കുവൈറ്റില്‍ ബസ്, ടാക്‌സി നിരക്ക് വര്‍ദ്ധിപ്പിച്ചുകൊണ്ട് ആഭ്യന്തര മന്ത്രി ശൈഖ് മുഹമ്മദ് അല്‍ ഖാലിദ് അസ്സബാഹ് ഉത്തരവ് പുറപ്പെടുവിച്ചു. എയര്‍പോര്‍ട്ട് ടാക്‌സി നിരക്കുകളും വര്‍ധിപ്പിച്ചിട്ടുണ്ട്. അഞ്ച് ദിനാര്‍ മുതല്‍ 18 ദിനാര്‍ വരെയായിരിക്കും ഓരോ ഭാഗത്തുനിന്നും എയര്‍പോര്‍ട്ടിലേക്കുള്ള നിരക്കുകള്‍. പുതുക്കിയ നിരക്കനുസരിച്ച് റോമിങ് ടാക്‌സികള്‍ക്കു 350 ഫില്‍സ് ആയിരിക്കും മിനിമം ചാര്‍ജ്. പിന്നീടുള്ള ഓരോ കിലോമീറ്ററിനും 125 ഫില്‍സു നല്‍കണം. 40 ഫില്‍സാണു റോമിങ് ടാക്‌സികളുടെ വെയ്റ്റിങ് ചാര്‍ജ്ജ്.
കാള്‍ ടാക്‌സിക്ക് മിനിമം നിരക്ക് 600 ഫില്‍സ് ആണ്. പിന്നീടുള്ള ഓരോ കിലോമീറ്ററിനും 200 ഫില്‍സ് നല്‍കണം. കാത്തിരിപ്പിന് ഓരോ മിനിറ്റിനും 70 ഫില്‍സ് ആണ്. ഇന്ധന വിലവര്‍ധനവ് സെപ്റ്റംബര്‍ ഒന്നിന് പ്രാബല്യത്തില്‍ വരുന്ന സാഹചര്യത്തിലാണ് നിരക്ക് വര്‍ദ്ധനവ്. ചെറിയ വരുമാനക്കാരായ തൊഴിലാളികള്‍ക്ക് ഇത് തിരിച്ചടിയാകും. കൃത്യമായ നിരക്ക് നിശ്ചയിച്ചല്ല നിലവില്‍ ടാക്‌സിയോട്ടം. നിലവില്‍ മിനിമം 750 ഫില്‍സ് മുതല്‍ ഒരു ദീനാര്‍ വരെ ടാക്‌സിക്ക് ഈടാക്കാറുണ്ട്.
ഒരു സ്‌റ്റേജിന് 150 ഫില്‍സ് ആണ് പുതിയ നിരക്കനുസരിച്ച് ബസ് ചാര്‍ജ്. കുവൈറ്റ് സിറ്റിയില്‍നിന്ന് മൂന്നാം റിങ് റോഡിന് സമീപത്തേക്കും തിരിച്ചും 200 ഫില്‍സാണ് പുതിയ നിരക്ക്. സിറ്റിയില്‍നിന്ന് നാലാം റിങ് റോഡ് പരിധിയിലെ താമസസ്ഥലങ്ങളിലേക്ക് 250 ഫില്‍സ്, അഞ്ചാം റിങ് റോഡ് പരിധിയിലേക്ക് 300 ഫില്‍സ്, ആറാം റിങ് ഭാഗത്തേക്ക് 350 ഫില്‍സ്, അഹ്മദി ഫഹാഹീല്‍ ഭാഗത്തേക്ക് 600 ഫില്‍സ്, ഫിന്‍ദാസ് ഭാഗത്തേക്ക് 500 ഫില്‍സ്, ജഹ്‌റ ഭാഗത്തേക്ക് 600 ഫില്‍സ്, എന്നിവയാണ് പുതുക്കിയ നിരക്കുകള്‍. കുവൈറ്റ് സിറ്റിയില്‍ നിന്ന് ഫഹാഹീലിലേക്കും, ജഹ്‌റ ഭാഗത്തേക്കുമുള്ള നിരക്കുകളില്‍ 100 ശതമാനം വര്‍ദ്ധനവാണ് വരുത്തിയിരിക്കുന്നത്.