കൊറോണ വൈറസിനെ നേരിടാന്‍... സ്വയം രോഗം ബാധിച്ചവരെ പോലെ പെരുമാറണമെന്ന് ന്യൂസീലന്‍ഡ് പ്രധാനമന്ത്രി
കൊറോണ വൈറസിനെ നേരിടാന്‍ സ്വയം രോഗം ബാധിച്ചവരെ പോലെ പെരുമാറാന്‍ ജനങ്ങളോട് ആഹ്വാനം ചെയ്ത് ന്യൂസീലന്‍ഡ് പ്രധാനമന്ത്രി. വൈറസ് വ്യാപനം തടയാന്‍ വേറെ വഴിയില്ല, രോഗമുളളവരും ഇല്ലാത്തതുമായ എല്ലാവരും സ്വയം നിരീക്ഷണത്തില്‍ കഴിയണമെന്നും പ്രധാനമന്ത്രി ജസീന്ത ആര്‍ഡേന്‍ പറഞ്ഞു. വൈറസ് വ്യാപിക്കുന്ന സാഹചര്യത്തില്‍ രാജ്യത്ത് അടിയന്തരാവസ്ഥ പ്രഖ്യാപിച്ചു. ന്യൂസീലന്‍ഡില്‍ സ്‌കൂള്‍ കോളേജ് തുടങ്ങി നിരവധി സ്ഥാപനങ്ങള്‍ അടച്ചു. അതോടൊപ്പം ബാറുകള്‍,ഹോട്ടലുകള്‍,സിനിമ തിയറ്ററുകള്‍, ഗഗ്രൗണ്ടുകള്‍ എല്ലാം തന്നെ അടിയന്തരാവസ്ഥയെ തുടര്‍ന്ന് അടച്ചിട്ടിരിക്കുകയാണ്. എന്നാല്‍ സൂപ്പര്‍മാര്‍ക്കറ്റ്, ആശുപത്രികള്‍ തുടങ്ങിയ അവശ്യ സേവനങ്ങള്‍ ഉണ്ടാകും. ദിവസേന ജോലിക്ക് പോയി ജീവിക്കുന്ന നിരവധി സാധാരണക്കാരുണ്ടെന്നും അവര്‍ക്കായി സര്‍ക്കാര്‍ സാമ്ബത്തിക സഹായം നല്‍കുമെന്നും ജസീന്ത ആര്‍ഡേന്‍ പറഞ്ഞു. അത്യാവശ ഘട്ടങ്ങളില്‍ പുറത്തിറങ്ങുന്നവര്‍ മറ്റുളളവരില്‍ നിന്നും രണ്ട് മീറ്റര്‍ അകലം പാലിക്കണമെന്നും പ്രധാനമന്ത്രി പറഞ്ഞു. രണ്ടാം തവണയാണ് ന്യൂസീലന്‍ഡില്‍ അടിയന്തരാവസ്ഥ പ്രഖ്യാപിക്കുന്നത്. 2011 ഫെബ്രുവരി മൂന്നിന് ഭൂചലനത്തെ തുടര്‍ന്ന് അടിയന്തരാവസ്ഥ പ്രഖ്യാപിച്ചിരുന്നു.
https://www.facebook.com/Malayalivartha
