മലയാളി വാര്ത്ത.
ഇന്ത്യയുടെ അടിസ്ഥാന സൗകര്യ വികസന മേഖലയിലെ വിവിധ പദ്ധതികളില് യു.എ.ഇ പതിനായിരം കോടിരൂപ നിക്ഷേപിക്കും. ഇന്ത്യയില് യു.എ.ഇയുടെ തന്ത്രപ്രധാന കരുതല് എണ്ണ ശേഖരണ കേന്ദ്രവും സ്ഥാപിക്കും. ഗതാഗതം, ഊര്ജം, വാര്ത്താവിനിമയം, മുബൈ - ഡല്ഹി വ്യവസായ ഇടനാഴി തുടങ്ങിയ മേഖലകളിലാകും നിക്ഷേപം. അബുദാബി എമിറേറ്റ് പാലസില് നടന്ന ഇന്ത്യ-യു.എ.ഇ. ഉച്ചകോടിയിലാണ് തീരുമാനം.
അബുദാബി ഇന്വെസ്റ്റ്മെന്റ് അതോറിറ്റിയുടെ നേതൃത്വത്തിലായിരിക്കും ഇതിനുള്ള നടപടികള് സ്വീകരിക്കുക. ആനന്ദ്ശര്മയും അബുദാബി ഇന്വെസ്റ്റ്മെന്റ് അതോറിറ്റി അധ്യക്ഷന് ശൈഖ് ഹാമദ് ബിന് സായിദ് അല് നഹ്യാനും തമ്മില് ഉച്ചകോടിയില് ഇതുസംബന്ധിച്ച് ചര്ച്ചനടത്തി.
പതിനായിരം കോടിരൂപയുടെ നിക്ഷേപത്തിലൂടെ ഇന്ത്യ- യു.എ.ഇ. വാണിജ്യബന്ധം കൂടുതല് ശക്തമാക്കുമെന്ന് ആനന്ദ്ശര്മ മാധ്യമപ്രവര്ത്തകരോട് പറഞ്ഞു.
ഇരു രാജ്യങ്ങളിലെയും പൊതു-സ്വകാര്യ മേഖലകള് സംയുക്തമായി മൂന്നാമതൊരു രാജ്യത്തില് പദ്ധതികള് തുടങ്ങുന്നതിനും ധാരണയായി.
നിക്ഷേപം സംബന്ധിച്ച ഇന്ത്യ-യു.എ.ഇ ഉന്നതതല ടാസ്ക് ഫോഴ്സിന്െറ പ്രഥമ യോഗത്തിലാണ് ഇക്കാര്യങ്ങളില് തീരുമാനമായത്. ഇന്ത്യയിലെ യു.എ.ഇയുടെ മുന്കാല നിക്ഷേപങ്ങളില് നിലനില്ക്കുന്ന പ്രശ്നങ്ങള് ചര്ച്ച ചെയ്യുന്നതിനും പരിഹരിക്കുന്നതിനും ടാസ്ക് ഫോഴ്സ് അംഗങ്ങളെ ഉള്പ്പെടുത്തി സമിതി രൂപവത്കരിക്കാന് തീരുമാനമായി. ഇതിന് പുറമേ അടിസ്ഥാന സൗകര്യ വികസനം, ഊര്ജം, ഉല്പാദനം-സാങ്കേതികവിദ്യ, വ്യാപാര നിക്ഷേപം, വിവര-വാര്ത്താവിനിമയ സാങ്കേതികത, വ്യോമയാനം എന്നീ മേഖലകളിലെ നിക്ഷേപ സാധ്യതകള് വിലയിരുത്തി ടാസ്ക് ഫോഴ്സിന് റിപ്പോര്ട്ട് നല്കാനും സമിതികള് രൂപവത്കരിക്കും.