പ്രയാഗ്‌രാജിലെ കുംഭമേളയിലൂടെ സോഷ്യല്‍ മീഡിയയില്‍ തരംഗമായ ഉത്തര്‍പ്രദേശ് സ്വദേശിനിയുടെ വിവാഹം കേരളത്തില്‍ നടന്ന സംഭവത്തില്‍ രാഷ്ട്രീയ വിവാദം പുകയുന്നു. വിവാഹത്തെ അനുകൂലിച്ച് സി.പി.എം. സംസ്ഥാന സെക്രട്ടറി എം.വി. ഗോവിന്ദന്‍ രംഗത്തെത്തി. ഈ വിവാഹത്തെ ഒരു 'കേരള സ്‌റ്റോറി' എന്നാണ് അദ്ദേഹം വിശേഷിപ്പിച്ചത്. കേരളത്തിലെ മതസൗഹാര്‍ദ്ദവും സുരക്ഷിതത്വവും തേടിയാണ് ദമ്പതികള്‍ ഇവിടെ എത്തിയതെന്ന് അദ്ദേഹം വാര്‍ത്താ സമ്മേളനത്തില്‍ പറഞ്ഞു.

യുവാവും യുവതിയും കേരളത്തിലെ പോലീസ് സ്‌റ്റേഷനില്‍ നേരിട്ടെത്തിയാണ് വിവാഹം കഴിക്കാനുള്ള ആഗ്രഹം പ്രകടിപ്പിച്ചതെന്ന് എം.വി. ഗോവിന്ദന്‍ വിശദീകരിച്ചു. കൃത്യമായ രേഖകള്‍ പരിശോധിച്ച ശേഷമാണ് വിവാഹം നടന്നതെന്നും അദ്ദേഹം കൂട്ടിച്ചേര്‍ത്തു.

'കേരളത്തില്‍ വിവാഹം കഴിക്കാന്‍ സാധിക്കുന്ന സാഹചര്യമുണ്ടെന്ന് അറിഞ്ഞാണ് അവര്‍ ഇവിടെ എത്തിയത്. ആധാര്‍ കാര്‍ഡും മറ്റ് തിരിച്ചറിയല്‍ രേഖകളും പോലീസ് കൃത്യമായി പരിശോധിച്ചിട്ടുണ്ട്. ഇതില്‍ അസ്വാഭാവികമായി ഒന്നുമില്ല.' – എം.വി. ഗോവിന്ദന്‍ പറഞ്ഞു.

വിവാഹവുമായി ബന്ധപ്പെട്ട് ഉയര്‍ന്ന ആരോപണങ്ങളില്‍ പോലീസിന് വീഴ്ച പറ്റിയിട്ടില്ലെന്ന റിപ്പോര്‍ട്ടാണ് പുറത്തുവരുന്നത്. യുവതി ഹാജരാക്കിയ ആധാര്‍ കാര്‍ഡ് ഔദ്യോഗിക വെബ്‌സൈറ്റ് വഴി പരിശോധിച്ചതായും അത് യഥാര്‍ത്ഥമാണെന്നും പോലീസ് കണ്ടെത്തിയിട്ടുണ്ട്. ആധാര്‍ കാര്‍ഡിലെ അതേ നമ്പറാണ് ജനന സര്‍ട്ടിഫിക്കറ്റിലും രേഖപ്പെടുത്തിയിരിക്കുന്നത്. എന്നാല്‍ ജനന സര്‍ട്ടിഫിക്കറ്റിന്റെ ആധികാരികത ഉറപ്പുവരുത്താന്‍ നിലവില്‍ മറ്റ് സംവിധാനങ്ങളില്ലെന്നും പോലീസ് റിപ്പോര്‍ട്ടില്‍ ചൂണ്ടിക്കാട്ടുന്നു.