പ്രധാനമന്ത്രി നമിച്ചു, ലോകത്തിന് ഇനി ആ അമ്മയും, കേരളത്തിന് അഭിമാനം...വത്തിക്കാന് പ്രാര്ഥനാനിര്ഭരം.
സമ്പത്തോ വിദ്യാഭ്യാസമോ ലോകപരിചയമോ ഒന്നുമില്ലാതിരുന്നിട്ടും സഹനത്തിലൂടെയും സേവനത്തിലൂടെയും സമൂഹത്തിനു പുതുവെളിച്ചം പകര്ന്ന അമ്മ. പ്രാര്ഥനകളുടെ പൂര്ത്തീകരണം പ്രവൃത്തിയിലാണെന്നു സ്വജീവിതംകൊണ്ടു പ്രഘോഷിച്ച മറിയം ത്രേസ്യ ഞായറാഴ്ച പുണ്യപദവിയിലേക്ക് ഉയര്ത്തപ്പെടുമ്പോള് നിസ്വാര്ഥ സേവനം ചെയ്യുന്നവര്ക്കത് പ്രചോദനമാകുമെന്നു തീര്ച്ച.
മറിയം ത്രേസ്യയുടെ ജന്മംകൊണ്ടും കര്മംകൊണ്ടും വിശുദ്ധിയുടെ ഭൂപടത്തില് ഇടംനേടിയ കുഴിക്കാട്ടുശ്ശേരിയും ആത്മീയനിറവിലാണ്. പള്ളിയില് ഞായറാഴ്ച പ്രത്യേക പ്രാര്ഥനകള് നടക്കും. കുര്ബാനയ്ക്കും പ്രാര്ഥനകള്ക്കും മുന് അപ്പസ്തോലിക് നുണ്ഷ്യോ ആര്ച്ച് ബിഷപ്പ് മാര് ജോര്ജ് പാനികുളം നേതൃത്വം നല്കും. വിശുദ്ധപദവിയുടെ പ്രതീകമായി മറിയം ത്രേസ്യയുടെ രൂപത്തില് കിരീടം ചാര്ത്തും.
പ്രദക്ഷിണം, തിരുശേഷിപ്പ് വണക്കം, ഊട്ടുനേര്ച്ച തുടങ്ങിയവയും നടക്കും. ഉച്ചയ്ക്കു വത്തിക്കാനില് നടക്കുന്ന നാമകരണ തിരുക്കര്മങ്ങള് വലിയ ഡിജിറ്റല് സ്ക്രീനില് ലൈവായി കാണിക്കും. സഭാ മേലധ്യക്ഷരും വൈദികരും സന്ന്യസ്തരും മറിയം ത്രേസ്യയുടെ ബന്ധുക്കളും പൊതുപ്രവര്ത്തകരുമടങ്ങുന്ന വലിയ സംഘം വത്തിക്കാനിലെത്തിയിട്ടുണ്ട്. ശനിയാഴ്ച വൈകീട്ടു നടന്ന ജാഗരാനുഷ്ഠാന പ്രാര്ഥനയില് ഇവര് പങ്കെടുത്തു.
ഞായറാഴ്ച ഫ്രാന്സിസ് പാപ്പയുടെ നേതൃത്വത്തില് നടക്കുന്ന വിശുദ്ധപദവി പ്രഖ്യാപനത്തിനുശേഷം തിങ്കളാഴ്ച റോമിലെ വിശുദ്ധ അനസ്താസിയയുടെ ബസലിക്കയില് നടക്കുന്ന കൃതജ്ഞതാ ബലിയിലും ഇവര് പങ്കെടുക്കും. സിറോമലബാര് സഭ മേലധ്യക്ഷന് മാര് ജോര്ജ് ആലഞ്ചേരിയുടെ നേതൃത്വത്തില് നടത്തുന്ന ദിവ്യബലിയിലും പ്രാര്ഥനകളിലും സഭാപിതാക്കന്മാരും വൈദികരും സഹകാര്മികരാകും.
ഭാരത കത്തോലിക്ക മെത്രാന്സമിതി തലവനും മുംബൈ അതിരൂപത അധ്യക്ഷനുമായ കര്ദിനാള് ഓസ്വാള്ഡ് ഗ്രേഷ്യസ് സന്ദേശം നല്കും. തുടര്ന്ന് അനുമോദന സമ്മേളനവും സ്നേഹവിരുന്നും നടക്കും. ഇന്ത്യയെ പ്രതിനിധാനം ചെയ്ത് വിദേശകാര്യ സഹമന്ത്രി വി. മുരളീധരന്റെ നേതൃത്വത്തിലുള്ള സംഘവും വത്തിക്കാനിലുണ്ട്. വിശുദ്ധപദവി പ്രഖ്യാപനവുമായി ബന്ധപ്പെട്ട ഭാരതസഭയുടെ ആഘോഷം നവംബര് 16നു കുഴിക്കാട്ടുശ്ശേരിയില് നടക്കും.
https://www.facebook.com/Malayalivartha
