ ഷെഡ്യൂൾ പൂർത്തിയാക്കിയതിനു ശേഷമായിരുന്നു സംഘത്തിന്റെ മടക്കം.