2012-ല്‍ കാമുകനെ തീയിട്ടു കൊന്ന 32-കാരിക്ക് 60 വര്‍ഷത്തെ തടവുശിക്ഷ. ഉറങ്ങിക്കിടന്ന കാമുകനെ ചുട്ടു കൊന്ന ജീനാ വിര്‍ജീലോ എന്ന യുവതിക്ക് നീണ്ട ഏഴു വര്‍ഷത്തെ വിചാരണയ്ക്കൊടുവില്‍ അലാസ്‌കയിലെ കോടതിയാണ് ശിക്ഷ വിധിച്ചത്. ആദ്യം അറസ്റ്റ് ചെയ്യപ്പെടുമ്പോള്‍ ഇവരെ 10 വര്‍ഷം തടവിന് ശിക്ഷിക്കുകയും പിന്നീട് വിട്ടയയ്ക്കുകയും ചെയ്തിരുന്നു. പിന്നീട് കൂടുതല്‍ തെളിവുകള്‍ കണ്ടെത്തിയതോടെ വീണ്ടും 99 വര്‍ഷം തടവിന് ശിക്ഷിക്കുകയായിരുന്നു. ഇത്തവണ കോടതി ഇതില്‍ 39 വര്‍ഷം കുറച്ചതോടെയാണ് വിര്‍ജീലിയയ്ക്ക് 60 വര്‍ഷം തടവുശിക്ഷയായത്.

ഒരു ആവശ്യവുമില്ലാതെ ചെയ്തുപോയ ഭീകരമായ സംഭവത്തില്‍ താന്‍ അങ്ങേയറ്റം പശ്ചാത്തപിക്കുന്നതായി വിര്‍ജീലിയോ കോടതിയില്‍ പറഞ്ഞു. അയാളെ ഒരിക്കലും തിരികെ കൊണ്ടുവരാന്‍ കഴിയില്ലെന്ന് ഓര്‍ത്ത് ദു:ഖിക്കുന്നതായും ചെയ്തുപോയത് ഓര്‍ത്ത് ആത്മനിന്ദ അനുഭവിക്കുകയാണെന്നും കോടതിയില്‍ അനേകരെ സാക്ഷി നിര്‍ത്തി വിര്‍ജീലിയോ പറഞ്ഞു. കോടതി വിധി നടക്കുമ്പോള്‍ പ്രതിയുടെയും ഇരയുടെയും കുടുംബാംഗങ്ങള്‍ തമ്മില്‍ വാക്കേറ്റവും ഉണ്ടായി.

മയക്കുമരുന്നിന് അടിമയായിരുന്ന താന്‍ പുനരധിവാസത്തിന്റെ ഭാഗമായി പരിശീലിച്ച വിശ്വാസ ജീവിതമാണ് തന്നെ ജീവിതത്തിലേക്ക് മടക്കി കൊണ്ടുവന്നതെന്ന് വിര്‍ജീലോ പറഞ്ഞു. ഈ വര്‍ഷം ആദ്യമായിരുന്നു വിര്‍ജീലിയ പുന: പരിശോധനാ ഹര്‍ജി സമര്‍പ്പിച്ചത്. എന്നാല്‍ ഇത്തരമൊരു ഹീനമായ കുറ്റകൃത്യത്തിന് തടവുശിക്ഷയുടെ കാലാവധി നീട്ടുകയാണ് ജഡ്ജി ചെയ്തത്. ഒരിക്കലും ന്യായീകരിക്കാന്‍ കഴിയാത്ത ഈ കുറ്റകൃത്യം മയക്കുമരുന്നിന്റെ ലഹരിയിലായിരുന്നു വിര്‍ജീലിയ ചെയ്തു പോയതെന്ന് കുടുംബാംഗങ്ങള്‍ കോടതിയില്‍ വാദിച്ചു.

മെത്താംഫെറ്റാമിന്‍ എന്ന മരുന്ന് തലച്ചോറ് കത്തിക്കുന്ന സമയത്തായിരുന്നു വിര്‍ജീലിയ ഈ കുറ്റകൃത്യം ചെയ്തത്. 20-ാം വയസ്സില്‍ വിര്‍ജീലിയ മയക്കുമരുന്ന് ഉപയോഗം തുടങ്ങിയതാണെന്നും 2012 ജനുവരിയില്‍ രണ്ടാഴ്ച ഇവരെ കാണാതായിരുന്നെന്നും ഈ സമയത്ത് മയക്കുമരുന്ന് പാര്‍ട്ടിയില്‍ പങ്കെടുക്കുക ആയിരുന്നു വിര്‍ജീലിയ എന്നും ബന്ധുക്കള്‍ കോടതിയില്‍ പറഞ്ഞു. പിന്നീട് ആറു മാസത്തോളം മയക്കുമരുന്ന് കടുത്ത രീതിയില്‍ ഉപയോഗിച്ചു.

ഇതിനൊടുവിലായിരുന്നു സംഭവം. 2012 ജൂണ്‍ 7-ന് വീടിന് തൊട്ടടുത്തുള്ള പെട്രോള്‍ സ്റ്റേഷനില്‍ നിന്നും പെട്രോള്‍ കൊണ്ടു വന്ന് കാമുകന്‍ കിടന്നുറങ്ങുന്ന സോഫയില്‍ ഒഴിച്ച ശേഷം തീ കൊളുത്തുകയായിരുന്നു. സഹായത്തിനായി ഇയാള്‍ അലറി വിളിച്ചപ്പോള്‍ വിര്‍ജീലിയ കാമുകന് രക്ഷപെടാന്‍ കഴിയാത്ത വിധത്തില്‍ മുറി പുറത്തു നിന്നും പൂട്ടുകയും ചെയ്തു.