മൂന്ന് ഇന്ത്യന്‍ എന്‍ജിനീയര്‍മാരെ തടവില്‍ നിന്നും മോചിപ്പിക്കാന്‍ 11 താലിബാന്‍ ഭീകരരെ വിട്ടുകൊടുത്തു
അഫ്ഗാന്‍ താലിബാന്‍ ഒരു വര്‍ഷത്തോളമായി തടവിലാക്കിയിരുന്ന ഇന്ത്യക്കാരായ മൂന്ന് എന്‍ജിനീയര്‍മാര്‍ക്ക് മോചിപ്പിക്കപ്പെട്ടതായി ദി എക്‌സ്പ്രസ് ട്രിബ്യൂണ്‍ മാധ്യമത്തെ ഉദ്ധരിച്ചു വാര്‍ത്താ ഏജന്‍സി പിടിഐ റിപ്പോര്‍ട്ട് ചെയ്തു. ഉന്നത റാങ്കുള്ളവരടക്കം താലിബാന്റെ 11 ഭീകരരെ പകരം നല്‍കിയാണു മോചനം സാധ്യമായതെന്നും അജ്ഞാത സ്ഥലത്തുവച്ച് ഇന്നലെയാണ് തടവുകാരുടെ കൈമാറ്റം നടന്നതെന്നും പറയപ്പെടുന്നു.
അഫ്ഗാന്‍ സര്‍ക്കാര്‍, യുഎസ് സേന എന്നിവര്‍ പിടികൂടിയ ഭീകരരെയാണോ കൈമാറിയതെന്ന കാര്യത്തില്‍ വ്യക്തതയില്ല. കാരണം താലിബാന്‍ വക്താക്കളോ ഔദ്യോഗിക പ്രതിനിധികളോ വിഷയത്തില്‍ പരസ്യമായി പ്രതികരിച്ചിട്ടില്ല. 2001-ല്‍ യുഎസ് സേന സ്ഥാനഭ്രഷ്ടരാക്കുന്നതു വരെ കുനാര്‍, നിമ്രോസ് പ്രവിശ്യകള്‍ ഭരിച്ചിരുന്ന ഗവര്‍ണര്‍മാരായ ഷെയ്ഖ് അബ്ദുര്‍ റഹിം, മൗലവി അബ്ദുര്‍ റഷിദ് എന്നീ താലിബാന്‍ നേതാക്കളും മോചിപ്പിക്കപ്പെട്ടവരില്‍ ഉണ്ടെന്നാണു വിവരം.
അഫ്ഗാനിസ്ഥാനിലെ ബഗ്ലാന്‍ പ്രവിശ്യയിലെ പവര്‍ പ്ലാന്റില്‍ എന്‍ജിനീയര്‍മാരായ ഏഴ് ഇന്ത്യക്കാരെ 2018-മേയിലാണു തട്ടിക്കൊണ്ടു പോയത്. സംഭവത്തില്‍ ആരും അവകാശവാദം ഉന്നയിച്ചിരുന്നില്ല. ഇതിലെ ഒരാള്‍ കഴിഞ്ഞ മാര്‍ച്ചില്‍ മോചിതനായി. അഫ്ഗാനിസ്ഥാനിലെ യുഎസ് പ്രത്യേക പ്രതിനിധി സല്‍മയ് ഖലില്‍സാദും താലിബാന്‍ പ്രതിനിധി മുല്ല അബ്ദുല്‍ഘാനി ബരാദറും നടത്തിയ കൂടിക്കാഴ്ചയെ തുടര്‍ന്നാണു ജയില്‍മോചനം. ഇതേപ്പറ്റി അഫ്ഗാന്‍, ഇന്ത്യന്‍ അധികൃതര്‍ പ്രതികരണത്തിന് തയാറായിട്ടില്ല.
https://www.facebook.com/Malayalivartha
