കമല്‍ഹാസൻ നായകനായി ഏറ്റവും ഒടുവില്‍ പ്രദര്‍ശനത്തിന് എത്തിയതാണ് 'വിക്രം'. ലോകേഷ് കനകരാജ് ആണ് ചിത്രം സംവിധാനം ചെയ്‍തത്. മികച്ച പ്രതികരണമാണ് ചിത്രം തിയറ്ററുകളില്‍ നിന്ന് നേടുന്നത്. 'വിക്രം' സിനിമയുടെ വിജയത്തിന് പിന്നാലെ ഫഹദ് ഫാസിലിനെ വാനോളം പുകഴ്ത്തി കൊണ്ട് കമല്‍ഹാസന്‍ രംഗത്തെത്തിയിരുന്നു. ഫഹദ് ഫാസില്‍ അപാര ടാലന്റുള്ള നടനാണെന്നും ദക്ഷിണേന്ത്യയുടെ സ്വത്താണെന്നുമായിരുന്നു ഉലകനായകൻ പറഞ്ഞത്. എന്നാലിപ്പോഴിതാ ഫഹദ് ഫാസിൽ എന്ന നടന്റെ അഭിനയമികവ് അത്ഭുതമാണെന്നും അത് ആരെയും അമ്പരപ്പിക്കുമെന്നും പറഞ്ഞിരിക്കുകയാണ് സംവിധായകൻ ലോകേഷ് കനകരാജ്.

വിക്രമി’ന്റെ വിജയവുമായി ബന്ധപ്പെട്ട് കൊച്ചിയിൽ നടന്ന പ്രസ് മീറ്റിൽ സംസാരിച്ചുകൊണ്ട് ലോകേഷ് കനകരാജ് പറഞ്ഞതിങ്ങനെയായിരുന്നു.. അദ്ദേഹം എങ്ങനെയാണ് അഭിനയിക്കുന്നത് എന്ന് എനിക്കും അറിയില്ല. അത് അദ്ദേഹത്തിന്റെ മാജിക്കാണ്. ഞാനും അത്രത്തോളം പ്രതീക്ഷിച്ചിരുന്നില്ല. കാരവാനിൽ പോയി സീൻ അദ്ദേഹത്തോട് സംസാരിക്കും. എങ്ങനെ വേണം എന്നൊക്കെ ഞാൻ അദ്ദേഹത്തോട് പറയും. ആ സമയം ഞാൻ മാത്രമായിരിക്കും സംസാരിക്കുക. ക്യാമറയ്ക്ക് മുന്നിൽ എത്തുമ്പോൾ അദ്ദേഹം അമർ ആയി മാറും. കണ്ണുകൾ കൊണ്ട് ഇത്രയേറെ അഭിനയിക്കുക എന്നത് ആശ്ചര്യം തന്നെയാണ്. എങ്ങനെയാണ് സാർ കണ്ണുകൊണ്ട് ഇങ്ങനെ അഭിനയിക്കുന്നത് എന്ന് ഞാൻ ഇടക്ക് ചോദിക്കും’ ലോകേഷ് പറഞ്ഞു.’വിക്രമി’ൽ അമർ എന്ന കഥാപാത്രത്തെയാണ് ഫഹദ് അവതരിപ്പിച്ചത്.