തെക്കന്‍ ഓസ്‌ട്രേലിയയില്‍ അഞ്ച് ദിവസത്തിനിടെ അയ്യായിരത്തിലേറെ ഒട്ടകങ്ങളെ കൊന്നൊടുക്കി. കടുത്ത വരള്‍ച്ച നേരിടുന്ന ഇവിടങ്ങളില്‍ അമിതമായി വെള്ളം കുടിക്കുന്നതിനാലാണ് ഒട്ടകങ്ങളെ കൂട്ടത്തോടെ കൊന്നത്. ഹെലികോപ്റ്ററില്‍ നിന്ന് പ്രൊഫഷണല്‍ ഷൂട്ടര്‍മാരാണ് ഒട്ടകങ്ങളെ കൂട്ടത്തോടെ വെടിവെച്ചു കൊന്നത്.

അടുത്തിടെ ഉണ്ടായ കാട്ടുതീയില്‍ ഓസ്‌ട്രേലിയയില്‍ 50 കോടിയിലേറെ മൃഗങ്ങള്‍ ചത്തൊടുങ്ങിയെന്നാണ് കണക്കുകള്‍. കാട്ടുതീയുടെ പിന്നാലെ ഓസ്‌ട്രേലിയയുടെ പലഭാഗങ്ങളും കടുത്ത വരള്‍ച്ചയിലായി. വരള്‍ച്ച നേരിടുന്ന മേഖലകളിലുള്ള വീടുകളിലേക്ക് വനപ്രദേശങ്ങളില്‍ നിന്ന് ഒട്ടകങ്ങള്‍ വന്‍തോതില്‍ എത്താന്‍ തുടങ്ങിയതോടെയാണ് ഒട്ടകങ്ങളെ വെടിവെച്ചു കൊല്ലാനുള്ള തീരുമാനത്തില്‍ എത്തിയത്.

വരള്‍ച്ച രൂക്ഷമായി ബാധിച്ചത് തെക്കന്‍ ഓസ്‌ട്രേലിയന്‍ സംസ്ഥാനങ്ങളെയാണ്. 23000-ത്തോളം പേര്‍ താമസിക്കുന്ന ഓസ്ട്രേലിയയിലെ എപിവൈ പ്രദേശത്ത് ഇപ്പോള്‍ വരള്‍ച്ച രൂക്ഷമാണ്. മനുഷ്യവാസ സ്ഥലത്തേക്ക് ഒട്ടകങ്ങള്‍ കയറി അമിതമായി വെള്ളം ഉപയോഗിക്കുന്നുവെന്ന് പരാതികള്‍ വ്യാപകമാണ്. ഒട്ടകങ്ങളുടെ എണ്ണത്തിലുള്ള വര്‍ധനവാണ് പ്രദേശത്തെ പ്രശ്നങ്ങള്‍ക്ക് കാരണമെന്ന് അധികൃതര്‍ വ്യക്തമാക്കുന്നത്.

പതിനായിരത്തോളം ഒട്ടകങ്ങളെ കൊന്നൊടുക്കാനാണ് അധികൃതരുടെ തീരുമാനം എന്നാണ് റിപ്പോര്‍ട്ട്. അതിനാല്‍ വരും ദിവസങ്ങളില്‍ കൂടുതല്‍ ഒട്ടകങ്ങളെ കൊന്നേക്കും.