ജപ്പാനിലെ പ്രശസ്തമായ ഷുരി കോട്ടയില്‍ തീപിടുത്തം. യുനെസ്‌കോയുടെ ലോകപൈതൃകപ്പട്ടികയിലുള്‍പ്പെടുന്നതാണ് ഒകിനാവ ദ്വീപിലെ ഷുരി കോട്ട. അഞ്ഞൂറുവര്‍ഷം പഴക്കമുള്ളതാണ് ഈ കോട്ട. റിയുക്യു സാമ്രാജ്യത്തിന്റെ (19491879) ഭരണത്തില്‍ പണികഴിപ്പിക്കപ്പെട്ടതാണിത്. ഇന്നലെ രാവിലെയാണ് തീപ്പിടിത്തമുണ്ടായത്. കാരണം വ്യക്തമായിട്ടില്ല. പത്തുമണിക്കൂര്‍നീണ്ട ശ്രമത്തിനൊടുവിലാണ് തീയണയ്ക്കാനായതെന്ന് അഗ്‌നിരക്ഷാ ഉദ്യോഗസ്ഥര്‍ പറഞ്ഞു. ആര്‍ക്കും പരിക്കേറ്റിട്ടില്ല. തടികൊണ്ടുനിര്‍മിച്ച കോട്ടയുടെ ഏഴ് പ്രധാനകെട്ടിടങ്ങള്‍ തീപ്പിടിത്തത്തില്‍ പൂര്‍ണമായി നശിച്ചതായാണ് വിവരം. 2020-ലെ ടോക്യോ ഒളിമ്പിക്‌സില്‍ ദീപശിഖയെത്താനുള്ള ഇടങ്ങളുടെ പട്ടികയില്‍ ഷുരിയുമുണ്ടായിരുന്നു.രണ്ടാംലോകയുദ്ധത്തിനിടെ 1945-ല്‍ അമേരിക്കന്‍സൈന്യം കോട്ട പൂര്‍ണമായി നശിപ്പിച്ചു. 1992-ലാണ് ഇപ്പോഴുള്ള ഭാഗം പുനര്‍നിര്‍മിച്ചത്. 1970 വരെ ഒകിനാവ സര്‍വകലാശാലയായി പ്രവര്‍ത്തിച്ചു.
രണ്ടായിരത്തില്‍ പൈതൃകപ്പട്ടികയില്‍ ഇടംനേടി. പിന്നീട് രാജ്യത്തെ പ്രധാന വിനോദസഞ്ചാരകേന്ദ്രങ്ങളിലൊന്നായി മാറുകയായിരുന്നു.