ഏറെക്കാലത്തെ പ്രണയത്തിനൊടുവില്‍ വിഘ്‍നേശ് ശിവനും നയൻതാരയും വിവാഹിതരായത് ജൂൺ ഒമ്പതിനായിരുന്നു. മഹാബലിപുരം ഷെറാട്ടണ്‍ ഗ്രാന്‍ഡ് ഹോട്ടലില്‍ വച്ചായിരുന്നു വിവാഹം. താരങ്ങള്‍ ഉള്‍പ്പടെയുള്ള സുഹൃത്തുക്കളുടെയും അടുത്ത ബന്ധുക്കളുടെയും സാന്നിദ്ധ്യത്തിലായിരുന്നു വിവാഹം. ഇപ്പോഴിതാ വീണ്ടും വിവാദമായിരിക്കുകയാണ് ആ വിവാഹം. മഹാബലിപുരത്ത് വെച്ച് നടന്ന വിവാഹത്തിനെതിരെ നല്‍കിയ പരാതി ദേശീയ മനുഷ്യാവകാശ കമ്മീഷന്‍ സ്വീകരിച്ചു. ചെന്നൈ മഹാബലിപുരം ഇസിആർ റോഡിലെ സ്റ്റാർ ഹോട്ടലിൽ വെച്ചായിരുന്നു ആഡംബര വിവാഹം നടന്നിരുന്നത്. മുംബൈയിലെ ശാദി സ്ക്വാഡ് ഇവന്‍റ് മാനേജ്മെന്‍റ് ഗ്രൂപ്പായിരുന്നു വിവാഹ വേദിയും മറ്റ് സൗകര്യങ്ങളും ഒരുക്കിയിരുന്നത്.

വിവാഹ വേദിക്ക് ചുറ്റും കൂടുതൽ കർശന നിയന്ത്രണങ്ങൾ കാരണം ഹോസ്റ്റലിന് പുറത്തുള്ള റോഡിൽ പോലും പൊതുജനങ്ങള്‍ക്കും മാധ്യമപ്രവർത്തകര്‍ക്കും പ്രവേശനം നിഷേധിച്ചിരുന്നു. നൂറിലേറെ സ്വകാര്യ അംഗരക്ഷകരെയും ഇവിടെ വിന്യസിച്ചിരുന്നു. വിവാഹ ക്ഷണക്കത്തിലെ ബാര്‍കോഡ് സ്‌കാൻ ചെയ്‌തായിരുന്നു ക്ഷണിക്കപ്പെട്ടവരെ അകത്തേക്ക് കടത്തിവിട്ടിരുന്നത്. ഇതോടെ സ്റ്റാർ ഹോട്ടലിന് പിന്നിലുള്ള പൊതു ബീച്ചിലൂടെ പോലും പൊതുജനങ്ങൾക്ക് പ്രവേശനം നിഷേധിച്ചിരുന്നു. ഇവിടെയുണ്ടായിരുന്ന സ്വകാര്യ സെക്യൂരിറ്റി ജീവനക്കാരനുമായി പൊതുജനങ്ങൾ വാക്കുതർക്കത്തിലേർപ്പെട്ടത് അടുത്തിടെ വലിയ വാർ‍ത്തയായിരുന്നു.

വിവാഹത്തിന്‍റെ പേരിൽ പൊതുജനങ്ങളുടെ സഞ്ചാരം പോലും നടസ്സപ്പെടുത്തിയെന്ന് ആരോപിച്ചാണ് സാമൂഹിക പ്രവർത്തകനായ ശരവണൻ ദേശീയ മനുഷ്യാവകാശ കമ്മിഷനിൽ പരാതി നൽകിയിരിക്കുന്നത്. പൊതുവായുള്ള ബീച്ചിലേക്ക് പൊതുജനങ്ങളെ പ്രവേശിപ്പിക്കാത്തത് മനുഷ്യാവകാശ ലംഘനമാണെന്നും പരാതിയില്‍ ആരോപിച്ചിട്ടുണ്ട്. ദേശീയ മനുഷ്യാവകാശ കമ്മീഷൻ ഹർജി വാദം കേൾക്കുന്നതിനായി സ്വീകരിച്ചിട്ടുമുണ്ട്. വിവാഹശേഷം വീട്ടിൽ പോലും കയറാതെ ഇരുവരും എത്തിയത് ആന്ധ്രാപ്രദേശിലെ തിരുപ്പതി വെങ്കിടേശ്വര ക്ഷേത്രത്തിൽ ദർശനത്തിനായിരുന്നു. ക്ഷേത്രത്തിനുള്ളിൽ ചെരുപ്പ് ധരിച്ച് നടന്നതിനും ഫോട്ടോഷൂട്ട് നടത്തിയതിനും ദമ്പതികൾക്ക് വക്കീൽ നോട്ടീസ് നല്കിയിരുന്നു. പിന്നാലെ ഇരുവരും ക്ഷമാപണം നടത്തുകയായിരുന്നു.