ഭാരതാംബയുടെ ചിത്രം കസേരയില്‍ വച്ച് വിളക്ക് കൊളുത്തി കൗണ്‍സിലര്‍ ഓഫീസിലെ പ്രവര്‍ത്തനം ഇന്നുമുതല്‍ ശ്രീലേഖ ആരംഭിച്ചു. ചെറിയ ഒരിടത്ത് താന്‍ സേവനം തുടങ്ങിയെന്ന് ഫേസ്ബുക്ക് പോസ്റ്റിലൂടെ ശ്രീലേഖ പ്രതികരിച്ചു.ഇതിന്റെ ചിത്രങ്ങളും പങ്കുവച്ചിട്ടുണ്ട്. ഒരു മുറിയെന്ന് പറയാന്‍ ആവില്ലെന്നും ചെറിയ ഒരിടം മാത്രമാണ് ഇതെന്നും ശ്രീലേഖ കുറിച്ചു. കഷ്ടിച്ച് 75 സ്‌ക്വയര്‍ ഫീറ്റ് മാത്രം. ചുറ്റും മാലിന്യമാണെന്നും അവര്‍ കുറിപ്പില്‍ വ്യക്തമാക്കി.

ശാസ്തമംഗലത്തെ കോര്‍പറേഷന്‍ കെട്ടിടത്തിലെ വി കെ പ്രശാന്തിന്റെ ഓഫീസ് ഒഴിയണമെന്ന് നേരത്തെ ശ്രീലേഖ ആവശ്യപ്പെട്ടിരുന്നു. തന്റെ ഓഫീസ് സൗകര്യപ്രദമായി പ്രവര്‍ത്തിപ്പിക്കുന്നതിന് പ്രശാന്ത് ഒഴിയണമെന്നാണ് ശ്രീലേഖ ആവശ്യപ്പെട്ടത്. വിഷയം വിവാദമായതോടെ താന്‍ കൗണ്‍സില്‍ ഓഫീസില്‍ തന്നെ തുടരുമെന്നായിരുന്നു ശ്രീലേഖയുടെ നിലപാട്. പിന്നാലെയാണ് വിഷയം വീണ്ടും ഉന്നയിച്ച് ഫേസ്ബുക്ക് പോസ്റ്റ് പങ്കുവച്ചിരിക്കുന്നത്.

പോസ്റ്റിന്റെ പൂര്‍ണരൂപം

ഇന്ന് മുതല്‍ സേവനം തുടങ്ങി.

ഒരു മുറിയെന്ന് പറയാന്‍ ആവില്ല... ചെറിയ ഒരിടം. ആത്മാര്‍ത്ഥതയുള്ള ഒരു ജനസേവികക്ക് ഇവിടെയും പ്രവര്‍ത്തിക്കാം...

ഇന്ന് ഉച്ച വരെ ഇവിടെ വന്നത് 18 പേര്‍. അവരെ സഹായിച്ചതില്‍ തൃപ്തി. അത് മതി. എന്റെ ഇത്തിരിപ്പോന്ന കുഞ്ഞ് ഓഫീസ് മുറി. കഷ്ടിച്ചു 70-75 സ്‌ക്വയര്‍ ഫീറ്റ്. പക്ഷെ ചുറ്റിനും ടണ്‍ കണക്കിന് വേയ്സ്റ്റ്!