വി എസ് അച്യുതാനന്ദന്‍ ഭരണ പരിഷ്‌കാര കമ്മീഷന്‍ അധ്യക്ഷ സ്ഥാനം ഉടന്‍ ഒഴിയും. സ്ഥാനം ഒഴിയുന്നതിന് മുന്നോടിയായി കാവടിയാറിലെ ഔദ്യോഗിക വസതി ഒഴിഞ്ഞു. ബാര്‍ട്ടന്‍ ഹില്ലിലെ വീട്ടിലേക്ക് ഇന്നലെ താമസം മാറി. കഴിഞ്ഞ ഒക്ടോബറില്‍ വി.എസ് 97 വയസ് പിന്നിട്ടിയിരുന്നു. 

1932 ഓക്ടോബര്‍ 20 -ന് ആലപ്പുഴയിലാണ് വെലിക്കക്കത്ത് ശങ്കരന്‍ അചുതാനന്ദന്റെ ജനനം. 2006 മുതല്‍ 2011 വരെ കേരള മുഖ്യമന്ത്രിയായിരുന്ന അദ്ദേഹം ഇന്ത്യയിലെ ഏറ്റവും മുതിര്‍ന്ന രാഷ്ട്രീയ പ്രവര്‍ത്തകരിലൊരാളാണ്.

ഭരണ പരിഷ്‌കാര കമ്മിഷന്‍ അധ്യക്ഷന്റെ ഔദ്യോഗിക വസതി വിട്ട് വി.എസ് പുറത്തിറങ്ങിയിട്ട് ഏതാണ്ട് ഒരു വര്‍ഷത്തിലധികമാകുന്നു. അസുഖവും പ്രായത്തിന്റെ ക്ഷീണവും ഒരു ഘടകമാണ്. കോവിഡ് കാലത്ത് പ്രത്യേകിച്ച്. തലച്ചോറിലുണ്ടായ രക്തസ്രാവത്തെ തുടര്‍ന്ന് വിഎസിന് ആശുപത്രിയില്‍ കഴിയേണ്ടി വന്നിരുന്നു. ഇതിനുശേഷം പൂര്‍ണ വിശ്രമമാണ് ഡോക്ടര്‍മാര്‍ നിര്‍ദേശിച്ചിരിക്കുന്നത്. അതുകൊണ്ടുതന്നെ സന്ദര്‍ശകരെ സ്വീകരിക്കുന്നില്ല. ചിട്ടയായ ജീവിത രീതികള്‍ കൊണ്ട് പതിവ് ജീവിതത്തിലേക്ക് അദ്ദേഹം ഏറെക്കുറെ മടങ്ങിവന്നെങ്കിലും നടക്കുന്നതിന് പരസഹായം വേണ്ടിവരുന്നു. പത്രങ്ങള്‍ വായിച്ചാണ് കേള്‍ക്കുന്നത്. രാഷ്ട്രീയ രംഗത്തെ ഓരോ ചലനങ്ങളും കൃത്യമായി മനസിലാക്കുന്നു എന്നാണറിവ്. എങ്കിലും കേരള രാഷ്ട്രീയത്തില്‍ കലഹം തീര്‍ക്കുന്ന ഇടപെടലുകള്‍ മാത്രം ഇല്ല. പൂര്‍ണ നിശബ്ദത. ഒരു വരി പ്രസ്താവനയുടെ പേരിലുള്ള വി എസ് മോഡല്‍ ധിക്കാരമില്ല.

കൊറോണയെ ചാരി പലരും പലതില്‍ നിന്നും പല വിധത്തില്‍ രക്ഷപ്പെടുമ്പോള്‍ അങ്ങനെ വി എസിന്റെ കാര്യത്തില്‍ രക്ഷപെടാനാകുമോ. തെരഞ്ഞെടുപ്പുകളില്‍ പട നയിക്കാന്‍ വി എസ് വേണമെന്ന് പാര്‍ട്ടിയെ ബോധ്യപ്പെടുത്താന്‍ കൃഷ്ണയ്യറെ പോലുള്ളവര്‍ ഇറങ്ങി വന്നപ്പോള്‍ കമ്യൂണിസ്റ്റ് മന്ത്രിസഭ തന്നെ തിരികെ വന്നതും അതിന്റെ സുഖസൗകര്യങ്ങളില്‍ മുഴുകുകയും ചെയ്യുമ്പോള്‍ വി എസും തൃപ്തിപ്പെട്ടു എന്നു വേണം കരുതാന്‍. അല്ലെങ്കില്‍ ക്യാബിനറ്റ് സൗകര്യങ്ങളോടെ ഒരു പരിഷ്‌കരണ സാധ്യതയുമില്ലാത്ത കമ്മീഷന്റെ തലപ്പത്ത് എത്തിക്കുകയിരുന്നു. ഖജനാവിലെ ചോര്‍ച്ചക്ക് ഒരു വഴി മാത്രമാക്കി ആ സംവിധാനം ശരിക്കും 'കമ്മീഷനായി' തുടരുകയാണെന്ന ആക്ഷേപവും ശക്തമായിരുന്നു. പദവി ഒഴിഞ്ഞതിലൂടെ ഈ ആക്ഷേപത്തില്‍ നിന്നും വി.എസ് ഒഴിയുകയാണ്.

സമരങ്ങളുടെ ചൂട് പകര്‍ന്ന ആലപ്പുഴയിലെ പുന്നപ്രയില്‍ ജനിച്ച വി എസിന് എന്നും കൂട്ട് സമരങ്ങള്‍ തന്നെയാണ്. ജീവിത പ്രാരാബ്ധങ്ങളോട് പടവെട്ടി വന്ന അച്യുതാനന്ദന്‍ അങ്ങനെ കലഹപ്രിയനായി വളര്‍ന്നു. വിദ്യാഭ്യാസം ഏഴാം തരത്തില്‍ അവസാനിപ്പിച്ച് തൊഴിലാളികള്‍ക്കായി കൊടി പിടിച്ചു. അറസ്റ്റ്, ജയില്‍വാസം, മര്‍ദ്ദനം ഇങ്ങനെ കമ്യൂണിസ്റ്റ് ജീവിതത്തെ വളര്‍ത്തി. പാര്‍ട്ടി ബാലറ്റിലൂടെ ഭരണയന്ത്രം തിരിച്ചു തുടങ്ങിയപ്പോള്‍ വി എസ് പാര്‍ട്ടി തലപ്പത്ത് എത്തിയിരുന്നു. അങ്ങനെ വളര്‍ന്ന വി എസ് പരമോന്നത പദവിയായ പൊളിറ്റ് ബ്യൂറോയില്‍ എത്തിയെങ്കിലും കലഹം പാര്‍ട്ടി വിരുദ്ധ പ്രവര്‍ത്തനമാകുന്ന കാലമായതോടെ വി എസ് പുറത്ത്. ഇന്ന് കേന്ദ്ര കമ്മിറ്റിയില്‍ ക്ഷണിതാവിന്റെ കസേരയില്‍ വിഎസ് ഉണ്ട്. ഇത് പാര്‍ട്ടി അദ്ദേഹത്തോട് കാട്ടുന്ന അവഗണനയുടെ ബാക്കി പത്രമാണ്.