മമ്മൂട്ടിയുടെ ഏറ്റവും പുതിയ സിനിമയാണ് റൊഷാക്ക്. ചിത്രത്തില്‍ വില്ലന്‍വേഷം കൈകാര്യം ചെയ്തിരിക്കുന്നത് ആസിഫ് അലിയാണ്. എന്നാല്‍ റോഷാക്കിലെ വില്ലന്റെ കാര്യത്തില്‍ ഒരു പ്രത്യേകതയുണ്ട്. ഇതുവരെ കണ്ടുവന്ന സിനിമാ രീതിവച്ച് എല്ലാ കഥാപാത്രങ്ങളുടെയും മുഖം വ്യക്തമായി സിനിമയില്‍ കാണാന്‍ സാധിക്കും. അതു വില്ലനായാലും സഹനടനായാലും.

എന്നാല്‍ റോഷാക്ക് സിനിമയിലെ വില്ലന്റെ മുഖം ആര്‍ക്കും കാണാന്‍ സാധിക്കില്ല. കണ്ണുകള്‍കൊണ്ട് അഭിനയിച്ച താരം. റോഷാക്കില്‍ മുഖം കാണിക്കാതെ തന്നെ പ്രേക്ഷകരുടെ കയ്യടി നേടിയ താരമാണ് ആസിഫ് അലി. ദിലീപ് എന്ന നെഗറ്റീവ് ഷെയ്ഡ് ഉള്ള കഥാപാത്രമായി മുഖംമൂടി അണിഞ്ഞ് പ്രത്യക്ഷപ്പെടുന്ന ആസിഫിന്റെ കണ്ണുകള്‍ പ്രേക്ഷകരുടെ മനസ്സില്‍ മായാതെ നില്‍ക്കും.

ഇപ്പോഴിതാ മുഖം കാണിക്കാതെ ചിത്രത്തില്‍ അഭിനയിക്കാന്‍ സമ്മതം മൂളിയ ആസിഫ് അലിക്ക് നന്ദി പറയുകയാണ് മമ്മൂട്ടി.സിനിമയുടെ അണിയറപ്രവര്‍ത്തകര്‍ക്കെല്ലാം ആസിഫിനോട് മനസ് നിറഞ്ഞ സ്‌നേഹമാണെന്ന് മമ്മൂട്ടി പറയുന്നു. അബുദാബിയിലെ റോഷാക്ക് സക്‌സസ് സെലിബ്രേഷന് ശേഷം നടന്ന പ്രസ് മീറ്റില്‍ ആസിഫിനോട് അനീതി കാണിച്ചോ എന്ന ചോദ്യത്തിന് മറുപടി പറയുകയായിരുന്നു അദ്ദേഹം.

''ആസിഫ് അലിയോട് നീതിയോ അനീതിയോ ഒന്നുമില്ല. ഈ സിനിമയുടെ മുന്നിലും പിന്നിലും പ്രവര്‍ത്തിച്ച എല്ലാവര്‍ക്കും മനസ്സു നിറഞ്ഞ സ്‌നേഹമാണ് അവനോട്. ഒരു നടനെ സംബന്ധിച്ചിടത്തോളം ശരീരത്തിനപ്പുറത്തേക്ക് അയാളുടെ മുഖമാണ് പ്രധാനം. ആ മുഖം മറച്ച് അഭിനയിക്കാന്‍ തയ്യാറായ ആളെ മുഖം കൊണ്ട് അഭിനയിച്ച ആള്‍ക്കാരെക്കാള്‍ റെസ്‌പെക്ട് ചെയ്യണം. അയാള്‍ക്ക് ഒരു കയ്യടി വേറെ കൊടുക്കണം.

മനുഷ്യന്റെ ഏറ്റവും എക്‌സ്‌പ്രെസീവ് ആയ അവയവമാണ് കണ്ണ്. ആസിഫ് അലിയുടെ കണ്ണുകള്‍ ഈ സിനിമയില്‍ അഭിനയിച്ചിട്ടുണ്ട്, സൂക്ഷിച്ച് നോക്കണം. കണ്ണുകളിലൂടെയാണ് ആസിഫ് ഈ സിനിമയിലുണ്ടെന്ന് ആളുകള്‍ക്ക് മനസിലായത്. അത്രത്തോളം ആ നടന്‍ കണ്ണ് കൊണ്ട് ഈ സിനിമയില്‍ അഭിനയിച്ചിട്ടുണ്ട്. ഞങ്ങള്‍ക്കെല്ലാം വികാരം പ്രകടിപ്പിക്കാന്‍ മറ്റ് അവയവങ്ങളെല്ലാമുണ്ടായിരുന്നെങ്കില്‍ ആസിഫിന് കണ്ണ് മാത്രമേ ഉണ്ടായിരുന്നുള്ളൂ. ഒരു കയ്യടി കൂടി ആസിഫിന് കൊടുക്കാം.''മമ്മൂട്ടി പറഞ്ഞു.
റോഷാക്ക് ഒരു പരീക്ഷണ സിനിമയാണ്. എല്ലാ സിനിമകളും ഒരു തരത്തില്‍ അല്ലെങ്കില്‍ മറ്റൊരുതരത്തില്‍ പരീക്ഷണങ്ങള്‍ തന്നെയാണ്. എന്നാല്‍ റോഷാക്കിന്റേത് വേറിട്ട സഞ്ചാരപാതയാണ്. ആ വ്യത്യസ്തതയ്ക്ക് പ്രേക്ഷകര്‍ പ്രതീക്ഷിച്ചതിനേക്കാള്‍ മികച്ച പ്രതികരണമാണ് നല്‍കിയത്. സിനിമയെ സൂക്ഷ്മവിശകലനം നടത്തിയുളള പ്രതികരണങ്ങള്‍ സന്തോഷം നല്‍കി. നിങ്ങളെന്റെ കൂടെ നില്‍ക്കൂ, കയ്യടിച്ച് മുന്നോട്ടുപോകാമെന്നും മമ്മൂട്ടി പറഞ്ഞു.