ചാള്സ് രാജകുമാരന് കൊവിഡ് 19 ; ആരോഗ്യനില തൃപ്തികരമെന്ന് ലണ്ടനിലെ ക്ലാരൻസ് ഹൗസ് ഓഫിസ്
ബ്രിട്ടീഷ് കിരീടാവകാശി ചാള്സ് രാജകുമാരന് കൊവിഡ് 19 രോഗം സ്ഥിരീകരിച്ചു. 71കാരനായ രാജകുമാരനു ചെറിയ രോഗലക്ഷണങ്ങൾ മാത്രമാണ് ഉള്ളതെന്നും ആരോഗ്യനില തൃപ്തികരമാണെന്നും ലണ്ടനിലെ ക്ലാരൻസ് ഹൗസ് ഓഫിസ് വ്യക്തമാക്കി. രാജകുമാരനും ഭാര്യ കാമിലയും സ്കോട്ലൻഡിലെ ബാൽമൊറാലിൽ ആണ് ഉള്ളത്. എന്നാൽ കാമിലയുടെ പരിശോധനാ ഫലം നെഗറ്റീവാണ്.
ആബർഡീൻഷയറിലുള്ള നാഷനൽ ഹെൽത്ത് സർവീസാണ് ഇരുവർക്കും പരിശോധന നടത്തിയത്. ചാൾസ് രാജകുമാരനു രോഗംപടർന്നത് എങ്ങനെയെന്നു വ്യക്തമായിട്ടില്ലെന്നും ക്ലാരൻസ് ഓഫിസ് അറിയിച്ചു. എലിസബത്ത് രാജ്ഞിയുടെ മൂത്ത മകനാണ് ചാൾസ് രാജകുമാരൻ.
കോവിഡ് ഭീതിയുടെ പശ്ചാത്തലത്തിൽ എലിസബത്ത് രാജ്ഞിയെ (93) നഗരഹൃദയത്തിലുള്ള ബക്കിങ്ങാം കൊട്ടാരത്തിൽനിന്നു വിൻഡ്സർ കൊട്ടാരത്തിലേക്കു മാറ്റിയിരുന്നു. നോർഫോക്കിലുള്ള സാൻഡ്രിങ്ങാം എസ്റ്റേറ്റിലായിരുന്ന ഭർത്താവ് ഫിലിപ് രാജകുമാരനെയും (98) ഇങ്ങോട്ടു മാറ്റി. ബക്കിങ്ങാം കൊട്ടാരത്തിൽ ഏറെ സന്ദർശകർ എത്താറുള്ളതിനാലാണ് മുൻകരുതൽ നടപടി. ബക്കിങ്ങാം കൊട്ടാരത്തിലെ ഒരു ജീവനക്കാരനു നേരത്തെ കോവിഡ്-19 സ്ഥിരീകരിച്ചിരുന്നു.
കൊവിഡ് ഭീതിയുടെ പ്രശ്ചാത്തലത്തില് ലണ്ടനില് നടന്ന ഒരു അവാര്ഡ് ഷോയില് ചാള്സ് രാജകുമാരന് അതിഥികളെ കൈകള് കൂപ്പി സ്വാഗതം ചെയ്തത് വാര്ത്തകളില് ഇടംപിടിച്ചിരുന്നു.വേദിയിലേക്ക് എത്തിയ ചാള്സ് രാജകുമാരന് കാറില് നിന്നിറങ്ങി ആദ്യം പതിവ് പോലെ കൈ നീട്ടിയെങ്കിലും പെട്ടെന്ന് കൈവലിച്ചു. പിന്നെ കൈകൂപ്പുകയായിരുന്നു. ഇതിന്റെ വീഡിയോ സോഷ്യല്മീഡിയയില് വൈറൽ ആയിരുന്നു.
https://www.facebook.com/Malayalivartha