മലയാള സിനിമയിലെ അഭിനേതാക്കളുടെ സംഘടനയായ 'അമ്മ'യുടെ ജനറല്‍ ബോഡി യോഗം ഈ മാസം 26 ന് നടക്കും. അമ്മയുടെ 28-ാം ജനറല്‍ ബോഡി യോഗമാണ് നടക്കാനിരിക്കുന്നത്. കൊച്ചിയിലെ അമ്മയുടെ ആസ്ഥാന മന്ദിരത്തില്‍ വെച്ചായിരിക്കും യോഗം. പ്രസിഡണ്ട് മോഹന്‍ലാലിന്റെ അധ്യക്ഷതയിലാണ് ജനറല്‍ ബോഡി യോഗം ചേരുക. രാവിലെ പത്ത് മണിക്ക് ജനറല്‍ ബോഡി യോഗത്തിന്റെ നടപടികള്‍ ആരംഭിക്കും. വിജയ് ബാബു വിഷയത്തില്‍ ഐ സി ( ഇന്റേണല്‍ കംപ്ലെയ്ന്റ് ) കമ്മിറ്റിയില്‍ നിന്നും നടി ശ്വേതാമേനോന്‍, കുക്കു പരമേശ്വരന്‍, മാലാ പാര്‍വതി എന്നിവര്‍ രാജി വെച്ചത് പ്രധാന ചര്‍ച്ചാ വിഷയമാകും.

നിലവിൽ ഐസി കമ്മിറ്റിയുടെ പ്രവർത്തനം ഇല്ലാത്ത സാഹചര്യമാണുള്ളത് ഇതുമായി കഴിഞ്ഞ ദിവസം ചേർന്ന എക്സിക്യൂട്ടീവ് കമ്മിറ്റിയിൽ ചർച്ച നടന്നെങ്കിലും തീരുമാനമായിട്ടില്ല. ഇതോടൊപ്പം തന്നെ വൈസ് പ്രസിഡണ്ട് മണിയൻപിള്ള രാജു നടത്തിയ പരാമർശവും ചർച്ചയാകും ഇതുകൂടാതെ താര സംഘടനയിൽ നിന്നും രാജി വെച്ച ഹരീഷ് പേരടിയുടെ നിലപാടും ചർച്ച ചെയ്യേണ്ടതായി വരും. ദിലീപ് കേസിന് പുറമെ നിരവധി വിഷയങ്ങളാണ് ഇത്തവണത്തെ അമ്മ ജനറല്‍ ബോഡി യോഗത്തില്‍ ചര്‍ച്ചയ്ക്ക് വരാന്‍ സാധ്യത. അവസരം വാഗ്ദാനം ചെയ്ത് നടനും നിര്‍മാതാവുമായ വിജയ് ബാബു പീഡിപ്പിച്ചു എന്ന യുവനടിയുടെ പരാതിയാണ് അമ്മയെ അടുത്തിടെ ഏറ്റവും പ്രതിസന്ധിയിലാക്കിയത്. നിലവിൽ ഇത്തവണത്തെ ജനറൽബോഡിയിൽ പല കാര്യങ്ങൾക്കും തീരുമാനം എടുക്കേണ്ടതായി വരും.