തെലുങ്ക് സിനിമാ ലോകത്തെ പ്രിയപ്പെട്ട താര ജോഡികളായ നാഗ ചൈതന്യയും സാമന്തയും തമ്മിലുള്ള വിവാഹ മോചനം ഏറെ ചര്‍ച്ചയായ വാര്‍ത്തയായിരുന്നു. വിവാഹമോചനത്തിന് പിന്നാലെ ഇരുവരും തങ്ങളുടെ കരിയര്‍ തിരക്കുകളിലേക്ക് മാറി. ഇപ്പോഴിതാ നാഗചൈതന്യ പുതിയ പ്രണയം കണ്ടെത്തിയെന്ന വാര്‍ത്തയാണ് പുറത്തു വരുന്നത്. കുറുപ്പ് എന്ന സിനിമയിലൂടെ മലയാളത്തില്‍ ശ്രദ്ധേയയായ ശോഭിത ധുലിപാലയാണ് നടന്റെ പുതിയ കാമുകിയെന്നാണ് ടൈംസ് ഓഫ് ഇന്ത്യ റിപ്പോര്‍ട്ട്. ഇക്കാര്യത്തില്‍ ഇരുവരും ഇതുവരെ പരസ്യമായി പ്രതികരിച്ചിട്ടില്ല. മോഡലും നടിയുമായ ശോഭിത മേജര്‍ എന്ന ചിത്രത്തിലാണ് ഏറ്റവുമൊടുവിലായി ബിഗ് സ്‌ക്രീനിലെത്തിയത്. മേഡ് ഇന്‍ ഹെവന്‍ എന്ന ആമസോണ്‍ പ്രൈം സീരീസിലൂടെയാണ് നടി ശ്രദ്ധേയായത്. ദുൽഖറിനൊപ്പം കുറുപ്പിൽ ചെയ്ത വേഷം നടിയെ മലയാളികൾക്കും പരിചിതയാക്കി. നിരവധി അഭ്യൂഹങ്ങള്‍ക്ക് വിരാമമിട്ട് ഒക്ടോബര്‍ 2നാണ് സാമന്തയും നാഗചൈതന്യയും വേര്‍ പിരിഞ്ഞത്. 2017 ലാണ് ഇരുവരും വിവാഹിതരായത്. വിവാഹ മോചനത്തിന് പിന്നാലെ വ്യാപകമായ സൈബര്‍ ആക്രമണം സാമന്തയ്ക്കെതിരെ വന്നിരുന്നു. വിവാഹ മോചന വാര്‍ത്ത പുറത്തുവന്നതിന് പിന്നാലെ ആളുകള്‍ തന്നെ പറ്റി മോശം പ്രചരണങ്ങൾ നടത്തുന്നെന്നും ഇത് വേദനാജനകമാണെന്നും സാമന്ത വ്യക്തമാക്കിയിരിക്കുന്നു. സാമന്ത ഇപ്പോൾ പുതിയ സിനിമകളുടെ തിരക്കിലാണ്.