കൊറോണ വൈറസ് ലോകം മുഴുവന്‍ ഭീതി ഉയര്‍ത്തി പടര്‍ന്ന് പിടിക്കുന്ന സാഹചര്യത്തില്‍ അതിനുള്ള ചികിത്സയ്ക്കായി ലോകം ഉറ്റുനോക്കുകയാണ്. ലോകാരോഗ്യ സംഘടന നിലവിലുള്ള മരുന്നുകളുണ്ടോയെന്ന് പരിശോധിക്കുന്നതിനായി സോളിഡാരിറ്റി എന്ന പേരില്‍ അറിയപ്പെടുന്ന ആഗോള പരീക്ഷണം ആരംഭിച്ചു - എച്ച്ഐവിക്കെതിരെ ഇതിനകം ഉപയോഗിച്ച ഒരു മരുന്നും രണ്ടാം ലോക മഹായുദ്ധത്തില്‍ ആദ്യമായി പരീക്ഷിച്ച മലേറിയ ചികിത്സയക്കായി ഉപയോഗിച്ച മരുന്നും കഴിഞ്ഞ വര്‍ഷം എബോളയ്‌ക്കെതിരായ പ്രതീക്ഷ നല്‍കിയ മരുന്നും ഉള്‍പ്പടെ ഇപ്പോള്‍ പരിഗണനയിലുണ്ട്. അതിനിടെയാണ് മറ്റൊരു നിര്‍ണായക പരീക്ഷണത്തിന്റെ വിവരം അമേരിക്കയില്‍ നിന്നും പുറത്തുവരുന്നത്.

കൊറോണ വൈറസ് ബാധിച്ച് ആരോഗ്യനില ഗുരുതരമായി തുടരുന്ന രോഗികള്‍ക്ക,് രോഗത്തെ അതിജീവിച്ചവരില്‍ നിന്ന് രക്തം നല്‍കുന്ന ചിക്തിസാരീതി ആരംഭിക്കാന്‍ നീക്കം. ഇതുസംബന്ധിച്ച അനുമതി യുഎസ് ഫുഡ് ആന്‍ഡ് ഡ്രഗ് അഡ്മിനിസ്‌ട്രേഷന്‍ നല്‍കും. ചൊവ്വാഴ്ച അംഗീകരിച്ച പുതിയ അടിയന്തര പ്രോട്ടോക്കോള്‍ പ്രാകാരം രോഗം അതിജീവിച്ചവരില്‍ നിന്ന് പ്ലാസ്മ നല്‍കാന്‍ ഡോക്ടര്‍മാര്‍ക്ക് അനുവാദം നല്‍കിയിരുന്നു.

രോഗമുക്തി നേടിയവരുടെ രക്തത്തില്‍ നിന്ന് വേര്‍തിരിച്ചെടുത്ത ആന്റിബോഡി അടങ്ങിയ പ്ലാസ്മ ഉപയോഗിച്ച് കൊറോണ വൈറസ് രോഗികള്‍ക്ക് ചികിത്സ ആരംഭിക്കാന്‍ സംസ്ഥാന ആരോഗ്യ വകുപ്പ് പദ്ധതിയിട്ടിട്ടുണ്ടെന്ന് ന്യൂയോര്‍ക്ക് ഭരണകൂടം പ്രഖ്യാപിച്ചതിന് തൊട്ടുപിന്നാലെയാണ് എഫ്.ഡി.എയുടെ തീരുമാനം. തീര്‍ച്ചയായും ഇതിന് ഗുണമുണ്ട്. ഇതൊരു പുതിയ ആശയമല്ലെന്നും നൂറുവര്‍ഷത്തിലേറെ പഴക്കമുള്ള രീതിയാണെന്നും വാഷിങ്ടണ്‍ സര്‍വകലാശാലയിലെ അസോസിയേറ്റ് പ്രൊഫസര്‍ ഡോ.ജെഫ്രി ഹെന്‍ഡേഴ്‌സണ്‍ പറഞ്ഞു.

കോണ്‍വലെസെന്റ് പ്ലാസ്മ എന്നാണ് ഈ ചികിത്സയുടെ പേര്. രോഗമുക്തി നേടിയ ആളുകളുടെ രക്തത്തില്‍ നിന്ന് ആന്റിബോഡികള്‍ വികസിപ്പിക്കുന്നത് മുമ്പും ഉണ്ടായിട്ടുണ്ട്. ആധുനിക വാക്‌സിനുകള്‍ക്കും ആന്റിവൈറല്‍ മരുന്നുകള്‍ക്കും മുമ്പുള്ള യുഗത്തില്‍, 1918-ലെ ഒരു പകര്‍ച്ചവ്യാധി പനിക്ക് ഇത് ഉപയോഗിച്ചിരുന്നു.

കൂടുതല്‍ വിദഗ്ദ്ധ ചികിത്സാരീതികള്‍ വികസിപ്പിക്കുന്നതുവരെ കൊറോണ വൈറസിനെ നേരിടാനുള്ള ഏറ്റവും നല്ല പ്രതീക്ഷയായിരിക്കും ഇതെന്നും ചില വിദഗ്ധര്‍ വാദിക്കുന്നുണ്ട്. 2002-ല്‍ സാര്‍സ് രോഗം പൊട്ടിപുറപ്പെട്ട സന്ദര്‍ഭത്തില്‍ ചൈന ഈ രീതി ഉപയോഗിച്ചിരുന്നതായും അത് ഫലം കണ്ടിരുന്നതായും റിപ്പോര്‍ട്ടുകളുണ്ട്.