എല്ലാം നിയമപരമായി തന്നെ... വെളിപ്പെടുത്തലുമായി വിഘ്‌നേഷ് നയന്‍ താര ദമ്പതികള്‍; വിവാഹം കഴിഞ്ഞ് നാലു മാസത്തിനുള്ളില്‍ വാടക ഗര്‍ഭധാരണത്തിലൂടെ അമ്മയായതില്‍ നിയമപ്രശ്‌നങ്ങള്‍ ഇല്ലെന്ന് താര ദമ്പതികളായ നയന്‍താരയും ഭര്‍ത്താവ് വിഘ്‌നേഷ് ശിവനും. ആറു വര്‍ഷം മുന്‍പ് വിവാഹം റജിസ്റ്റര്‍ ചെയ്തിരുന്നുവെന്നും കഴിഞ്ഞ ഡിസംബറിലാണ് വാടക ഗര്‍ഭധാരണത്തിന് നടപടികള്‍ തുടങ്ങിയതെന്നും താരദമ്പതികള്‍ തമിഴ്‌നാട് ആരോഗ്യ വകുപ്പിന് നല്‍കിയ സത്യവാങ്മൂലത്തില്‍ അറിയിച്ചു.

വിവാഹ റജിസ്റ്റര്‍ രേഖകളും ഇതോടൊപ്പം സമര്‍പ്പിച്ചിട്ടുണ്ട്. വിവാഹം കഴിഞ്ഞ് ആറു വര്‍ഷം കഴിയാതെ വാടക ഗര്‍ഭധാരണത്തിന് നിലവില്‍ നിയമം അനുവദിക്കുന്നില്ല. കുഞ്ഞുങ്ങള്‍ ജനിച്ച വിവരം പുറത്തു വന്നതിനു പിന്നാലെ ഇക്കാര്യം ചൂണ്ടികാണിച്ച് തമിഴ്‌നാട് സര്‍ക്കാര്‍ അന്വേഷണം പ്രഖ്യാപിച്ചത്.

ആരോഗ്യ വിദ്യാഭ്യാസ ഡയറക്ടറുടെ നേതൃത്വത്തിലുള്ള സംഘമാണ് വാടക ഗര്‍ഭധാരണത്തിനുള്ള നിയമങ്ങള്‍ താരം ലംഘിച്ചോയെന്ന് അന്വേഷിക്കുന്നത്. ചെന്നൈയിലെ വധ്യതാ ക്ലിനിക്കില്‍ വച്ചാണ് പ്രസവം നടന്നതെന്ന വിവരം നേരത്തെ പുറത്തായിരുന്നു. ദുബൈയില്‍ താമസിക്കുന്ന മലയാളിയാണ് വാടക ഗര്‍ഭം ധരിച്ചതെന്ന വിവരവും പുറത്തുവന്നിട്ടുണ്ട്.

ഇരുവര്‍ക്കും കുട്ടികള്‍ ജനിച്ചത് വാടക ഗര്‍ഭപാത്രത്തിലൂടെയാണെന്നും ഇരട്ടക്കുട്ടികളാണ് ജനിച്ചിരിക്കുന്നതെന്നും വിഗ്‌നേഷ് ശിവന്‍ തന്നെയാണ് ട്വിറ്ററിലൂടെ നേരത്തെ പങ്കുവെച്ചത്. ആ കുറുപ്പിന്റെ രൂപം ഇങ്ങനെ: 'നയന്‍താരയും ഞാനും അമ്മയും അപ്പനും ആയിരിക്കുന്നു. ഇരട്ട ആണ്‍ കുട്ടികള്‍ പിന്ന് ഞങ്ങള്‍ അനുഗ്രഹീതരായിരിക്കുന്നു.

ഞങ്ങളുടെ പ്രാര്‍ത്ഥനയുടെയും ഞങ്ങളുടെ പൂര്‍വികരുടെ അനുഗ്രഹവും കൂടിച്ചേര്‍ന്ന് ആണ് ഞങ്ങള്‍ക്ക് കുട്ടികള്‍ ഉണ്ടായിരിക്കുന്നത്.ഞങ്ങളുടെ ഉയിരിനും ഉലകത്തിനും എല്ലാവരുടെയും ആശീര്‍വാദം വേണം. ജീവിതം കുറേക്കൂടെ പ്രകാശഭരിതവും കൂടുതല്‍ മനോഹരവും ആയിരിക്കുന്നു. ദൈവം വളരെ ശക്തിമാനാണ്' എന്ന് പറഞ്ഞാണ് കുറിപ്പ് അവസാനിപ്പിച്ചിരിക്കുന്നത്.