പന്തീരാങ്കാവ് യുഎപിഎ കേസില് താഹയുടെ ജാമ്യം റദ്ദാക്കി; അലന് ഷുഹൈബിന്റെ ജാമ്യം തുടരും; ഹൈക്കോടതി നടപടി എന്.ഐ.എയുടെ അപ്പീലില്; അലന്റെ പ്രായം കോടതി പരിഗണിച്ചു; എന്ഐഎ കോടതിയില് നല്കിയ കുറ്റപത്രത്തില് ഒന്നാം പ്രതി അലന് ഷുഹൈബ്; കേസിന് തിരിച്ചടി
പന്തീരാങ്കാവ് യുഎപിഎ കേസില് താഹ ഫസലിന്റെ ജാമ്യം ഹൈക്കോടതി റദ്ദാക്കി. താഹയോട് ഉടന് കീഴടങ്ങാന് കോടതി ഉത്തരവിട്ടു. അതേ സമയം അലന് ഷുഹൈബിന്റെ ജാമ്യം തത്കാലം റദ്ദാക്കുന്നില്ലെന്ന് കോടതി വ്യക്തമാക്കി. ഇരുവരുടേയും ജാമ്യം റദ്ദാക്കണമെന്നാവശ്യപ്പെട്ട് എന്ഐഎ സമര്പ്പിച്ച അപ്പീലിലാണ് നടപടി.
തെളിവുകള് പരിശോധിക്കാതെയാണ് പ്രതികള്ക്ക് ജാമ്യം അനുവദിച്ചത് എന്നായിരുന്നു എന്ഐഎയുടെ വാദം. തുടര്പഠനവും ചികിത്സയും കണക്കിലെടുത്താണ് അലന്റെ ജാമ്യം റദ്ദാക്കാതിരുന്നത്. അലന് ഷുഹൈബില് നിന്ന് പിടിച്ചെടുത്ത ലഘുലേഖകള് യുഎപിഎ നിലനില്ക്കാന് പര്യാപ്തമായ തെളിവ് അല്ല. പ്രതിയുടെ പ്രായവും കണക്കിലെടുക്കുന്നു എന്ന് കോടതി പറഞ്ഞു. പ്രതികരിക്കാന് ഇല്ലെന്ന് അലന്റെ കുടുംബം വ്യക്തമാക്കി. പിന്നീട് പ്രതികരിക്കാമെന്ന് താഹയുടെ കുടുംബം പ്രതികരിച്ചു.
2019 നവംബര് ഒന്നിനായിരുന്നു മാവോയിസ്റ്റ് ബന്ധം ആരോപിച്ച് ഇരുവരെയും പന്തീരാങ്കാവ് പോലീസ് അറസ്റ്റ് ചെയ്തത്. പിന്നീട് സെപ്റ്റബര് 9ന് കോടതി കര്ശന ഉപാധികളോടെ ഇരുവര്ക്കും ജാമ്യം അനുവദിക്കുകയായിരുന്നു. കേസില് ഇരുവര്ക്കും യുഎപിഎ ചുമത്തിയതിനെതിരെ വ്യാപകമായ പ്രതിഷേധം ഉയര്ന്നിരുന്നു. കേസ് പിന്നീട് എന്ഐഎ ഏറ്റെടുക്കുകയായിരുന്നു. അറസ്റ്റിലായി പത്ത് മാസവും ഒമ്പത് ദിവസവും പിന്നിടുമ്പോഴാണ് ഇരുവര്ക്കും ജാമ്യം ലഭിച്ചത്. ഇപ്പോള് താഹയുടെ ജാമ്യം റദ്ദാക്കുകയും ചെയ്തു.
കേസില് കഴിഞ്ഞ വര്ഷം ഏപ്രില് 27നാണ് ദേശീയ അന്വേഷണ ഏജന്സി കൊച്ചിയിലെ എന്ഐഎ കോടതിയില് കുറ്റപത്രം സമര്പ്പിച്ചത്. അലന് ഷുഹൈബാണ് കേസിലെ ഒന്നാം പ്രതി. താഹാ ഫസല് രണ്ടാം പ്രതിയും സി പി ഉസ്മാന് മൂന്നാം പ്രതിയുമാണ്. മൂന്നാം പ്രതി ഉസ്മാന് ഒളിവിലാണെന്ന് കുറ്റപത്രത്തില് പറയുന്നു. മൂന്നുപേരും നിരോധിത സംഘടനയായ സിപിഐ മാവോയിസ്റ്റിലെ അംഗങ്ങളാണെന്നു കുറ്റപത്രത്തില് പറയുന്നു.
https://www.facebook.com/Malayalivartha