കൊവിഡ് ബാധിച്ച് മരിച്ചവരുടെ എണ്ണം ലോകത്താകെ 24000 കടന്നു. ഏറ്റവുമധികം ആളുകള്‍ മരിച്ച ഇറ്റലിയില്‍ 712 പേര്‍കൂടി മരിച്ചതോടെ മരണസംഖ്യ 8215 ആയി. സ്പെയിനില്‍ 24 മണിക്കൂറിനിടെ 718 പേര്‍കൂടി മരിച്ചപ്പോള്‍ മരണസംഖ്യ 4365 ആയി. 157 പേര്‍കൂടി മരിച്ച ഇറാനില്‍ മരണസംഖ്യ 2234 ആയി. മൂന്നുമാസം മുമ്ബ് രോഗം ആദ്യം കണ്ടെത്തിയ ചൈനയില്‍ അഞ്ച് പേര്‍കൂടി മാത്രമാണ് മരിച്ചത്. മൊത്തം മരണസംഖ്യ 3292. പുതിയ 55 പേര്‍ക്ക് രോഗബാധ സ്ഥിരീകരിച്ചെങ്കിലും എല്ലാം വിദേശത്തുനിന്ന് രോഗവുമായി എത്തിയവര്‍.

ലോകത്താകെ 185 രാജ്യങ്ങളിലായി രോഗബാധിതരുടെ എണ്ണം അഞ്ച് ലക്ഷം കടന്നു. ഇതില്‍ പകുതിയിലധികം യൂറോപ്പിലാണ്. സ്പെയിന്‍ പ്രധാനമന്ത്രി പെദ്രോ സാഞ്ചസിന്റെ ഭാര്യക്കും രോഗം സ്ഥിരീകരിച്ചു. രോഗവ്യാപനം തടയുന്നതിന്റെ ഭാഗമായി ജര്‍മനിയില്‍ ഊര്‍ജിതമായ പരിശോധന നടത്തുകയാണ്. കഴിഞ്ഞ ആഴ്ച അഞ്ച് ലക്ഷം പരിശോധന നടത്തി. ഇതുമൂലം ജര്‍മനിയില്‍ മരണസംഖ്യ താരതമ്യേന കുറവാണ്. നാല്‍പതിനായിരത്തിലധികം രോഗികള്‍ ഉണ്ടെങ്കിലും 229 പേരാണ് വ്യാഴാഴ്ച വരെ മരിച്ചത്.
അതേസമയം ജര്‍മനിയിലേക്കാള്‍ 15000 രോഗികള്‍ കുറവുള്ള ഫ്രാന്‍സില്‍ മരണസംഖ്യ 1600 കടന്നു. ബ്രിട്ടനിലും നെതര്‍ലന്‍ഡ്സിലും 500 കടന്നു.