ഡച്ച് ഗ്രാമത്തില് അച്ഛനും മക്കളും നിലവറയില് കഴിഞ്ഞത് 9 വര്ഷം! ദുരൂഹത മാറ്റാന് ശ്രമിച്ച് അധികൃതര്
ഹോളണ്ടിലെ ഡെന്ത്ര പ്രവിശ്യയിലെ റുയീനര്വോള്ഡ് എന്ന ഗ്രാമത്തിനടുത്തുള്ള ഒരു ബാറിലേക്ക് രണ്ടു ദിവസമായി കടന്നുവരുന്ന പ്രാകൃതവേഷധാരിയായ യുവാവിനെ ബാര് ജീവനക്കാരന് ശ്രദ്ധിക്കുന്നുണ്ടായിരുന്നു. വല്ലാത്ത ആശങ്കയിലാണ് അയാളെന്ന് കാണുമ്പോള് തന്നെ മനസ്സിലാകുമായിരുന്നു. രണ്ടാമത്തെ ദിവസം എത്തിയിട്ട് പെട്ടെന്ന് വന്ന് അഞ്ച് ബിയറുകള് വേണമെന്ന് ആവശ്യപ്പെട്ടു. അത് എത്തിച്ചപ്പോള് തനിക്ക് സ്വന്തം വീട്ടിലേയ്ക്ക് പോകാനാവില്ല എന്നറിയിക്കുകയായിരുന്നു.
ഇതേ തുടര്ന്ന് ബാര് ജീവനക്കാരന് വിവരം അറിയിച്ചതിനെ തുടര്ന്ന് പോലീസ് എത്തിയപ്പോഴാണ് ഫാം ഹൗസിന്റെ വളപ്പിനുള്ളിലുള്ള അവരുടെ വീട്ടിലെ നിലവറയില്, ആ യുവാവിന്റെ 5 സഹോദരീ സഹോദരങ്ങളേയും അച്ഛനേയും കണ്ടെത്തിയത്. 18-നും 25-നും ഇടയ്ക്ക് പ്രായമുള്ളവരായിരുന്നു ആ യുവതീയുവാക്കള്. ഇവരെ സുരക്ഷിത സ്ഥാനത്തേക്ക് മാറ്റിയ പോലീസ്, ഓസ്ട്രിയന് പൗരത്വമുള്ള 58-കാരനായ ജോസഫ് എന്നയാളെ അറസ്റ്റ് ചെയ്തിട്ടുമുണ്ട്.
അലിഡാ ഓയ്വര് എന്ന സ്ത്രീയുടെ ഉടമസ്ഥതയിലുള്ള വീട് ജോസഫിന് താന് വാടകയ്ക്ക് നല്കിയിരുന്നതാണെന്നും, കൃത്യമായി വാടക തന്നിരുന്ന അയാള് ഒരിക്കലും അവിടെ മറ്റാരെങ്കിലും താമസിക്കുന്നതായി പറഞ്ഞിട്ടില്ലെന്നും അവര് വെളിപ്പെടുത്തി. ജോസഫ് ബൈനോക്കുലര് ഉപയോഗിച്ച് പരിസരവീക്ഷണം നടത്തുന്നത് കണ്ടിട്ടുണ്ടെന്നും അയല്ക്കാരേയോ മറ്റ് ആളുകളേയോ അടുപ്പിക്കുന്ന പ്രകൃതക്കാരനായിരുന്നില്ല ജോസഫെന്നും, അതുകൊണ്ടുതന്നെ അയാള് അവിടെ കഞ്ചാവ് കൃഷി നടത്തുന്നുണ്ടാവും എന്ന സംശയത്തിലായിരുന്നു ചിലരെന്നും സമീപവാസികള് പറഞ്ഞു. ഈ കുടുംബത്തിന് ജോസഫുമായുള്ള ബന്ധം എന്താണെന്ന് ഇതുവരെ വ്യക്തമായിട്ടില്ല. ഓസ്ട്രിയന് എംബസി താനുമായി ബന്ധപ്പെടാന് ശ്രമിക്കരുതെന്നും അവരുടെ സഹായം തനിക്ക് ആവശ്യമില്ലെന്നും ജോസഫ് അറിയിച്ചു.
ബാറിലെത്തിയ മൂത്തപുത്രന് ജാന് ഇക്കഴിഞ്ഞ ജൂണ് മുതല് സോഷ്യല് മീഡിയയില് സജീവമായിരുന്നു എന്നതും അയാള്ക്ക് അതിനാവശ്യമായ ലാപ്ടോപ്പ് മുതലായവ ഉണ്ടായിരുന്നു എന്നതും പോലീസ് അധികൃതരെ കുഴക്കുന്നുണ്ട്. ജാനോ കുടുംബത്തിലെ മറ്റംഗങ്ങളോ ഗവണ്മെന്റിന്റെ ഒരു ഡേറ്റാബേസിലും രജിസ്റ്റര് ചെയ്യപ്പെട്ടവരല്ലെന്നും പോലീസ് പറഞ്ഞു.ഈ കുടുബത്തെ അവരുടെ ഇഷ്ടത്തിനു വിരുദ്ധമായി തടങ്കലില് പാര്പ്പിച്ചിരിക്കുകയായിരുന്നോ എന്നും പോലീസ് അന്വേഷിക്കുന്നുണ്ട്.
https://www.facebook.com/Malayalivartha