സൗദി അറേബ്യയുടെ തലസ്​ഥാനമായ റിയാദിലേക്ക്​ യമൻ ഹൂതി വിമതർ വീണ്ടും മിസൈൽ ആക്രമണം നടത്തിയതായി റിപ്പോർട്ടുകൾ. ബുധനാഴ്​ച രാവിലെ 11 മണിയോടെ രണ്ട് ബാലിസ്റ്റിക് മിസൈലുകളാണ് റിയാദിനെ ലക്ഷ്യമാക്കി എത്തിയത്.

എന്നാൽ സൗദിയുടെ പാട്രിയറ്റ്​ മിസൈൽ പ്രതിരോധ സംവിധാനം രണ്ടുമിസൈലുകളെയും വിജയകരമായി തകർത്തിട്ടു. സംഭവത്തെക്കുറിച്ചുള്ള കൂടുതൽ വിവരങ്ങൾ അറിവായിട്ടില്ല. കാര്യമായ നാശനഷ്​ടങ്ങളില്ലെന്നാണ്​ സൂചന. ഇറാൻ സഹായത്തോടെയാണ്​ ഹൂതി വിമതർ സൗദി അറേബ്യക്ക്​ നേരെ ആക്രമണങ്ങൾ നടത്തുന്നത്​. റിയാദിന്​ നേർക്ക്​ കഴിഞ്ഞ ആറുമാസത്തിനിടെ പലതവണ മിസൈലുകൾ വന്നിരുന്നു. അതേസമയം എല്ലാ മിസൈലുകളെയും സൗദി മിസൈൽ പ്രതിരോധ സംവിധാനം തകർക്കുകയും ചെയ്​തിരുന്നു.