കര്ഷകരുടെ രക്തം കൈയില് പുരളാന് ആഗ്രഹിക്കുന്നില്ല...നിയമം നടപ്പാക്കരുത്...കേന്ദ്ര സര്ക്കാരിനോട് സുപ്രീംകോടതി; അല്ലെങ്കില് കാര്ഷിക നിയമ ഭേദഗതികള് സ്റ്റേ ചെയ്യും; കര്ഷകര് സമര വേദി മാറ്റണമെന്നും സുപ്രീംകോടതി; കോടതിവിധി എന്തായാലും നടപ്പാക്കുമെന്ന സര്ക്കാറിന്റെ മുന് വാഗ്ദാനം പാലിക്കുമോ?
കാര്ഷിക നിയമത്തില് കേന്ദ്ര സര്ക്കാരിന് തിരിച്ചടി. നിയമ ഭേദഗതി തല്ക്കാലം നടപ്പാക്കരുതെന്ന് സുപ്രീംകോടതി. കാര്ഷിക നിയമങ്ങള് നടപ്പാക്കുന്നതു മാറ്റിവച്ചില്ലെങ്കില് കോടതി അത് ചെയ്യുമെന്നും മുന്നറിയിപ്പ് നല്കി. കാര്ഷിക നിയമങ്ങളുമായി ബന്ധപ്പെട്ട ഹര്ജികള് കേള്ക്കവെ ചീഫ് ജസ്റ്റിസ് എസ്.എ. ബോബ്ഡെയാണ് ഈ നിലപാടെടുത്തത്. ചര്ച്ചകള് നടക്കുന്നതായി സര്ക്കാര് ആവര്ത്തിക്കുമ്പോഴും എന്ത് ചര്ച്ചയാണ് നടപ്പാക്കുന്നതെന്നും ചീഫ് ജസ്റ്റിസ് ചോദിച്ചു.
നിയമം നടപ്പാക്കിയ കേന്ദ്ര സര്ക്കാര് നിലപാടില് അതൃപ്തി പ്രകടിപ്പിച്ച കോടതി പല സംസ്ഥാനങ്ങളില് നിന്നും ബില്ലിനെതിരെ രംഗത്ത് വന്നതും ചൂണ്ടിക്കാട്ടി. പല സംസ്ഥാനങ്ങളും എതിര്ക്കുന്ന നിയമങ്ങളില് എന്തു കൂടിയാലോചന നടന്നു എന്നാണ് കോടതി കേന്ദ്രസര്ക്കാരിനോട് ചോദിച്ചത്. കര്ഷകരുടെ രക്തം തങ്ങളുടെ കൈയില് പുരളാന് തങ്ങള്ക്ക് താല്പര്യമില്ലെന്ന് സുപ്രീകോടതി വ്യക്തമാക്കി. എന്നാല് സമരക്കാര് സമരവേദി മാറ്റണമെന്ന നിര്ദേശവും സുപ്രീംകോടതി മുന്നോട്ട് വച്ചിട്ടുണ്ട്.
നിയമങ്ങള് നടപ്പാക്കുന്നതുമായി ബന്ധപ്പെട്ട് കര്ഷകരുടെ ആശങ്കകള് പരിഹരിക്കാന് കമ്മിറ്റിയെ നിയമിക്കണമെന്നും അവരുടെ റിപ്പോര്ട്ട് വരുന്നതുവരെ നിയമങ്ങള് നടപ്പാക്കുന്നത് നീട്ടിവയ്ക്കണമെന്നും ഇല്ലെങ്കില് ഞങ്ങള്ക്കതു ചെയ്യേണ്ടിവരുമെന്നും രൂക്ഷമായ ഭാഷയില് കോടതി സര്ക്കാരിനു മുന്നറിയിപ്പു നല്കിയത് ഏറെ ശ്രദ്ധിക്കപ്പെട്ടു.
കോടതിവിധി എന്തായാലും നടപ്പാക്കുമെന്നാണ് കര്ഷകനേതാക്കള്ക്ക് കൃഷിമന്ത്രി നരേന്ദ്രസിങ് നരേന്ദ്ര സിങ് തോമര് നല്കിയിട്ടുള്ള ഉറപ്പ്. ഈ സാഹചര്യത്തില് സുപ്രീംകോടതി വിധിയോടുള്ള സര്ക്കാരിന്റെ നിലപാട് നിര്ണായകമാണ്. ഇതൊരുനയപരമായ വിഷയമാണെന്നും തീരുമാനമെടുക്കേണ്ടത് സര്ക്കാരാണെന്നുമാണ് കര്ഷക സംഘടനകള് അന്ന് മറുപടി നല്കിയത്.
പുതിയ കാര്ഷികനിയമങ്ങള് നടപ്പാക്കുന്നത് താത്കാലികമായി നിര്ത്തിവെക്കുന്ന രീതിയില് സുപ്രീംകോടതി ഉത്തരവുണ്ടായാല് കേന്ദ്രസര്ക്കാരിന് തത്കാലം അത് ആശ്വാസമാകും. എന്നാല് വേദി മാറണമെന്ന് സുപ്രീംകോടതി നിര്ദേശം സമരം താത്കാലികമായി അവസാനിപ്പിക്കാന് കര്ഷകരും നിര്ബന്ധിതരായേക്കുമെന്ന സംശവുമുണ്ട്.
പാര്ലമെന്റ് സമ്മേളനം ഈ മാസം അവസാനം ചേരാനിരിക്കെ കാര്ഷികനിയമങ്ങളില് ഭേദഗതി വരുത്താനുള്ള പ്ലാന് ബിയും കേന്ദ്രം തയാറാക്കിയതായി അറിയുന്നു. കര്ഷകര് ഇതിനകം ആശങ്ക ഉന്നയിച്ചിട്ടുള്ള വിഷയങ്ങളില് ഭേദഗതി വരുത്തി ബില്ലോ അതിനുമുമ്പ് ഓര്ഡിനന്സോ കൊണ്ടുവരാനാണ് നീക്കം. കാര്ഷികാവശിഷ്ടങ്ങള് കത്തിച്ചാലുള്ള ഭീമമായ പിഴയില്നിന്ന് കര്ഷകരെ ഒഴിവാക്കി ദേശീയതലസ്ഥാനമേഖലയിലെ വായുമലിനീകരണനിയന്ത്രണ നിയമത്തില് ഭേദഗതി കൊണ്ടുവരും. ഇങ്ങനെ താത്കാലികമായി കര്ഷകരോഷം ശമിപ്പിക്കാനുള്ള ശ്രമത്തിലായിരുന്നു കേന്ദ്രസര്ക്കാര്.
https://www.facebook.com/Malayalivartha